ازيادا-2018: ەركىن كۇرەستەن العاشقى مەدال

1572
0
بولىسۋ:

يندونەزييانىڭ استاناسى دجاكارتادا XVIII جازعى ازييا ويىندارى باستالدى. جارىستىڭ العاشقى كۇنى ەركىن كۇرەس بالۋاندارى كىلەمگە شىقتى. قازاقستان قۇراماسىنىڭ ەنشىسىندە كەم دەگەندە بىر مەدال بار. ويتكەنى دانييار قايسانوۆ تۋرنيردىڭ فينالىندا بەلدەسەدى.

بىرىنشى كۇنى قازاقستاندىق بالۋاندار 4 سالماقتا جارىس جولىنا شىقتى. اتاپ ايتقاندا, جاندوس يسمايىلوۆ (57 كگ), ساياتبەك وقاسوۆ (65 كگ), دانييار قايسانوۆ (74 كگ), ادىلەت داۆلۋمباەۆ (86 كگ) جانە باقداۋلەت المەنتاي(97 كگ). يسمايىلوۆ العاشقى اينالىمدا اۋعانستاندىق قارسىلاسىن تازا جەڭىسپەن جەڭگەن ەدى. وكىنىشكە قاراي, كەلەسى كەزەڭدە قحدر بالۋانى كۋمسونگ كانگكە ەسە جىبەرىپ, جارىستان شىعىپ قالدى. ساياتبەك وقاسوۆ 1/8 فينالدان باستادى. العاشقى كەزدەسۋىندە كورەيالىق بالۋاننان ايلاسىن اسىرىپ, شيرەك فينالدا ەتنيكالىق قازاق, قحر-دىڭ اتىنان جارىسقا قاتىسقان ەرلان قاتايدى جەڭدى. وسىلايشا جارتىلاي فينالعا جەتىپ, بۇل كەزەڭدە جاپون سپورتشىسى دايچي تاكاتاني وتانداسىمىزدان باسىم تۇستى. قارسىلاسى فينالعا شىققاندىقتان, وقاسوۆ جارىستىڭ قولاسىنا تالاسۋعا مۇمكىندىك الدى. ۇشىنشى ورىن ۇشىن كۇرەسەتىن كەلەسى بالۋانىمىز – ادىلەت داۆلۋمباەۆ. ول تاجىكستان اتلەتىمەن كەزدەسىپ, ايقىن باسىمدىقپەن جەڭىسكە جەتتى. شيرەك فينالدا اۋعان سپورتشىسىن جەڭگەنىمەن, جارتىلاي فينالدا ليۆاندىق بالۋانعا ەسە جىبەردى. باقداۋلەت المەنتاي بولسا, بىرىنشى اينالىمدا-اق موڭعول قارسىلاسىنان جەڭىلدى.

قولا ۇشىن بەلدەسۋلەردەن بولەك, دانييار قايسانوۆ فينالعا شىققانىن جوعارىدا ايتقان ەدىك. بىرىنشى اينالىمدا كاتارلىق سپورتشىنى تازا جەڭىسكە قول جەتكىزىپ, جارىستى سەنىمدى باستادى. شيرەك فينالدا ۆەتنام بالۋانىن دا 10:0 ەسەبىمەن جەڭدى. 1/2 فينالدا كورەيالىق سپورتشىدان 4 ۇپايعا باسىم تۇسىپ, اقتىق سىنعا جولداما الدى. فينالدا وتانداسىمىز وزبەك سپورتشىسى بەكزود ابدۋراحمانوۆپەن كەزدەسەدى. قارسىلاسى بەكزود – ازييا بىرىنشىلىگىنىڭ, ازييا ويىندارىنىڭ جەڭىمپازى. ايتا كەتەيىك, تبيليسيدە وتكەن گران-پري جارىسىندا قايسانوۆ ابدۋراحمانوۆتان 10:0 ەسەبىمەن جەڭىلگەن ەدى. دانييارعا قارىمتا قايتارۋعا سەبەپ تابىلدى. فينال استانا ۋاقىتىمەن 18:00-گە جوسپارانعان.

قازاقستاندىق تەلەارنالاردىڭ ەشقايسى تىكەلەي كورسەتىلىم تاراتۋعا رۇقسات الماعان. جانكۇيەرلەر ترانسلياتسييا كورۋ ۇشىن وزگە ەلدەردەن تىكەلەي تاراتىلىم ىزدەپ الەك.

جادىرا اققايىر

بولىسۋ:

پىكىر جازۋ


*