استانا مەملەكەتتىك قىزمەت حابى ارىپتەستىك گەوگرافيياسىن كەڭەيتۋدە

723
0
بولىسۋ:

سكوپە قالاسىندا استانا مەملەكەتتىك قىزمەت حابى ماكەدونييا رەسپۋبليكاسىنىڭ اقپاراتتىق قوعام جانە اكىمشىلىكتەندىرۋ مينيسترلىگىمەن ارىپتەستىكتە «مەملەكەتتىك قىزمەت سالاسىنىڭ زاماناۋي سىن-تەگەۋرىندەرى جانە شەشىمدەرگە قول جەتكىزۋدەگى سەرىكتەستىكتىڭ رولى» اتتى كونفەرەنتسييانى وتكىزدى.

كونفەرەنتسيياعا 16 ەلدىڭ, اتاپ ايتقاندا استانا حابىنىڭ قاتىسۋشى ەلدەرى – ازەربايجان, ارمەنييا, بەلورۋسسييا, بوسنييا جانە گەرتسەگوۆينا, گرۋزييا, ماكەدونييا, قازاقستان, قىرعىزستان, پولشا, تاجىكستان, وزبەكستان, ۋكراينا, چەرنوگورييا, سونداي-اق البانييا, كوسوۆو جانە سەربييانىڭ مەملەكەتتىك قىزمەتكەرلەرى, ساراپشىلارى مەن عالىمدارى قاتىستى.

ماكەدونييا رەسپۋبليكاسىنىڭ اقپاراتتىق قوعام جانە اكىمشىلىك مينيسترى داميان مانچەۆسكي ىس-شارانى اشا وتىرىپ, بىلاي دەدى: «كونفەرەنتسييا استانا حابىنىڭ قاتىسۋشى ەلدەرىمەن ارىپتەستىكتى كەڭەيتۋگە تاماشا مۇمكىندىك بەردى. بىز حابتى مەملەكەتتىك قىزمەت سالاسىنداعى سەرىكتەستىكتى نىعايتۋعا جانە تاجىريبە الماسۋعا قوسقان ۇلەسى ۇشىن ناتيجەلى الاڭ رەتىندە جوعارى باعالايمىز».

استانا مەملەكەتتىك قىزمەت حابىنىڭ باسقارۋشى كوميتەتىنىڭ توراعاسى اليحان بايمەنوۆ: «بۇگىنگى جاھاندانۋ جانە جاڭا تەحنولوگييالار دامىعان كەزەندە ازاماتتاردىڭ مەملەكەتتىك قىزمەتتەردىڭ ساپاسىنا قويىلاتىن تالاپتارى ۇزدىكسىز وسۋدە. ارىپتەستىكتى دامىتۋ مەملەكەتتىك باسقارۋ سالاسىنداعى ەڭ وزىق تاجىريبەلەردى انىقتاۋعا جانە تۋىنداعان قيىندىقتاردى شەشۋگە مۇمكىندىك بەرەدى. بۇعان قوسا, ارىپتەستىك تۇراقتى دامۋ ماقساتتارىنا قول جەتكىزۋدىڭ نەگىزگى فاكتورى بولىپ تابىلادى», – دەپ اتاپ وتتى.

كونفەرەنتسييادا سونداي-اق سەربييا  مەن كوسوۆو ەلدەرىنىڭ مەملەكەتتىك باسقارۋ مينيسترلەرى برانكو رۋزيك پەن ماحير ياگكيلەر, باتىس بالكان ايماقتىق مەملەكەتتىك باسقارۋ مەكتەبىنىڭ (ReSPA) ديرەكتورى راتكا سەكۋلوۆيچ, ەىدۇ-نىڭ وكىلى ميروسلاۆا بورىسكا جانە مەملەكەتتىك قىزمەت سالاسىنداعى اكادەمييالار مەن مەملەكەتتىك ورگانداردىڭ باسشىلارى  سوز سويلەدى.

كونفەرەنتسييا قاتىسۋشىلارى ارىپتەستىك, سونداي-اق  مەملەكەتتىك قىزمەتتى دامىتۋداعى جاھاندىق جانە ايماقتىق ۇردىستەردى ەسكەرۋ, ار ەلگە وز مەملەكەتتىك جۇيەلەرىن دامىتۋدا قولايلى شەشىمدەردى تابۋعا كومەكتەسەتىنىن اتاپ وتتى.

انار قونىس

بولىسۋ:

پىكىر جازۋ


*