دەپۋتاتتار ۇسىنىس جاسادى

590
0
بولىسۋ:

كولىكتىك باقىلاۋ قىزمەتىن قىسقارتۋ كەرەك. بۇل تۋرالى پارلامەنت ماجىلىسىندەگى «نۇر وتان» فراكتسيياسى جانىنداعى كولىكتىك-لوگيستيكالىق ينفراقۇرىلىمدى دامىتۋ جونىندەگى كوميسسييانىڭ وتىرىسىندا دەپۋتات ساكەن وتەباەۆ مالىم ەتتى. بۇل تۋرالى قازاقپارات حابارلادى.

«كولىكتىك باقىلاۋدى سىبايلاس جەمقورلىق تاۋەكەلى جوعارى قىزمەت رەتىندە مۇمكىن قىسقارتۋ كەرەك شىعار نەمەسە ونى مامانداندىرىلعان ورگاننىڭ قاراماعىنا بەرگەن جون بولار. وسى ورايدا كولىكتىك باقىلاۋدى مەملەكەتتىك كىرىس, نە بولماسا جول پوليتسيياسىنا اۋىستىرعان دۇرىس شىعار. بۇل ۇسىنىستى ۇكىمەتتىڭ قاراۋىنا جىبەرىپ, تالقىلاۋ كەرەك. اتاپ ايتقاندا, بۇگىندە مينيسترلىك (ينۆەستيتسييالار جانە دامۋ مينيسترلىگى)  جولداردى وزدەرى سالادى, ونى وزدەرى قاداعالايدى. جولداردىڭ ساپاسىز سالىنۋىنا مۇمكىن ولار مۇددەلى شىعار, سەبەبى 99 ملرد تەڭگە جىل سايىن جولداردى قايتا سالۋ مەن جوندەۋگە بولىنەدى. نەگە? ويتكەنى كولىكتىك باقىلاۋ جۇمىس ىستەمەيدى», – دەپ توقتالدى س. وتەباەۆ.

ونىڭ پايىمىنشا, جولدىڭ ساپاسىنىڭ ناشارلاۋى ۇردىسى قارقىندى, بۇل تۇرعىدا كولىكتىك باقىلاۋ قىزمەتى وزدەرىنىڭ جۇمىسىن لايىقتى دەڭگەيدە اتقارماي وتىر. «وسىعان بايلانىستى اتالعان ۇسىنىستاردى مىندەتتى تۇردە جەتكىزۋ كەرەك. تيىستى قاداعالاۋ بولماسا, وندا بىزدىڭ جۇمىستان ەشقانداي ناتيجە شىقپايدى», – دەدى دەپۋتات كوميسسييا وتىرىسىندا.

وز كەزەگىندە دەپۋتات بەيبىت مامراەۆ جولدارعا شامادان تىس سالماق تۇسىرەتىن وتە اۋىر جۇك كولىكتەرىن ەلىمىزدىڭ اۋماعىنا كىرگىزبەۋ كەرەكتىگىن العا تارتتى. «ستاندارتتار بويىنشا اتالعان اۋىر كولىكتەردىڭ سالماعىن جولدار كوتەرمەيدى. سوندىقتان وسى جۇك كولىكتەرىن ەل اۋماعىنا كىرگىزۋگە تىيىم سالۋ كەرەك بولار. وسىعان دەيىن وڭ رۋلدى جەڭىل كولىكتەردى قازاقستانعا الىپ كىرۋگە تىيىم سالدىق قوي, ەندى بۇل ماسەلەدە دە تيىستى شەشىم قابىلداۋ كەرەك», – ب. مامراەۆ.

بۇدان بۇرىن حابارلانعانداي, جاقىندا الماتى وبلىسىندا وڭىرلىك كولىكتىك باقىلاۋ ينسپەكتسيياسى باسشىسىنىڭ ورىنباسارى باسقارعان ۇيىمداسقان قىلمىستىق توپتىڭ قىزمەتى اشكەرەلەندى.

جولداسبەك دۋاناباي

بولىسۋ:

پىكىر جازۋ


*