ورتالىق ازيياداعى ىرى «نۇر جولى» وتكىزۋ پۋنكتى تەكسەرىلدى

1020
0
بولىسۋ:

بۇگىن قازاقستان رەسپۋبليكاسىنىڭ پرەمەر-مينيسترى باقىتجان ساعىنتاەۆ جۇمىس ساپارىمەن الماتى وبلىسىن ارالاپ جۇر. ترانزيتتىك الەۋەتتىڭ دامۋىمەن تانىسۋ ماقساتىندا قازاقستان–قىتاي شەكاراسىنداعى «نۇر جولى» (قر) – قورعاس (قحر) وتكىزۋ پۋنكتى مەن «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ بىرقاتار نىساندارىنا باردى.

«نۇر جولى» — ەلباسى ن. نازارباەۆتىڭ «نۇرلى جول» باعدارلاماسى اياسىندا جۇزەگە اسىرىلعان «باتىس ەۋروپا — باتىس قىتاي» اۋقىمدى جوباسىنىڭ سوڭعى قورىتىندىسى جانە ورتالىق ازييا اۋماعىنداعى ەڭ ۇلكەن وتكىزۋ پۋنكتى. قىتايدىڭ «بەلدەمە جانە جول» باستاماسىمەن ۇيلەسكەن پرەزيدەنتتىڭ مەملەكەتتىك باعدارلاماسى ەڭ الدىمەن, ۇلى جىبەك جولىن جاڭعىرتۋدى كوزدەيدى. الماتى وبلىسىنىڭ پانفيلوۆ اۋدانىنداعى وتكىزۋ پۋنكتى ارقىلى قىتاي حالىق رەسپۋبليكاسىمەن اۋىر جانە جەڭىل اۆتوكولىكتەر, سونداي-اق جولاۋشىلار اۆتوبۋستارى شەكارادان وتەدى.

ب. ساعىنتاەۆ وتكىزۋ پۋنكتىنىڭ جۇمىس ورىندارىن قاراپ, نەگىزگى تەحنيكالىق الەۋەتىمەن تانىستى. بۇل اۋقىمدى زاماناۋي كولىك-لوگيستيكالىق ورتالىقتىڭ قۇرىلىسى 2017 جىلى باستالعان, ال وسى جىلدىڭ 27 قىركۇيەگىندە اشىلۋ سالتاناتى وتتى. جوبانىڭ قۇرىلىسى مەملەكەتتىك-جەكەمەنشىك ارىپتەستىك قاعيداتى بويىنشا ىسكە اسىرىلدى.

«نۇر جولى» وتكىزۋ پۋنكتى تەحنيكالىق جابدىقتالۋ, كولىك قۇرالدارىنىڭ وتۋ جىلدامدىعى جانە باقىلاۋ جۇيەسىن ەنگىزۋ بويىنشا تەڭدەسسىز بولىپ سانالادى. توقتاۋسىز جۇمىس ىستەيتىن, اۆتوماتتاندىرىلعان باقىلاۋ جانە تىركەۋ جۇيەسى بار زاماناۋي قۇرال-جابدىقتاردىڭ ارقاسىندا جۇك كولىكتەرىن كەدەندىك جانە شەكارالىق راسىمدەۋ ۋاقىتى 40 مينۋتقا دەيىن قىسقارتىلادى.

قر قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى گ. امريننىڭ ايتۋىنشا, كەشەننىڭ جالپى قۇرىلىمى كولىك قوزعالىسىنىڭ ەكى باعىتىندا جۇمىس كۇندەرى 2500 كولىك قۇرالىن وتكىزۋگە قاۋقارلى. ونىڭ ىشىندە 2200 جۇك كولىگى, 300 جولاۋشى كولىگى بار. بۇل ترانزيتتىك اعىنداردىڭ ەداۋىر ۇلعايۋىنا مۇمكىندىك بەردى. بولاشاقتا جاڭا پۋنكت تاۋلىگىنە 5000 كولىككە دەيىن وتكىزە الاتىن بولادى. مۇنداي وتكىزۋ پۋنكتى بار ىرى ساۋدا دالىزىنىڭ پايدا بولۋى ەلىمىزدىڭ ينۆەستيتسييالىق تارتىمدىلىعىن ارتتىرىپ, وڭىرلىك ەكونوميكانىڭ دامۋىنا قۋاتتى سەرپىن بەرمەك.

سونداي-اق, باقىتجان ساعىنتاەۆ شەكارا ماڭى ىنتىماقتاستىعىنىڭ حالىقارالىق ورتالىعىنىڭ جۇمىسىمەن دە تانىستى. جوبا قازاقستان مەن قىتاي مەملەكەت باسشىلارىنىڭ باستاماسىمەن جۇزەگە اسىرىلۋدا. ماقسات — ەكى ەل اراسىنداعى ساۋدا-ەكونوميكالىق, ينۆەستيتسييالىق, عىلىمي-تەحنيكالىق جانە مادەني ىنتىماقتاستىقتى دامىتۋ.

