Даккада қазақ киносы үздік деп танылды

1035
0
Бөлісу:

Қазақстан Республикасы Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы «Адигул продакшнмен» бірлесе түсірген «Біздің қаланың ханзадасы» фильмі «Бадал Рахман атындағы үздік балалар фильмі» жүлдесін жеңіп алды. Фестиваль 2019 жылғы қаңтардың 9 мен 18 аралығында Бангладеш астанасы Дакка қаласында өтті.

«Адамдар арасындағы бөлтірік», «Қызғыш құс», «Махаббат станциясы» атты фильмдерімен халыққа танылған Талғат Теменовтың бұл туындысы – балалар үйінің тәрбиеленушісі және қарттар үйінде өмір сүретін қария туралы баяндалады.
– Мен үшін бұл күтпеген жаңалық болды. Менің досым, танымал сербиялық өнертанушы, аталған кинофестивальде болған екен. Сол кісі қоңырау шалып, біздің фильмнің үздік балалар фильмі аталғаны туралы айтты. Бұл – «Кішкентай ханзаданың» үлкен жеңісі», – деді картина режиссері.
Естеріңізге сала кетейік, фильмде басты рөлді сомдаған актер Төлеубек Аралбай 2018 жылы Шанхай ынтымақтастық ұйымына мүше елдер арасында өткізілген кинофестивальдің «Ер адам ролін үздік сомдағаны үшін» аталымын жеңіп алған-ды. Сонымен қатар, картина II халықаралық «Еуразиялық көпір» атты кинофестиваліне негізгі конкурсына қатысқан.
Сонымен қатар аталған фестивальде «Шыңырау» фильмі де жүлдемен марапатталды. Фильмнің операторы Ривқат Ибрагимовтың жұмысын Азия фильмдері конкурсында үздік деп таныды. Фильмнің режиссері – Жәнібек Жетіруов.

Даккадағы халықаралық кинофестиваль 1992 жылдан бастап өткізіледі. Кинофорум Бангладештегі беделді кинофестиваль саналады. Кинофестивальді Rainbow Film Society клубы ұйымдастырады. Фестивальдің негізгі мақсаты – Бангладеш көрерменін әлемнің мейнстрим фильмдерімен таныстыру және жергілікті кинематографияны дамыту.

– Дакка фестиваліне көрші мемлекеттерден келген сарапшылар «Шыңырауға» қатты қызығушылық танытып, өз фестивальдеріне шақырды. Фильмнің фестивальдік тағдыры енді басталғалы тұр. Алатын биігі де алда деп ойлаймын. Қазірдің өзінде екі фестиваль өз анкеталарын жіберді, деді Жәнібек Жетіруов.
Биыл Даккадағы кинофестиваль 72 елдің қатысушыларының басын қосты. 220 кинолента көрсетілді.  Фестивальде «Азия киносы», «Ретроспектива», «Бангладеш панорамасы», «Әлем киносы», «Балалар фильмдері», «Қысқаметражды және тәуелсіз фильмдер», «Әйел кинематографистер» және «Рухани фильмдер» секциялары жұмыс істеді.

А.Ахметқазы

Бөлісу:

Пікір жазу


*