جۇمىسپەن قامتۋداعى جونسىزدىك جويىلادى

366
0
بولىسۋ:

مەملەكەتتىك حاتشى گۇلشارا ابدىقالىق­وۆانىڭ توراعالىعىمەن پرەزيدەنت جانىن­داعى سىبايلاس جەمقورلىققا قارسى ىس-قيمىل ماسەلەلەرى جونىندەگى كوميسسييانىڭ وتىرىسى وتتى. جيىندا حالىقتى جۇمىسپەن قامتۋ سالاسىنداعى زاڭدىلىقتى ساقتاۋعا, سونداي-اق «نۇرلى جول» مەملەكەتتىك باعدار­لاماسىن جۇزەگە اسىرۋعا بولىنگەن قاراجاتتى پايدالانۋ تيىمدىلىگىنە قاتىستى قابىلدانىپ جاتقان شارالار تالقىلاندى.

جيىندى اشقان گۇلشارا ابدىقالىقوۆا مەملەكەت باسشىسى نۇرسۇلتان نازارباەۆ­تىڭ بيىلعى 7 قاراشادا وتكەن قاۋىپسىزدىك كەڭەسىنىڭ وتىرىسىندا سىبايلاس جەمقور­لىقپەن بەلسەندى كۇرەس جالعاسا بەرەتىنىن, حالىق قاراجاتتىڭ قايدا جانە قانداي ماقساتقا جۇمسالعانىن بىلۋگە تيىستىگىن اتاپ ايتقانىن ەسكە سالدى.
حالىقتى جۇمىسپەن قامتاماسىز ەتۋ ماسەلەسى – مەملەكەتتىڭ الەۋمەتتىك ساياسا­تىنىڭ نەگىزى. جۇمىسپەن قامتۋ ىسىنە قولداۋ كورسەتۋ ماقساتىندا قابىلدانعان كەشەندى باعدارلامالار ەڭبەك نارىعىندا تۇراق­تىلىقتى ساقتاۋعا جانە داعدارىس كەزەڭ­دە­رىنىڭ كەلەڭسىز سالدارىن جۇمسارتۋعا سەپتىگىن تيگىزدى.
باعدارلامالاردى قارجىلاندىرۋعا ايتارلىقتاي مەملەكەت قاراجاتى بولىنۋدە. سونىمەن بىرگە, كوررۋپتسييامەن كۇرەسۋشى قىزمەت 2016 جىلدان بەرى بۇل سالادا 194 قىلمىستى تىركەدى. 32 ادام سوتتالدى. زاڭ بۇزۋ جايتتارى نەگىزىنەن تەك قاعاز جۇزىندەگى جالعان جۇمىسقا تۇرعىزۋ فاكتىلەرىمەن, بيۋدجەت قاراجاتىن جانە بەرىلگەن شاعىن نەسيەلەردىڭ ماقساتتى جەرىنە جۇمسالماۋى­مەن بايلانىستى بولىپ وتىر.
گ.ابدىقالىقوۆا سىبايلاس جەمقورلىق قاتەرلەرىن ازايتاتىن تيىمدى تەتىكتەردى ەنگىزۋ قاجەتتىگىن ايتتى. وتىرىستا باس پروكۋراتۋرا, مەملەكەتتىك قىزمەت ىستەرى جانە سىبايلاس جەمقورلىققا قارسى ىس-قيمىل اگەنتتىگى, ينۆەستيتسييالار جانە دامۋ, ەڭبەك جانە حالىقتى الەۋمەتتىك قورعاۋ مينيسترلىكتەرى باسشىلارىنىڭ باياندا­مالارى تىڭدالدى.
سونداي-اق, قۇقىق قورعاۋ جانە باقىلاۋ ورگاندارىنىڭ وكىلدەرى كوميسسييا مۇشە­لەرىنە قارجىلاندىرۋ كولەمى 3 تريلليون تەڭگەدەن اسقان «نۇرلى جول» ينفرا­قۇرىلىمدىق دامۋ مەملەكەتتىك باعدارلا­ماسىن ىسكە اسىرۋعا بايلانىستى كوپتەگەن زاڭبۇزۋشىلىقتار انىقتالعانى جونىندە مالىمدەدى. باعدارلاما جۇزەگە اسىرىلا باستاعالى سوتقا دەيىنگى 120 تەرگەۋ امالى جۇرگىزىلگەن. 48 ادام سوتتالعان. مەملەكەتتىك اۋديت ورگاندارى جالپى قۇنى 48 ميلليارد تەڭگە بولاتىن زاڭ بۇزۋشىلىقتاردى انىقتاعان.
مەملەكەتتىك حاتشى سىبايلاس جەمقورلىقتى ازايتۋ ۇشىن جەرگىلىكتى جەرلەردە اربىر ينۆەستيتسييالىق جوبانىڭ جۇزەگە اسىرىلۋىن قامتاماسىز ەتىپ, ەلەكتروندىق رەسۋرستار مۇمكىندىكتەرىن كەڭىنەن قولدانۋ ماڭىزدى ەكەنىن اتاپ وتتى.
تالقىلاۋ قورىتىندىسى بويىنشا كوميسسييا ۋاكىلەتتى مەملەكەتتىك ورگاندارعا انىقتالعان زاڭ بۇزۋشىلىقتاردى جويۋ ۇشىن ناقتى شارالار قابىلداۋ جونىندە تاپسىرما بەردى.

ايحان شارىپ

بولىسۋ:

پىكىر جازۋ


*