КӨЛ ЖАҒАЛАУЫНДАҒЫ КӨПСАЛАЛЫ ҚОНАҚҮЙ

Мемлекет басшысының Алакөл жағалауының инфрақұрылымын да­мыту және көл жағалауындағы Ақши елдімекеніне жазда демалуға келушілер үшін қолайлы жағдай жасау туралы тапсырмасы ретімен жүзеге асырылуда. Конституция күні қарсаңында осы Ақши ауылында көпсалалы «Көктем Гранд Ресорт» қонақжай кешенінің құрылысы аяқталып, салтанатты түрде ашылды.

Жылына 30 мың адамды қабылдауға лайықталынған жобаны Falcon Petroleum ЖШС жүзеге асырыпты. Тартыл­ған инвестицияның жалпы көлемі 4 млрд теңгені құрайды.
Кешеннің ашылуына арнайы келген Алматы облысының әкімі Амандық Баталов Алакөл жағалауының инфрақұ­рылымын дамыту жөнінде ауқымды жұмыстардың қолға алынып жатқан­дығын жеткізді. Өңір басшысы атап өткендей, жергілікті бюджет есебінен Ақши ауылынан көл жағалауында орналасқан демалыс орындарына дейінгі жалпы ұзындығы 23,8 шақырым болатын жолдар қалпына келтіріліп, оған 3 миллиард теңге қаржы жұмса­лып­ты. Қазіргі кезде «Үшарал – Достық», «Талдықорған – Достық» бағытындағы автомобиль жолдарын қайта төсеу жұмыстары басталды. Демалушыларды Алакөл жағалауына шаршатпай жеткізу мақсатында облыс әкімдігінің субсидидиялауы арқасында «Жетіген – Достық – Жетіген» бағыты бо­йынша теміржол және «Алматы – Үшарал – Алматы», «Астана – Үшарал – Ас­тана», «Талдықорған – Үшарал – Талдықорған» бағыттары бойынша әуе қатынастары қызмет көрсетуде. Келесі жылдан бастап, Үшарал қаласындағы әуежайдың ұшу-қону жолағын қалпына келтіру және көлдің жағасын бекіту жұмыстары жоспарланған.
– Баршаңызды заманауи көпсалалы «Көктем Гранд Ресорт» қонақжай кешенінің ашылуымен құттықтаймын. Осы жылдың мамыр айында Мемлекет басшысы Алакөлге жұмыс сапарымен келген кезінде көл жағалауының инфра­құрылымын дамыту бойынша атқарылып жатқан жұмыстарға оң баға бере отырып, бұл бағыттағы жұмысты алда да жал­ғастыру қажеттігін айтқан болатын. Сондықтан да бүгінгі ашылып отырған бес жұлдызды заманауи қонақжай кешенін – Елбасы тапсыр­масын орындау жолында жасалған маңызды қадамның бірі деп санауға болады. Осынау ауқымды жобаны жүзеге асырғаны үшін кәсіпкер Мұрат Әділхановқа ерекше алғысымды біл­діремін, – деді өңір басшысы.
Кәсіпкер Мұрат Әділханов өз ке­зегінде аудан тұрғындарын алда келе жатқан мерекемен құттықтап, жобаны жүзеге асыруда облыс басшылығының көрсеткен қолдауына алғысын білдірді. Алдағы кезде кешенді кеңейтіп, қызмет сапасын жетілдіре түсу де ойында барын жеткізді.
Көп салада қонақжай кешеніндегі 107 бөлмеге 450 адам жайғаса алады. Бөл­мелердің 97-сі стандартты, 4-уі люкс және 1-уі президенттік люкс са­натында. Кешеннің жалпы аумағы 16 гектар болса, оның 10 гектары саябаққа арналған. Қонақжай кешені 5 қабаттан тұрады. Қонақжай кешенінде 80 жаңа жұмыс орны ашылды. Мұнда демалу­шыларға арналып жазғы терассасы бар кафе, монша, караоке клубы, дүкен, балалардың ойын алаңқайы, волейбол және үстел теннисінің алаңы, кітапхана, автотұрақ пен өзге де жайлы жағдайлар қарастырылған.

Болат АБАҒАН,
Алматы облысы