كاسىبي مەديتسينا ۇيىمى وكىلدەرىمەن كەزدەستى

567
0
بولىسۋ:

دەنساۋلىق ساقتاۋ مينيسترى ەلجان بىرتانوۆ كاسىبي اسسوتسياتسييا وكىلدەرىمەن كەزدەستى. باسقوسۋدا دەنساۋلىق ساقتاۋ جۇيەسىندەگى كاسىبي اسسوتسياتسييالاردىڭ رولىن ارتتىرۋ جانە بىرقاتار قىزمەتتەردى كاسىبي ورتاعا بەرۋ, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسى جوباسىن تالقىلاۋ ماسەلەلەرى سوز بولدى. مينيستر جينالعانداردى حالىقارالىق دارىگەرلەر كۇنىمەن قۇتتىقتاپ, اتاۋلى داتانىڭ بارلىق مەديتسينا قىزمەتكەرلەرىنە ورتاق ەكەنىن ەسكە سالدى. ول سالا قىزمەتكەرلەرىنە دەنساۋلىق پەن كاسىبي ورلەۋ, تۇلعالىق دامۋ تىلەدى.

ەلجان امانتايۇلى كەزدەسۋ تاقىرىبى وتكەن جىلى بىرقاتار جيىندا كوتەرىلىپ, بيىلعى تالقىلاۋلار كاسىبي مەرەكەگە تۇسپا-تۇس كەلگەنىنە توقتالدى. كۇن تارتى­بىنە ەنگىزىلگەن تاقىرىپتاردىڭ ماڭىز­دىلىعى مەن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە وزگەرىستەر مەن تولىقتىرۋلار ەنگىزۋ تو­ڭىرەگىندەگى وي الماسۋدىڭ ماقساتىن تۇسىن­دىرگەن مينيستر قاتىسۋشىلاردى بەلسەندى بولۋعا, پىكىرلەرى مەن ۇسىنىستارىن ورتاعا سالۋعا شاقىردى.
كەزدەسۋدە «دەنساۋلىق ساقتاۋدى دامىتۋ رەسپۋبليكالىق ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەم­لەكەتتىك كاسىپورىنىنىڭ باسشىسى اينۇر ايىپحانوۆا قازاقستاندا جۇمىس ىستەيتىن كاسىبي اسسوتسياتسييالار مەن ولار­دىڭ قىزمەتى تۋرالى مالىمدەدى.
ستاتيستيكالىق دەرەكتەر كەلتىرىپ, شەتەل تاجىريبەسىن تىلگە تيەك ەتكەن مامان مەملەكەتتىڭ بىرقاتار مىندەتىن كاسىبي ورتاعا ۇلەستىرۋ, ۇكىمەتتىك ەمەس ۇيىمداردى دەنساۋلىق ساقتاۋ سالاسىن جاقسارتۋ جوباسىنا تارتۋدىڭ تەتىكتەرىن دە نازاردان تىس قالدىرمادى. سونداي-اق مەديتسينا­لىق مەكەمەلەر مەن قىزمەتكەرلەردى اتتەستا­تسييادان وتكىزۋ, كورسەتىلگەن قىزمەتتەر ساپاسىنا باعا بەرۋ, كادرلاردىڭ بىلىكتىلىگىن ارتتىرۋ ىسىنە كاسىبي ۇيىمدار مەن اسسو­تسياتسييالاردى قاتىستىرۋدى كەڭ كولەمدە جۇرگىزۋ قاجەتتىگى ايتىلدى.
باياندامادان سوڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسى جوباسىن تالقىلاۋ باستالدى. وندا اتالعان تاقىرىپتا جاسالعان بايانداما وقىلىپ, كەزدەسۋگە كەلگەن جانە وزگە قا­لالاردان تىكەلەي بايلانىسقا شىققان كاسىبي مەديتسينالىق ۇيىمداردىڭ وكىلدەرى وي بىلدىردى. ولار وز اراسىندا بولعان تال­قىلاۋ قورىتىندىسىن جارييالاپ, ارىپ­تەستەرىنىڭ پىكىرىنەن تۇزىلگەن ۇسىنىستار تىزىمىن تانىستىردى. الماتىدان تىكەلەي بايلانىسقا قوسىلعان ۇلتتىق مەديتسينا اسسوتسياتسيياسىنىڭ پرەزيدەنتى ايجان بەكايدارقىزى كودەكسكە وزگەرىستەر ەنگىزۋ بويىنشا بىرقاتار ۇسىنىستاردى اتادى. سوزىن باستاماس بۇرىن زاڭ جوباسىنداعى كەمشىلىكتەر مەن قاتەلەردى كورسەتكەنى ۇشىن ەشكىمنىڭ رەنجىمەۋىن, كونسترۋكتيۆتى ديالوگ بولارىنا ۇمىت ارتاتىنىن ەسكەرت­كەن ايجان بەكايدارقىزى مەديتسينالىق قىزمەتكەرلەردى كاسىبي ساقتاندىرۋدىڭ قيىندىعىنا, كاسىبي مەديتسينا ۇيىمدا­رىنىڭ وكىلەتتىلىگىنە, زاڭدا قايتالانعان تۇجىرىمدارعا شولۋ جاسادى. ولاردىڭ قاتارىندا جاڭا كودەكستەن بالالارعا ەكپەنى مىندەتتەيتىن باپتى الىپ تاستاۋ تۋرالى ۇسىنىس بار. ايجان بەكايدارقى­زىنىڭ ايتۋىنشا, ەكپە جاسالماعان بالالاردى بالاباقشا مەن مەكتەپتەرگە قابىلداۋعا تىيىم سالاتىن باپ اتا-انالار مەن بالالار قۇقىعىنا قايشى كەلەدى.
وتباسىلىق دارىگەرلەر اسسوتسياتسييا­سىنىڭ پرەزيدەنتى داميليا نۇعمانوۆا العاش­قى مەديتسينالىق-سانيتارلىق كو­مەك­تىڭ ماڭىزدىلىعى بەلگىلەنۋى كەرەكتىگى, قىز­مەت كورسەتۋ ساپاسىن ۇزدىكسىز ارتتىرۋ تۋرا­لى باپقا عىلىمي نەگىزدەمەنى قوسۋ قاجەتتىلىگى جونىندە پىكىر قوستى. وسى تۇستا بارلىق ۇسىنىستاردى تىڭداپ, جازىپ وتىر­عان مي­نيستر العاشقى مەديتسينالىق-ساني­تارلىق كومەك تۋرالى ويعا قوسىلا­تىنىن بىلدىردى.
كەزدەسۋ بارىسىندا مەديتسينالىق بىلىم مەكەمەسىن بىتىرگەن ستۋدەنتتەر قابىلداي­تىن دارىگەر انتىن شەتەلدەگى وقۋىنان ورالعان شاكىرتتەر مەن ۇزاق ۇزىلىستەن سوڭ, جۇمىسىنا قايتا ورالعان قىزمەتكەرلەر ۇشىن دە ەنگىزۋ تۋرالى ۇسىنىس جاسالدى. ودان بولەك, ناۋقاستىڭ جاعدايى, مەدي­تسينالىق كورسەتكىشتەرى مەن سىرقات تاريحى تۋرالى جەكە اقپاراتتىڭ قۇپييا ساقتالۋىن قامتاماسىز ەتۋ, اقپاراتتىق جۇيەگە جۇك­تەل­گەن مۇنداي قۇجاتتاردىڭ كيبەر­قاۋىپ­سىزدىگى سيياقتى ماسەلەلەرگە مينيسترلىك نا­زارىن اۋدارۋعا تىرىسقاندار دا تابىلدى. دەنساۋلىق ساقتاۋ جۇيەسى بارلىق حا­لىقارالىق قۇجاتتاردا ەڭ اۋەلى حالىقتىڭ مۇقتاجدىعىن وتەپ, جاعدايىن جاقسارتۋعا باعىتتالاتىنى ايتىلعان. سوندىقتان بۇل سالاداعى مەملەكەتتىك جانە جەكە, ۇكىمەتتىك ەمەس, كاسىبي مەديتسينالىق ۇيىمدار بۇل ماقساتتا جەمىستى جۇمىس اتقارۋ ۇشىن وزارا تۇسىنىستىك پەن ارىپتەستىك جاعدايىندا بولعانى ماڭىزدى. كەزدەسۋ مينيسترلىك پەن كاسىبي مەديتسينالىق ۇيىمداردى بىر ۇستەل باسىنا جيناپ, وزارا پىكىر الماسۋىنا مۇمكىندىك بەرىپ, كودەكس جوباسىنا جاڭا ۇسىنىستار قوستى.

دينارا تىلەۋبەك

بولىسۋ:

پىكىر جازۋ


*