«قورعاس» شىحو جالپى اۋماعى 560 گەكتار بولاتىن ەكى مەملەكەتتىڭ شەكارالاس اۋماقتارىندا ورنالاسقان جانە مەملەكەتتىك شەكارا ارقىلى وتەتىن «ارنايى وتكەل» ارقىلى قوسىلعان قازاقستاندىق جانە قىتاي بولىكتەرىنەن تۇرادى. جوبانىڭ بىرەگەيلىگى — ورتالىقتىڭ اۋماعىندا ادامدار, تاۋار جانە كولىك قۇرالدارى ۆيزاسىز ەركىن قوزعالا الادى.

«قورعاس» شىحو پرەزيدەنتى ق. جازيننىڭ ايتۋىنشا, ەكى ەل تۇرعىندارى تاراپىنان 2012 جىلدىڭ ساۋىر ايىندا اشىلعان ورتالىققا دەگەن قىزىعۋشىلىق جىل سايىن ارتىپ كەلەدى. حالىقارالىق ورتالىقتىڭ اۋماعىنا كىرۋ تارتىبىن جەڭىلدەتۋ ۇشىن بىراز جۇمىستار اتقارىلدى. ماسەلەن, 2016 جىلدىڭ قاراشا ايىنان باستاپ, ازاماتتارعا «قورعاس» شىحو اۋماعىنا كىرۋگە تەك جەكە كۋالىك پەن بالانىڭ تۋۋ تۋرالى كۋالىگى (بىر اتا-اناسى جانىندا بولعان جاعدايدا) عانا كەرەك. 2018 جىلدىڭ قاڭتارىنان قىركۇيەك ايىنا دەيىن ەكى جاقتان كەلۋشىلەردىڭ جالپى سانى 1 ملن ادامنان اسقان.

قازىرگى تاڭدا «قورعاس» شىحو» اق اۋدانى 236 گا بولاتىن رەزەرۆتەگى اۋماقتاردى قوسۋدى قاراستىراتىن قۇرىلىستىڭ باس جوسپارىنا تۇزەتۋلەر ەنگىزۋ جۇمىستارىن اياقتادى. جاڭا باس جوسپارعا سايكەس, كوپفۋنكتسييالى ساۋدا ۇيلەرىن جانە حالىقارالىق ىسكەرلىك ىنتىماقتاستىققا ارنالعان ورتالىقتاردى, سونداي-اق, مادەني الماسۋ ورىندارىن, بىلىم جانە عىلىمي وقىتۋ ورتالىقتارىن, سپورتتىق-ساۋىقتىرۋ ينفراقۇرىلىمى بار دەمالىس ورىندارىن سالۋ جوسپاردا بار.

«قورعاس» شىحو مالىمەتىنە سايكەس, ورتالىق اۋماعىندا جالپى قۇنى شامامەن 356 ملرد تەڭگە بولاتىن 27 ينۆەستيتسييالىق نىسان بار. پايدالانۋعا بەرىلگەن ساۋدا ۇيلەرىنىڭ جالپى اۋدانى 24 663 م2 قۇرايدى. 2018 جىلدىڭ سوڭىنا قاراي اۋدانى شامامەن 40 000 م2 بولاتىن 2 ينۆەستيتسييالىق نىساننىڭ قۇرىلىسىن اياقتاۋ كوزدەلگەن.

بۇدان وزگە «قورعاس» شىحو-نىڭ قازاقستاندىق بولىگىندە ناقتى سالىق جەڭىلدىكتەرىنىڭ پاكەتى بار ارنايى ەكونوميكالىق ايماق قۇرىلعان. شىحو-عا اەا مارتەبەسىن بەرۋ كاسىپكەرلىك قىزمەتتى دامىتۋعا جانە ينۆەستيتسييالار تارتۋعا قولايلى جاعدايلار جاسايدى. «قورعاس» شىحو اەا-نىڭ بولاشاق قاتىسۋشىلارى الەۋمەتتىكتەن وزگە, نەگىزگى سالىقتاردى تولەۋدەن بوساتىلادى. وسى جانە باسقا دا جەڭىلدىكتەر مەن ارتىقشىلىقتار قازاقستاندىق جانە شەتەلدىك قاتىسۋشىلار ۇشىن دە قولجەتىمدى بولادى. شىحو-دا تاۋار اينالىمى تسيفرلاندىرىلۋدا. بۇل كەدەن باقىلاۋى پروتسەستەرىن اۆتوماتتاندىرۋعا جول اشادى.

قازىرگى تاڭدا قازاقستاندىق ينۆەستورلار ۇشىن ينۆەستيتسييالىق نىسانداردا جۇمىستارىن جۇزەگە اسىرۋ ماقساتىندا باقىلاۋ-وتكىزۋ پۋنكتەرىندە تاۋلىكتىك جۇمىس رەجيمى ماسەلەسى شەشىلگەن. قازاقستان مەن قىتاي اراسىنداعى شەكارا ماڭى ساۋداسى مەن تۋريزمدى ودان ارى جانداندىرۋعا كومەكتەسۋ ماقساتىندا قىتايدىڭ باقىلاۋ-وتكىزۋ پۋنكتىندە 14 ساعاتتىق جۇمىس رەجيمى ىسكە قوسىلعان.

انار قونىس

بولىسۋ:

پىكىر جازۋ


*