باستاۋىش سىنىپ مۇعالىمدەرى جەتىسپەي جاتىر

3883
0
بولىسۋ:

سەمەيدە ەلباسى نۇرسۇلتان نازارباەۆتىڭ حالىققا ارنالاعان «تورتىنشى ونەركاسىپتىك رەۆوليۋتسييا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنا وراي «نۇر وتان» پارتيياسىنىڭ فيليالىندا بارلىق سالادا ەڭبەك ەتىپ جۇرگەن حانىمدار باس قوسقان دوڭگەلەك ۇستەل بولىپ وتتى.

دوڭگەلەك ۇستەلدى شىعىس قازاقستان وبلىستىق ىسكەر ايەلدەر قاۋىمداستىعىنىڭ تورايىمى, دەپۋتات اينۇر ارعىنبەكوۆا ۇيىمداستىردى. جيىنعا قالاداعى كاسىپكەر ايەلدەر, قوعامدىق ۇيىم وكىلدەرى قاتىستى. قالاداعى دياگنوستيكالىق ورتالىقتىڭ ديرەكتورى, مەديتسينا سالاسىندا ەڭبەك ەتىپ جۇرگەن دەپۋتات جانات مولداعاليەۆا دوڭگەلەك ۇستەلدىڭ ۇيلەستىرۋشىسى بولدى.
– ەلباسىنىڭ «بەس الەۋمەتتىك باستاماسىنا» ەرەكشە توقتالعىم كەلەدى, – دەدى «نۇر وتان» پارتيياسى سەمەي قالالىق فيليالى توراعاسىنىڭ ورىنباسارى زۋلفييا جامالتدينوۆا. – بۇگىندە وسى باعدارلاما ارقىلى 7-20-25 جوباسىن جۇزەگە اسىرۋدى قولعا الدىق. تاعى بىر ماسەلە, ايەلدەر اراسىندا بيزنەستى دامىتۋ. سونداي-اق, ستۋدەنتتەرگە ارنالعان گرانت جانە جاتاقحانا ماسەلەسىن دە وسىعان قوسىڭىز. ستۋدەنتتەر ۇشىن جاتاقحانا ماسەلەسى ارقاشان ماڭىزدى. بالالار قايدا تۇرىپ جاتىر? ولار تۇراتىن جالدامالى پاتەرگە اتا-انا تولەي مە, كىم تولەيدى? بالالار كۇنى بويى وقۋدا, ولار قايدان تولەسىن? ارينە, وسىنىڭ بارلىعى كىمدى الاڭداتادى? ايەل ادامدى. مىنە, وسى ماسەلەلەردىڭ بارلىعىن تالقىعا تۇسىرسەك جاقسى.


دوڭگەلەك ۇستەل بارىسىندا كوپتەگەن پروبلەمالار قاراستىرىلدى. ايماقتىڭ مەملەكەتتىك باعدارلامالار اياسىندا ەكونوميكالىق دامۋى, وسىعان وراي قوعامدى ايەل ادامداردىڭ الاتىن رولى قانداي دەگەن سۇراققا جاۋاپ ىزدەلىندى.
ەڭ ماڭىزدى دەگەن سۇراقتارعا «تەررا ۆيتا» جشس-ىنىڭ ديرەكتورى ناسيحات يساباەۆا جاۋاپ بەردى. ونىڭ ايتۋىنشا, ولار دەپۋتات اينۇر ارعىنبەكوۆامەن بىرگە الىس اۋىلداردى ارالاپ, ول جاقتاعى ايەل ادامدارمەن سويلەسكەن. الىس ەلدى-مەكەندەردەگى حانىمدار بيزنەسپەن اينالىسقىسى كەلەدى ەكەن.  ناسيحات يساباەۆانىڭ ايتۋىنشا, بىر ايەل ادام شاشتاراز اشسام, وندا تەك ساۋ ادامدارعا عانا ەمەس, توسەك تارتىپ جاتقان مۇگەدەك ادامدارعا دا كومەك جاساپ, شاشىن, اياق-قولىنىڭ كۇتىمىن جاساسام دەپ وتىنگەن ەكەن. بىراق, وسىنداي ايەل ادامدار بيزنەستى قالاي اشۋ كەرەك, ول ۇشىن كىمنەن كومەك سۇراۋ كەرەك, قاي بانككە بارۋعا بولادى, مىنە, وسىلاردىڭ بارلىعىنان بەيحابار.
جيىندا ەلباسى جولداۋى اياسىندا «پەداگوگ ستاتۋسى» ماسەلەسى دە تالقىلاندى. قازىردە پەداگوگ ماماندىعىن تەك قانا ايەل ادامدار مەڭگەرەتىن بولدى. سوندىقتان دا ەر ازاماتتاردىڭ جاستارىمىزدىڭ بۇل سالاعا كەلمەي جاتقانى وكىنىشتى. سونداي-اق, سەمەيدە قازاق, ورىس تىلىندە وقىتاتىن باستاۋىش سىنىپ مۇعالىمدەرى جەتىسپەي جاتىر. سەمەي قالالىق بىلىم باسقارماسى باستىعىنىڭ ورىنباسارى گۇلنار ورازبەكوۆانىڭ ايتۋىنشا, سەمەيدە 4466 پەداگوگ بار, ونىڭ 4056-سى جوعارى بىلىمدى, ال 441-ى ورتا ارناۋلى وقۋ ورنىن بىتىرگەن. ياعني مۇحتار اۋەزوۆ اتىنداعى پەداگوگيكالىق كوللەدجدىڭ تۇلەكتەرى. جوعارى بىلىمدى ۇستازداردىڭ كوپ بولۋى بىزدىڭ قالامىز ۇشىن وتە جاقسى.
گۇلنار ورازبەكوۆانىڭ ايتۋىنشا, جاڭارتىلعان بىلىم جۇيەسىنە وراي كۋرستىق وقۋلاردان وتىپ كەلگەندەرگە تاعى دا ۇستەماقى قوسىلادى. ەلباسىنىڭ جولداۋىنان كەيىن «پەداگوگ ستاتۋسى» ماسەلەسى قوزعالىپ, ەڭبەگى سىڭگەن ۇستازدارعا 35 پايىز قوسۋ دا قولعا الىنىپتى. سىنىپ جەتەكشىلەرىنە داپتەر تەكسەرگەنى ۇشىن دە جالاقىسىنا قوسىمشا اقى قوسىلماق. ۇستازداردىڭ جۇكتەمەسى, ماسەلەن بىر اپتالىق جۇكتەمە 14 ساعاتتان 16 ساعاتقا دەيىن ازايتىلاتىن بولعان.
– سەبەبى قازىر جۇمىس ىستەۋ قيىنداپ كەتتى, – دەپ تۇسىندىردى گۇلنار ورازبەكوۆا. – جاڭارتىلعان بىلىم جۇيەسى مۇعالىمدەردەن دە, وقۋشىلاردان دا قاجىر كۇشتى تالاپ ەتەدى. «كۇندەلىك kz», «بىلىملەند» جانە تاعى باسقا باعدارلامالار كۇن سايىن وزگەرىپ دامۋ ۇستىندە. دەسەك تە بۇل بىزدىڭ جاڭالىققا جانى قۇمار جاستارىمىز, جاس مۇعالىمدەرىمىز ۇشىن تاپتىرمايتىن باعىت-باعدار. بىزدىڭ جاستار مۇعالىمدىكتى تاڭدايدى دەپ ۇمىتتەنەمىن.

راۋشان نۇعمانبەكوۆا,
سەمەي

بولىسۋ:

پىكىر جازۋ


*