دارابوز دەكان اتىنداعى ستيپەندييا تابىس ەتىلدى

762
0
بولىسۋ:

ال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىن 1998 جىلى بىتىرگەن تۇلەكتەر 20 جىلدىق باسقوسۋ  كەشىندە ۇش ستۋدەنتكە تەمىربەك قوجەكەەۆ اتىنداعى ستيپەندييا تابىس ەتتى. 
– وتكەن اپتادا ال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ سىرتتاي بولىمىن 1998 جىلى بىتىرگەن تۇلەكتەر 20 جىلدىقتىڭ قۇرمەتىنە مارە-سارە, ماز-مەيرام بولىپ باس قوستىق. الدىمەن قاناتىمىزدى قاتايتىپ, توماعامىزدى سىپىرعان بىلىم ورداسى—قاراشاڭىراق قازگۋ-گە بارىپ, تەمىربەك قوجاكەەۆ اتىنداعى اۋديتورييادا ستۋدەنتتەرمەن, ۇستازدارمەن اشىق-جارقىن سىرلاسۋ بىر جارىم ساعاتتان اسا باستاعان سوڭ اتتىڭ باسىن جىپ كەرىپ ارەڭ توقتاتتىق.

كۋرستاستار كەزدەسۋى دال قوجاكەەۆ اتىنداعى اۋديتورييادا ۇيىمداستىرىلۋى دا كەزدەيسوقتىق ەمەس. «ادامنىڭ دا ادامى بار ازاماتى بىر بولەك, جىلقىنىڭ دا جىلقىسى بار قازاناتى بىر بولەك» دەيتىن حالىق دانالىعىنا جۇگىنسەك تە, «توعىز ۇلىم بىر توبە ەر توستىگىم بىر توبە» دەگەن ايگىلى ەرتەگىنى ەسكە تۇسىرسەك تە, قالاي دەسەك تە قوجاكەەۆتىڭ قازگۋ-دىڭ تاريحىندا اتى التىن ارىپپەن جازىلىپ, اسىرەسە جۋرناليستيكا فاكۋلتەتى مەن شاكىرتتەرى, تۇلەكتەرى ۇشىن الار ورنى, ابىروي-بەدەلى, سىي-قۇرمەتى مەن بولمىس-بىتىمىنىڭ جونى بولەك, جوسىعى ەرەك ەكەنى تالاس تۋدىرمايدى. اتاقتى اكادەميك زەينوللا قابدولوۆ ۇزەڭگىلەس سەرىگىن «مىقشەگەگە» تەڭەگەن ەكەن, قوعام قايراتكەرى نۇرلان ورازالين «قايتالانباس نارتۇلعا» سانايدى, كەشەگى شاكىرتى, بۇگىنگى سەناتور مۇحتار قۇل-مۇحاممەد «دارابوز دەكان» دەيدى, تاعىسىن تاعىلار…كۋرستاستار كەزدەسۋ جايلى كەڭەس قۇرعانىمىزدا وسى جاعىن دا ويلاسا كەلە, قاراشاڭىراققا قۇرالاقان بارماي شاكىرتتەرى-تۇلەكتەر اتىنان عاجاپ عالىم, بىرتۋار قايراتكەر, ۇلاعاتتى ۇستاز, قازاق ساتيراسىنىڭ ساردارى تەمىربەك قوجاكەەۆ اتىنداعى ستيپەندييا تاعايىنداپ, ۇزدىك ۇش ستۋدەنتكە ۇسىنۋدى بىراۋىزدان ۇيعاردىق. بولاشاقتا اقپارات ايدىنىندا جەلكەن كەرۋگە بەلدەرىن بەكەم بۋعان 1 كۋرس ستۋدەنتتەرى ارۋجان جاڭاباەۆا مەن نۇرتىلەۋ مالىكۇلىنىڭ, 3 كۋرس ستۋدەنتى اقدانا يمانقۇلوۆانىڭ قولىنا بىر رەتتىك ستيپەندييامەن بىرگە قوجاكەەۆ تۋرالى تاماشا شىعارىلعان جيناقتى قوسا ۇستاتتىق. ولاردىڭ ستيپەندييا يەگەرى اتىنا لايىق بولۋلارىن, وزى ولگەنمەن وشپەس ىزى قالعان دارابوزدى جان-جاقتى دارىپتەپ, ناسيحاتتاپ جۇرۋلەرىن وتىندىك, ۇلكەن ۇمىت ارتتىق. ۇمىت اقتالار دەگەن ويدامىز. بىزدىڭ كۋرستىڭ عانا ەمەس, قازىرگى قازاق جۋرناليستيكاسىنىڭ مارعاسقاسى, ماقتانىشى بولىپ تۇرعان دەسەك اسىرا ايتقاندىق بولماس, بەيسەكەڭ-بەيسەن قۇرانبەك تەمىربەك قوجاكەەۆتىڭ, تەمكەڭنىڭ قاتال تالابىنىڭ ارقاسىندا قالاي ساباققا دايىندالعانىن, «قويعان 3-ى 5-كە تاتيتىن» قىزىعىن بايانداپ بەردى. «ۇستازى مىقتىنىڭ ۇستانىمى مىقتى» دەپ بوسقا ايتادى دەيسىز بە?


جاقىندا عانا اسقارالى 60 جاسقا تولعان ۇلتجاندى ازامات, جۋرفاكتىڭ قازىرگى دەكانى ساعاتبەك مەدەۋبەكۇلى مەن سول جىلدارى كافەدرا مەڭگەرۋشىسى بولعان جاقسى اعايىمىز, جاقسى اقىن باۋىرجان جاقىپتى ارنايى شاقىرتىپ, يىقتارىنا شاپان جاپتىق.

 

اۋديتورييالاردى ارالاپ كورىپ, فاكۋلتەتتىڭ بۇگىنگى تىنىس-تىرشىلىگىمەن تانىستىق. اسىرەسە ساعاتحان اشىمباەۆ اتىنداعى سىنىپتىڭ وزگەشە ورنەكپەن جابدىقتالعانىنا ريزا بولىپ, ساعاتبەك مەدەۋبەكۇلىنىڭ باسشىلىق قارىم-قابىلەتىنە, ىسكەرلىگىنە سۇيسىندىك, – دەيدى كۋرس تۇلەگى, «ەگەمەن قازاقستان» گازەتىنىڭ تۇركىستان وبلىسى بويىنشا مەنشىكتى تىلشىسى عالىمجان ەلشىباي.

بولىسۋ:

پىكىر جازۋ


*