جانىبەك الىمحانۇلىنىڭ اقش-تاعى ومىرى قالاي وتىپ جاتىر (ۆيدەو)

2222
0
بولىسۋ:

قازاقستاندىق كاسىپقوي بوكسشى جانىبەك الىمحانۇلىنىڭ (3-0, 1 كو) كومانداسى جاس بوكسشى تۋرالى دەرەكتى فيلم تۇسىرىپ, كوپشىلىك نازارىنا ۇسىندى. جوبا تۋرالى بوكسشىنىڭ PR-مەنەدجەرى بەرىك سۇلتان وتاندىق vesti.kz سايتىنا ايتىپ بەرگەن ەكەن.

«بۇل مەنىڭ رەجيسسەرلىك جولداعى دەبيۋتىم. فيلم  تۇسىرۋ يدەياسى ماعان قازاقستاندا جۇرگەندە كەلگەن. مەن جانىبەكپەن بيىكتەردى باعىندىرا الاتىنىمىزعا سەندىم. ەگەر انىقتاپ قاراسا, قازاقستاندا تۇسىرىلگەن كادرلاردى دا بايقاۋعا بولادى. سوسىن تۇسىرىلىمدى اقش-تا جالعاستىردىق. بىز باستان كەشكەن بارلىق پروتسەستى تاسپاعا باستىق. مۇنىڭ بارى – تاريح.

جانىبەك ايگىلى بوب ارۋممەن كەلىسىمشارتقا وتىرعان العاشقى قازاق. وعان دەيىن ەشكىم Top Rank پروموۋتەرلىك كومپانيياسىمەن جۇمىس ىستەمەگەن ەدى. فيلمدە بىزدىڭ اقش-تاعى ومىرىمىز تۋرالى ايتقىم كەلدى. جانىبەكتىڭ جەكپە-جەكتەرگە قالاي دايىندالاتىنى, قالاي ومىر سۇرىپ, تاماقتاناتىنى دا كورسەتىلگەن. بىز مۇنىمەن توقتاپ قالمايمىز. جاقىندا ەكىنشى جەكپە-جەك كۇتىپ تۇر. ول تۋرالى فيلم مۇلدە باسقا فورماتتا شىعادى» دەيدى مەنەدجەرى.

فيلمدە ايگىلى پروموۋتەر بوب ارۋم دا پىكىر بىلدىرگەن. «جانىبەك – كەرەمەت بوكسشى. بىز ونىمەن بىرگە الەمدىك بوكستاعى كوشباسشىلىق پوزيتسيياعا كوتەرىلەمىز دەپ ويلايمىن» دەيدى ول وز سۇحباتىندا.

ەسكە سالساق, الىمحانۇلى اۋەسقوي بوكستا 75 جانە 81 كەلىگە دەيىنگى سالماق دارەجەلەرىندە سىنعا تۇسكەن بولاتىن. ال كاسىپقوي بوكستا ول 72,5 كەلى سالماقتا ونەر كورسەتەدى. ول ەندى ەكىنشى كەزدەسۋىن 3 قاراشا كۇنى تەحاس شتاتىنداعى ەل-پاسو قالاسىندا وتكىزەدى. قارسىلاسى – The Animal لاقاپ اتىمەن تانىلعان 32 جاستاعى ۆون الەكساندر.

اباي ايماعامبەت

بولىسۋ:

پىكىر جازۋ


*