«تىل – قازىنا» لاتىن الىپبيىن ناسيحاتتايدى

1014
0
بولىسۋ:

قازاقتىلدى گازەتتەردىڭ قاتارى تاعى بىر باسىلىممەن تولىقتى. استانادا جاڭا لاتىن گرافيكاسىنداعى تۇڭعىش گازەت تانىستىرىلدى. ۇلتتىق اكادەمييالىق كىتاپحانادا «تىل – قازىنا» رەسپۋبليكالىق گازەتىنىڭ تۇساۋكەسەرى وتتى. گازەتتى مادەنيەت جانە سپورت مينيسترلىگى مەن تىل ساياساتى كوميتەتى شايسۇلتان شاياحمەتوۆ اتىنداعى «تىل – قازىنا» ۇلتتىق عىلىمي-پراكتيكالىق ورتالىعى بىرلەسىپ شىعارعان.

گازەتتە لاتىن الىپبيىنە قاتىستى اقپاراتتار, تانىمدىق ماتەريالدار جارىق كورەدى. ايىنا ەكى رەت شىعادى. «اراعا 90 جىل سالىپ, قازاقستان لاتىن گرافيكاسىنداعى باسىلىم شىعارۋدى قولعا الدى. بۇل بارشامىز ۇشىن جاقسى ۇردىس دەپ ەسەپتەيمىز. ونىڭ قوعام كەڭىستىگىندە دە الاتىن ورنى زور بولماق. بۇل گازەت جاڭالىقتىڭ جارشىسى عانا ەمەس, لاتىن قارپىندە وقىپ بىلۋگە, ساۋاتتى جازۋعا بەيىمدەلۋگە, ۇيرەنۋگە جانە رۋحاني دەمالۋعا مۇمكىندىك بەرەدى» دەدى ارىستانبەك مۇحامەديۇلى.

«تىل – قازىنا» گازەتىنىڭ «الىپبي», «رۋحاني جاڭعىرۋ», «كيە», «عالام», «ەملە», «ساراپ», «تانىم» ايدارىندا  جاڭا الىپبي تۋرالى قۇندى دۇنيەلەر جارىق كورەدى. ش. شاياحمەتوۆ اتىنداعى «تىل – قازىنا» ۇلتتىق عىلىمي-پراكتيكالىق ورتالىعىنىڭ رەسمي سايتىندا گازەتتىڭ ەلەكتروندى نۇسقاسىن وقۋعا دا مۇمكىندىك بار.

«ايقىن» اقپارات

سۋرەت kazinform سايتىنان الىندى

بولىسۋ:

پىكىر جازۋ


*