شامشىگە الماتىدا نەگە ەسكەرتكىش ورناتىلماي قالدى?

1684
0
بولىسۋ:

بۇگىن, 15 تامىز «قازاق ۆالسىنىڭ كورولى» اتانعان شامشى قالداياقوۆتىڭ تۋعان كۇنى, تىرى بولسا 88 جاسقا كەلەر ەدى. ول شىن مانىندە اتى اڭىزعا اينالعان قازاق سازگەرى, قازاقستاننىڭ قازىرگى انۇرانىنىڭ اۆتورى. اتىراۋدان التايعا دەيىنگى ۇلى دالا كەڭستىگىندە شامشى اندەرىن بىلمەيتىن قازاق جوق شىعار.

زەرتتەۋشىلەر كومپوزيتوردىڭ 350-گە جۋىق انى بار دەيدى. وسىنداي ان الەمىنىڭ الىپ تۇلعاسىنا الماتىدا الى كۇنگە بىر ەسكەرتكىش بۇيىرماي كەلەدى. ونشاقتى جىل بۇرىن زييالى قاۋىم باستاماسىمەن ەسكەرتكىش ورناتۋ ماسەلەسى قولعا الىنعان. سول كەزدەگى الماتى اكىمى يمانعالي تاسماعامبەتوۆ «قازاقستان» قوناقۇيىنىڭ كۇنشىعىس بەتىندەگى پاركتەن ورىن دا دايىنداتقىزعان (سۋرەتتە). سول جەردەن شامشى قالداياقوۆ كوشەسى دە وتىپ جاتىر. بىراق اكىم اۋىسىپ كەتتى دە, ماسەلە سول كۇيىنشە جابۋلى قالدى. شاكەڭە ەسكەرتكىش الى كۇنگە ورناتىلعان جوق.

بۇگىنگى تۋعان كۇنىندە الماتى قالاسىنىڭ اكىمى باۋىرجان بايبەككە, ونىڭ بىرىنشى ورىنباسارى ارمان قىرىقباەۆقا زييالى قاۋىم اتىنان وتىنىش جاساعىم كەلەدى. ايگىلى كومپوزيتوردىڭ ەندى ەكى جىلدان كەيىن اتالىپ وتىلەتىن 90 جىلدىعى قارساڭىندا شامشىگە ارناپ كەشەندى ىس-شارالار ۇيىمداستىرىلعانى جون. ول مەملەكەتتىك انۇرانىمىزدىڭ اۆتورى عوي. رەسپۋبليكا سارايىنا اتى بەرىلسە دە, كوپتىك ەتپەيدى. «قازاقستان» قوناقۇيىنىڭ ارتىنداعى شاعىن پارككە شامشى اتى قوسا بەرىلىپ, سول جەرگە شامشى ەسكەرتكىشى بوي كوتەرسە, ۇلتتىق مادەنيەتىمىزدىڭ اسقاقتاۋى بولماي ما? ۇلتقا قىزمەت ەتۋ ۇلت جۇلدىزدارىن ارداقتاۋمەن جالعاسقانى جاراسىمدى.

مارات بايدىلدىاۇلى (توقاشباەۆ):

فەيسبۋكتەگى جازبادان

بولىسۋ:

پىكىر جازۋ


*