سالىق قارىزىڭىز بولسا SMS-حابارلاما كەلەتىن بولادى

2322
0
بولىسۋ:

بۇگىنگى تاڭدا اربىر جەكە تۇلعا ەشقايدا بارماي-اق, ۇيىندە وتىرىپ ەلەكتروندى ۇكىمەت پورتالى مەن مەملەكەتتىك كىرىستەر كوميتەتىنىڭ سايتىندا وزدەرىنىڭ جەكە سايكەستەندىرۋ نومىرلەرى ارقىلى قانداي سالىقتارىنىڭ بار ەكەنىن, ونىڭ قاشان پايدا بولعانىن, قاشان تولەۋ كەرەكتىگى تۋرالى اقپاراتتاردى بىلە الادى. بۇل تۋرالى قازاقستان رەسپۋبليكاسى قارجى ۆيتسە-مينيسترى قانات باەدىلوۆ ايتىپ بەردى.

– بيىلدان باستاپ جەكە تۇلعالار egov.kz پورتالى مەن مەملەكەتتىك كىرىستەر كوميتەتىنىڭ سايتى ارقىلى الداعى ۋاقىتتا قانداي سالىقتار تولەۋ كەرەك بولاتىنى تۋرالى اقپاراتتى كورە الادى. سونداي-اق, وسى جىلدان باستاپ SMS-حابارلامالار ارقىلى قانداي سالىق بەرەشەكتەرى بار, قانداي سالىقتار الداعى ۋاقىتتا تولەنۋى كەرەك دەگەن حابارلامالار تاراتاتىن بولامىز, – دەدى قارجى ۆيتسە-مينيسترى ق. باەدىلوۆ.
بۇدان وزگە, ۆيتسە-مينيستردىڭ ايتۋىنشا, سينگاپۋر جانە ەۋروپا مەملەكەتتەرىنىڭ وزىق تاجىريبەلەرىن ەسكەرە وتىرىپ, 1414 بىرىڭعاي بايلانىس ورتالىعىنا قوڭىراۋ شالىپ, جەكە كاسىپكەرلەر, جەكە تۇلعالار قانداي سالىق بەرەشەگى بار ەكەنى تۋرالى اقپاراتپەن قوسا, كەدەن جانە سالىقتار تۋرالى باسقا دا سۇراقتارعا جاۋاپ الا الادى. وسىعان وراي تيىستى بىلىكتىلىگى بار ماماندار دايارلانىپ جاتىر. اتالعان جۇمىستى دا 2-3 ايدان كەيىن ىسكە اسىرۋ كوزدەلگەن.
قارجى ۆيتسە-مينيسترى سالىق تولەۋشىلەردىڭ سالىق مادەنيەتىن دە ارتتىرۋ قاجەتتىگىن, سالىق تولەۋشىلەرمەن اراداعى كەرى بايلانىستى قامتاماسىز ەتۋ ۇشىن مەملەكەتتىك ورگاندار تاراپىنان تيىستى جۇمىستار جۇرگىزىلىپ جاتقانىن اتاپ كورسەتتى.
سونىمەن قاتار, ق. باەدىلوۆتىڭ ايتۋىنشا, 2018 جىلدىڭ ەكىنشى جارتى جىلدىعىنان باستاپ قارجى مينيسترلىگىندە اپپەلياتسييالىق كوميسسييا جۇمىس ىستەپ جاتىر. ونىڭ قۇرامىنا تەك قارجى مينيسترلىگىنىڭ قىزمەتكەرلەرى ەمەس, سونداي-اق قر ۇلتتىق ەكونوميكا مينيسترلىگى مەن «اتامەكەن» ۇكپ وكىلدەرى كىرەدى.
– اپپەلياتسييالىق كوميسسييا وتىرىستارىندا سالىق جانە كەدەن داۋلارى قاراستىرىلىپ, ادىل شەشىمدەر قابىلدانادى, – دەدى قارجى ۆيتسە-مينيسترى.
وز سۇحباتىندا قارجى ۆيتسە-مينيسترى ق. باەدىلوۆ, اتالعان شەشىمدەر قارجى مينيسترلىگىنىڭ سايتىندا جارييالاناتىنىن ايتتى جانە وسى شەشىمدەر سالىق تولەۋشىلەر وز قىزمەتتەرىن جۇزەگە اسىرۋ بارىسىندا جىبەرەتىن قاتەلىكتەردى بولدىرماۋدىڭ الدىن الۋعا ۇلكەن كومەگىن تيگىزەدى دەپ كەڭەس بەردى.

ا.احمەتقازى

بولىسۋ: