كورەرمەننىڭ كوڭىلىنەن شىققان كەزدەسۋ

1001
0
بولىسۋ:

2018 جىلعى 25 قىركۇيەك كۇنى ال-فارابي اتىنداعى قازۇۋ «كەرەمەت» سقكو كينوزالىندا كينوكەزدەسۋ جوباسى باستاۋ الدى.

بۇل كەزدەسۋدىڭ وتۋىنە ال-فارابي اتىنداعى قازۇۋ جۋرناليستيكا فاكۋلتەتى مەن قازۇۋ تەلەراديوكەشەنى ۇيىتقى بولدى. ال «كەرەمەت» cتۋدەنتتەرگە قىزمەت كورسەتۋ ورتالىعى مەن «سۇڭقار» ستۋدەنتتەر مەن ماگيسترانتتار كاسىپوداعى باستى سەرىكتەس رەتىندە قولداۋ كورسەتتى.

رۋحاني بەرەرى مول شارانىڭ ماڭىزىنا قىسقاشا توقتالا كەتسەك, كينووندىرىسى الەمدە گۋمانيستىك يدەولوگييانى تاراتۋشى ەڭ تيىمدى قۇرال جانە ونىڭ جاستاردى تاربيەلەۋ ۇدەرىسىندە ماڭىزى زور. سوندىقتان «رۋحاني جاڭعىرۋ» مەملەكەتتىك باعدارلاماسى اياسىندا كورەرمەنگە ايتار ويى بار, تاربيەلىك مانى جوعارى, جاڭا فيلمدەردى جاستار اراسىندا ناسيحاتتاۋ كوزدەلىپ وتىر. وسى ماقساتتا ارى جاستاردىڭ بوس ۋاقىتىن تيىمدى وتكىزۋى ۇشىن توقسان سايىن كينوكەزدەسۋ جوباسى وتكىزىلمەكشى.

العاشقى جوباعا Qazaqstan ۇلتتىق تەلەارناسىنىڭ تاپسىرىسى بويىنشا تۇسىرىلگەن «جانىم مەنىڭ» كوپ بولىمدى تەلەحيكاياسى تاڭدالعانى بەكەر ەمەس. سەبەبى, بۇل فيلم بىزدىڭ ۋنيۆەرسيتەتىمىزدىڭ ستۋدەنتتەرى جايلى, بىر سوزبەن ايتقاندا ماحابباتقا تولى جاستىق شاق تۋرالى. بۇل تەلەحيكاياعا 1985-1992 جىلدارى قازىرگى ال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە وقىعان جاستاردىڭ شىنايى ومىرى نەگىز بولعان. فيلمدە كەيىپكەرلەردىڭ 1985 جىلدارى قازۇۋ قالاشىعىنداعى تۇرلى وقيعاعا تولى الماتىداعى ستۋدەنتتىك كەزدەرى مەن قازىرگى كەزدەگى استاناداعى شىم-شىتىرىق وقيعالارى كەزەكتەسىپ بەرىلىپ وتىرادى.

از ۋاقىتتىڭ ىشىندە تانىمال بولعان «جانىم مەنىڭ» تەلەحيكاياسىنىڭ تۇسىرۋ توبى مەن اكتەرلار قۇرامىمەن كەزدەسۋگە كەلگەن كورەرمەندەر زالعا لىق تولى بولدى. كەشتىڭ باستى قوناقتارى رەتىندە: Qazaqstan ۇتا اۋتسورسينگتىك كومپانييالارمەن جۇمىس ىستەۋ بولىمىنىڭ باسشىسى ساۋلە جانىبەكقىزى, ال-فارابي اتىنداعى قازۇۋ جۋرناليستيكا فاكۋلتەتىنىڭ دەكانى, فيلولوگييا عىلىمدارىنىڭ كانديداتى, دوتسەنت ساعاتبەك مەدەۋبەكۇلى, فيلمنىڭ يدەيا اۆتورى ارى باس پروديۋسسەرى ارمان سقابىلۇلى, ستسەناريي اۆتورلارىنىڭ بىرى جاميت كوشەرباەۆ, باستى رولدەردى سومداعان گۇلناز اۋدانباەۆا مەن قۋانىش بەيسەعاليەۆ جانە وزگە دە اكتەرلار قۇرامى قاتىستى. ايتپاقشى فيلمنىڭ كومپوزيتورى ارى اۋەندەرىن وڭدەگەن ورازالى ماقسۇتوۆ پەن ساۋنترەكتەگى اندەردى ورىنداعان جاندوس ابدرايموۆ پەن الۋا قوسانوۆا دا كەلىپ قاتىسىپ, كورەرمەندەرمەن قاۋىشتى.

كينوكەزدەسۋ اتى ايتىپ تۇرعانداي الدىمەن ەكراننان وسى فيلمنىڭ ساۋنترەكتەرى ج.ابدرايموۆ پەن ا. قوسانوۆانىڭ ورىنداۋىندا بەرىلدى. سوسىن تەلەحيكايانىڭ العاشقى بولىمى كورسەتىلىپ, ول اياقتالعان سوڭ, سۇراق-جاۋاپ كەزەڭى باستالدى. 40 مينۋتتان استام ار سەريياسىنىڭ وزى جەكە فيلمگە تۇرارلىق مانگە يە. زالعا جينالعان جاستار وزدەرىن فيلم بارىسىندا تولعاندىرعان ساۋالدارىنا جاۋاپ الدى.

نەگىزگى ساۋالدار لەگى «جانىم مەنىڭ» جوباسىنىڭ يدەيا اۆتورى ارمان سقابىلۇلىنا قويىلدى. فيلمدەگى باستى كەيىپكەرلەر جانىم مەن ارماننىڭ بىر-بىرىنە دەگەن ادال ماحابباتى, قوس عاشىقتىڭ مۇڭعا تولى تاعدىرى ەشكىمدى بەي-جاي قالدىرمادى. سوز اراسىندا ارمان اعا تەلەحيكاياداعى باستى رول پروتوتيپتەرى الى دە ومىر سۇرىپ جاتقانىن ايتىپ, كورەرمەندەردى ىنتىقتىرىپ قويدى. كورەرمەندەر وسىدان سوڭ-اق, ارمان اعاعا سۇراقتاردى قارشا بوراتتى.

باستى رولدەردى سومداعان اكتريسا گۇلناز اۋدانباەۆا (جانىمنىڭ قازىرگى كەزى) مەن اكتەر قۋانىش بەيسەعاليەۆ (ارماننىڭ جاس كەزى) وزدەرىنىڭ بۇل جوباعا قالاي كەلگەندەرىن ايتسا, ستسەناريست جاميت كوشەرباەۆ تۇسىرىلىم بارىسىندا بولعان قىزىقتى جايتتاردى اڭگىمەلەپ بەردى. فيلمنىڭ بىردەن تانىمال بولۋىنا سەبەپ بولعان انشى تابىلدى دوسىموۆتىڭ اندەرى. ول جايىندا كومپوزيتور ارى فيلمدەگى اۋەندەردى وڭدەگەن ورازالى ماقسۇتوۆ جانە ساۋنترەكتەگى اندەردى ورىنداعان جاندوس ابدرايموۆ پەن الۋا قوسانوۆا اسەرلەنە اڭگىمەلەدى.  Qazaqstan ۇتا اۋتسورسينگتىك كومپانييالارمەن جۇمىس ىستەۋ بولىمىنىڭ باسشىسى ساۋلە جانىبەكقىزى ۇلتتىق ارنادا كورسەتىلىپ جاتقان ساپالى, تاربيەلىك مانى مول وزگە دە تەلەتۋىندىلاردى اتاپ وتتى. ەڭ باستىسى, الداعى ۋاقىتتا بۇل تەلەحيكايانىڭ جالعاسى بولۋى مۇمكىن دەپ, كورەرمەندەردىڭ قوشەمەتىنە بولەندى.

كەزدەسۋ سوڭىنا قاراي كورەرمەندەردىڭ سۇراۋىنا وراي جاس انشى الۋا قوسانوۆا تابيعي داۋىستا ان ورىنداسا, ال-فارابي اتىنداعى قازۇۋ تەلەراديوكەشەنىنىڭ ديرەكتورى, كەش جۇرگىزۋشىسى داۋرەن ماقسۇتحانۇلى مەن «سۇڭقار» ستۋدەنتتەر مەن ماگيسترانتتار كاسىپوداعىنىڭ تورايىمى شۇعىلا بۇرلىبايقىزى مارتەبەلى مەيماندارعا ۇيىمداستىرۋشىلار اتىنان ارنايى العىسحاتتار مەن شاعىن سىي-سىياپاتتار جاسادى. قوناقتارمەن قيماي قوشتاسقان كورەرمەندەر وسىنداي شارالار الداعى ۋاقىتتا دا وز جالعاسىن تاپسا دەگەن نيەتپەن قيماي قوشتاستى.

P.S. كينوكەزدەسۋدىڭ تولىق نۇسقاسىن الداعى ۋاقىتتا #AlfarabiTV ينتەرنەت ارناسىنان كورىپ, #AlfarabiFM  ينتەرنەت راديوسىنان تىڭداۋعا بولادى.

 

داۋرەن مۇحامەدجانوۆ,

ال-فارابي اتىنداعى قازۇۋ

تەلەراديوكەشەنىنىڭ ديرەكتورى,

جۋرناليستيكا فاكۋلتەتى

باسپاگەرلىك-رەداكتورلىق جانە ديزاينەرلىك ونەر

كافەدراسىنىڭ اعا وقىتۋشىسى

بولىسۋ:

پىكىر جازۋ


*