بۇۇ: قازاقستان ميانمادا جاسالعان قىلمىستى ايىپتادى

1048
0
بولىسۋ:

بۇۇ قاۋىپسىزدىك كەڭەسىنىڭ ميانماداعى احۋالى تۋرالى وتىرىسىندا قازاقستان راكحاين شتاتىندا جاسالعان قىلمىستى ايىپتاپ, وسى ەلدەگى گۋمانيتارلىق داعدارىستى بۇكىل حالىقارالىق قوعامداستىقتىڭ قاتىسۋىمەن جەدەل جانە جان-جاقتى تۇردە شەشۋگە شاقىردى.

بۇۇ قاۋىپسىزدىك كەڭەسىنىڭ وتىرىسىندا ميانماداعى فاكتىلەردى انىقتاۋ بويىنشا تاۋەلسىز حالىقارالىق ميسسيياسىنىڭ باسشىسى مارزۋكي دارۋسمان سوز سويلەپ, ميانماداعى جاعداي تۋرالى جانە روحيندجا حالقىنا قارسى ادام قۇقىقتارىنىڭ بۇزۋلۋى جالعاسىپ وتىرعانىن ايتىپ بەردى.

قازاقستان حالىقارالىق ميسسييانىڭ تەرگەۋ ناتيجەلەرى بويىنشا ەرەكشە الاڭداۋشىلىق بىلدىرىپ, راكحاين شتاتىندا جاسالعان قىلمىستى ايىپتادى. «ميانماداعى روحيندجا-مۇسىلماندارىنا قاتىستى ەتنيكالىق جانە دىني كەمسىتۋشىلىك, وسى كۇنگە دەيىن جالعاسىپ وتىرعان كەڭ اۋقىمدى دەپورتاتسييالاۋ جانە قۋدالاۋدى قوسا العاندا ادام قۇقىقتارىنىڭ ايقىن, جاپپاي جانە جۇيەلى تۇردە بۇزىلۋى تۋرالى باياندامالار جان تۇرشىكتىرەدى», – دەپ قازاقستاننىڭ بۇۇ جانىنداعى تۇراقتى وكىلىنىڭ ورىنباسارى قانات تۇمىش مالىمدەدى.

قازاقستاننىڭ وكىلى جاسالعان قىلمىستاردىڭ تولىق اشىلۋى جانە كىنالى ادامداردى جاۋاپكەرشىلىككە تارتۋ روحيندجا-مۇسىلماندارىنىڭ وز ۇيلەرىنە قايتۋدىڭ العىشارتتارىنىڭ بىرى بولاتىنىن اتاپ وتتى.

بىر ميلليون روحيندجا ادامدارى, ولاردىڭ كوپشىلىگى ايەلدەر مەن بالالار, الى كۇنگە بانگلادەشتەگى بوسقىندار لاگەرىندە تىم قيىن جاعدايعا تۇسۋگە ماجبۇر بولىپ وتىر.

– ميانما ۇكىمەتى قاۋىپسىزدىك كەپىلدىگىن قامتاماسىز ەتۋگە, بىلىم الۋعا, جۇمىسقا ورنالاسۋعا, دەنساۋلىق ساقتاۋعا جانە تۇراقتى ۇزاق مەرزىمدى ومىر سۇرۋگە مۇمكىندىك بەرمەي, قاجەتتى جاعدايلار جاساۋ پروتسەسىن جەدەلدەتپەگەنشە, روحيندجا-مۇسىلماندارىنىڭ راكحاين شتاتىنا قايتۋى مۇمكىن ەمەس, – دەپ قازاقستاننىڭ وكىلى اتاپ وتتى.

قازاقستان بانگلادەش ۇكىمەتىنىڭ بوسقىندارعا كومەك كورسەتۋ جونىندەگى كۇش-جىگەرىن, ونىڭ ىشىندە ولاردى تۇرعىن ۇيمەن, دارى-دارمەكتەرمەن, ازىق-تۇلىك ونىمدەرىمەن قامتاماسىز ەتۋىن جوعارى باعالاپ, بۇۇ-عا مۇشە مەملەكەتتەردى, حالىقارالىق ۇيىمداردى وسى ەلگە جانە روحيندجا بوسقىندارىنا قاجەتتى قولداۋ كورسەتۋدى جالعاستىرا بەرۋگە شاقىردى.

ۇستىمىزدەگى جىلدىڭ ساۋىر ايىندا قازاقستان ۇكىمەتى بانگلادەشتەگى كوكس-بازار قالاسىنىڭ ماڭىنداعى اۋماعىندا ورنالاسقان روحيندجا بوسقىندارىنا 500 مىڭ دوللار كولەمىندە گۋمانيتارلىق كومەك كورسەتىپ, ونى ولار تۇراتىن جەرلەرگە جەتكىزدى.

اسقار التايۇلى

بولىسۋ:

پىكىر جازۋ


*