بارلىق سالادا ىنتىماقتاستىق دامىپ كەلەدى

846
0
بولىسۋ:

ن. نىعماتۋلين تۇركييا رەسپۋبليكاسى ۇلى ۇلتتىق جينالىسىنىڭ توراعاسى بينالي يىلدىرىممەن كەزدەستى.
ماجىلىس توراعاسى نۇرلان نىعماتۋلين مەن تۇركييا ۇلى ۇلتتىق جينالىسىنىڭ توراعاسى بينالي يىلدىرىم انتاليياداعى ەۋرازييا ەلدەرى پارلامەنتتەرى سپيكەرلەرىنىڭ ۇشىنشى جينالىسى اياسىندا پارلامەنتارالىق ىنتىماقتاستىقتى ودان ارى ىنتالاندىرۋ جايىن تالقىلادى. كەزدەسۋدە ەكى ەل كوشباسشىلارى نۇرسۇلتان نازارباەۆ پەن رەجەپ تايىپ ەردوعاننىڭ وزارا تۇسىنىستىككە نەگىزدەلگەن بىرلەسكەن تيىمدى جۇمىسىنىڭ ارقاسىندا قازاقستان مەن تۇركييا كوپقىرلى ارىپتەستىكتى نىعايتۋدا جوعارى ناتيجەلەرگە قول جەتكىزگەنىن اتاپ وتتى. بۇگىنگى تاڭدا ەكى ەل اراسىنداعى قارقىندى ساياسي ديالوگ پەن تەرەڭ ەكونوميكالىق بايلانىستار ورناتىلىپ, وزارا ىس-قيمىل ىنتىماقتاستىقتىڭ بارلىق سالالارىندا تيىمدى دامىپ كەلەدى. ماجىلىس توراعاسىنىڭ پىكىرىنشە, قازاقستان مەن تۇركييا ەلدەرىنىڭ قارىم-قاتىناسىنا 2017 جىلدىڭ قىركۇيەك ايىنداعى تۇركييا پرەزيدەنتىنىڭ قازاقستانعا رەسمي ساپارى جانە قازاقستان پرەزيدەنتىنىڭ وسى جىلدىڭ قىركۇيەك ايىنداعى تۇركيياعا رەسمي ساپارى ەلدەر اراسىنداعى بايلانىستىڭ نىعايۋىنا تىڭ سەرپىن بەردى. كەزدەسۋدە مەملەكەت باسشىسى نۇرسۇلتان نازارباەۆتىڭ 5 قازانداعى قازاقستان حالقىنا جولداۋىندا ايتىلعان نەگىزگى باعىتتاردى اتاپ وتكەن ماجىلىس توراعاسى, كولىك جانە لوگيستيكا, تۋريزم جانە اۋىل شارۋاشىلىعى سالالارى ەكىجاقتى ىقپالداستىقتىڭ باسىم باعىتتارى بولا الاتىنىنا توقتالدى. نۇرلان نىعماتۋلين مەن بينالي يىلدىرىم پارلامەنتارالىق بايلانىستىڭ نىعايۋى استانا مەن انكارانىڭ وزارا جان-جاقتى تيىمدى ىنتىماقتاستىعىن دامىتۋعا ىقپال ەتەتىنىنە سەنىم بىلدىردى.

بولىسۋ:

پىكىر جازۋ


*