تەرى بۇيىمدارىن تاڭبالاۋ اياقتالدى

536
0
بولىسۋ:

ەۋرازييالىق وداق اياسىندا تەرى بۇيىمدارىن تاڭبالاۋ بويىنشا پيلوتتىق جوبانى ىسكە اسىرۋ تۋرالى كەلىسىمدى ورىنداۋ ۇشىن وتكەن جىلى ەلىمىزدە تەرى بۇيىمدارىن تاڭبالاۋ بويىنشا پيلوتتىق جوبا ىسكە قوسىلعان بولاتىن.

ناتيجەسىندە, 2017 جىلعى 27 قاراشادان 2018 جىلعى 13 تامىزعا دەيىنگى ارالىقتا قازاقستان نارىعىنداعى 236 487 بىرلىك تەرى بۇيىمدارى تاڭبالاندى. ياعني, «كولەڭكەلى» ەمەس, زاڭدى ساۋدادا تۇرعان بىلعارى ىشىك, بۇلعىن تونداردىڭ ناقتى سانى مالىم بولدى.

بۇل رەتتە تاڭبالاۋدىڭ اقپاراتتىق جۇيەسىنە تەرى بۇيىمدارى نارىعىنىڭ 942 سۋبەكتىسى تىركەلدى.

«تاڭبالاۋ (ماركيروۆكا) جۇيەسىن ەنگىزۋدىڭ باستى بىر وڭ اسەرى سول, تەرى بۇيىمدارىنىڭ نارىعى ايتارلىقتاي ايقىن بولا باستادى, «كولەڭكە» ازايدى, تيىسىنشە, بۇل نارىققا قاتىستى نەعۇرلىم وبەكتيۆتى, شىنايى كورىنىس قالىپتاستى. تاڭبالاۋ جۇيەسىن ەنگىزۋدىڭ تاعى بىر وڭ قىرى بار: كەدەندىك تولەمدەر تۇسىمى وسۋدە, فيسكالدىق تيىمدىلىك پايدا بولدى, سونىمەن قاتار, نارىق سۋبەكتىلەرىنىڭ زاڭداستىرىلۋى سەكىلدى جاناما تيىمدىلىگى دە بايقالۋدا», – دەيدى قارجى مينيسترلىگىنىڭ مەملەكەتتىك كىرىستەر كوميتەتى.

قۇزىرلى ورگان بۇدان بىلاي كاسىپكەرلەردىڭ «بەلگىلەنگەن ۇلگىدەگى باقىلاناتىن (سايكەستەندىرۋ) بەلگىلەرى جوق» تەرى بۇيىمدارىن ساتۋعا قۇقىعى جوقتىعىن قاتاڭ ەسكەرتەدى.

وسىعان بايلانىستى, مەمكىرىستەر كوميتەتى ساتىپ الۋشىلارعا قايىرىلىپ, زاڭناما نورمالارى بۇزىلعان جانە تاڭبالانباعان تەرى بۇيىمدارى ساتىلىپ جاتقان جاعدايعا كەزدەسسە, «1412», نەمەسە «8-800-64-52» نومىرى بويىنشا سەنىم تەلەفونىنا حابارلاۋدى سۇرايدى.

ەرىك ەردەنوۆ

بولىسۋ:

پىكىر جازۋ


*