قۇربان ايت قارساڭىنداعى قايىرىمدى ىس

989
0
بولىسۋ:

الماتى ورتالىق مەشىتىندە قازاقستان مۇسىلماندارى دىني باسقارماسىنىڭ توراعاسى, باس مۇفتي سەرىكباي قاجى وراز حازرەتتىڭ باستاماسىمەن الماتى ورتالىق مەشىتىندە «مەكتەپكە جول» قايىرىمدىلىق اكتسيياسى وتتى.

شارا اياسىندا از قامتىلعان وتباسىلاردان شىققان 1300 بالاعا وقۋعا قاجەتتى قۇرال-جابدىقتارمەن تولتىرىلعان مەكتەپ سومكەلەرى تابىستالىپ, قۇربان ايت مەرەكەسىنىڭ قۇرمەتىنە وراي «قۇربان ايت قۇتتى بولسىن» ايتتىق سىيلىق قوراپشالارى ۇلەستىرىلدى.

اكتسيياعا الماتى قالاسى بويىنشا ماسليحات دەپۋتاتى, بىلىكتى كاسىپكەر قايرات قۇدايبەرگەنوۆ جانە «ۋاقىپ» كورپوراتيۆتىك قايىرىمدىلىق قورى مەن «يحلاس» قايىرىمدىلىق قاۋىمداستىعى دەمەۋشىلىك كورسەتتى. بۇل يگىلىكتى ىسكە الماتى قالاسى مەشىتتەرىنىڭ يمامدارى دا ۇلەستەرىن قوسىپ, ايلىقتارىنىڭ 10 پايىزىن قايىرىمدىلىققا جۇمسادى.

سوز كەزەگى, ەڭ الدىمەن, الماتى ورتالىق مەشىتىنىڭ باس يمامى ەركىنبەك قاري كەرىمبەكۇلىنا بەرىلدى. باس يمام وز سوزىندە بۇگىنگى شارانىڭ مان-ماڭىزىنا توقتالا كەلە:

«مەكتەپكە جول العان قادىرمەندى وقۋشىلار, بارلىعىڭىزعا سات ساپار تىلەيمىن. سىزدەر «وقۋسىز بىلىم جوق, بىلىمسىز كۇنىڭ جوق» دەگەن سوزدى ۇرانداتا وتىرىپ, ەلىمىزدىڭ ەرتەڭىنە بەرىك كىرپىش بولىپ قالانۋلارىڭىز كەرەك. ول ۇشىن دىنىمىزدە اربىر مۇسىلمان ەر مەن ايەلگە بىلىم الۋ پارىز ەكەنىن ۇمىتپاي, كۇندىز-تۇنى تالماي ەڭبەكتەنۋلەرىڭىز كەرەك. سونداي-اق, قۇراننىڭ العاشقى تۇسكەن سوزى دە «وقى» دەگەنىن قاپەرلەرىڭىزگە سالا كەتكەنىم جون. سوندىقتان دا سىزدەردىڭ الداعى ومىردە الار اسۋلارىڭىز بەن باعىندىرار بەلەستەرىڭىز كوپ بولسىن دەيمىن. سونىمەن قاتار, ەلىمىزدىڭ بولاشاعى بولعان جاستارىمىزعا ارقاشان وسىلاي قولداۋ بىلدىرىپ, ولارعا قامقورلىق جاساۋ – اربىر قازاق ازاماتىنىڭ, «مەن – مۇسىلمانمىن» دەگەن ادامنىڭ مىندەتى, قاسيەتى بورىشى ەكەنى داۋسىز. بۇگىن سونىڭ جارقىن مىسالىنا كۋا بولىپ وتىرمىز. مىنەكي, جاس بۇلدىرشىندەرىمىزگە قۋانىش سىيلاپ, مەكتەپتە ساپالى بىلىم الۋىنا جاعداي جاساپ وتىرعان كاسىپكەر ازاماتتارىمىزعا اللا رازى بولسىن!» – دەپ جۇرەكجاردى تىلەگىن بىلدىردى. ودان ارى الماتى قالاسى دىن ىستەر باسقارماسىنىڭ باسشىسى ايدار ەسەنبەكوۆ اتالمىش شاراعا قۇتتىقتاۋ سوز سويلەپ, مەكتەپ وقۋشىلارىنا كەلەلى كەڭەستەرىن ايتتى. وسىنداي يگى ىستىڭ باسى-قاسىنان تابىلىپ جۇرگەن قايرات قۇدايبەرگەنوۆ تا سوز الىپ, بالالارعا وزىنىڭ بالا كەزدەن كورگەن قيىندىقتارىن ايتىپ, ومىردە جاقسى ازامات بوپ قالىپتاسۋ ۇشىن تىنباي وقىپ, تالماي ەڭبەكتەنۋ كەرەگىن ۇقتىردى. شارا سوڭىندا باس يمام مەن قايرات قۇدايبەرگەنوۆ, ايدار ەسەبەكوۆ بالالارعا سىيلىقتار ۇسىندى. اتا-انالار العىستارىن بىلدىرىپ, شارانى ۇيىمداستىرۋشىلارعا اقجارما تىلەكتەرىن ارنادى. بالالاردىڭ دا شىنايى ريزاشىلىقتارى قۋانىشقا تولى جانارلارىنان سەزىلىپ تۇردى.

الماتى ورتالىق مەشىتىنىڭ باسپاسوز قىزمەتى

بولىسۋ:

پىكىر جازۋ


*