«تۋعان جەر» شىعارماشىلىقتى شىڭدايدى

801
0
بولىسۋ:

«بولاشاققا باعدار: رۋحاني جاڭعىرۋ» باعدارلاماسى اياسىندا «تۋعان جەر» جازعى لاگەرى جۇمىسىن باستادى. ىس-شارا الماتى قالاسىنىڭ بەلسەندى, دارىندى جاستارىنىڭ دەمالىس ۋاقىتىن تيىمدى, كوڭىلدى وتكىزۋ ۇشىن ۇيىمداستىرىلۋدا. «تۋعان جەر» جوباسىن الماتى قالاسى جاستار ساياساتى ماسەلەلەرى جونىندەگى باسقارمانىڭ مەملەكەتتىك الەۋمەتتىك تاپسىرىسى اياسىندا Social Development Center قوعامدىق قورى ۇيىمداس­تىرعان. جاستارمەن جۇمىس جاساۋدا الماتى قالاسىنىڭ اكىمدىگى ۇيىتقى بولىپ وتىر.

13-18 تامىز ارالىعىندا «لەسنايا سكازكا» تاۋلى كۋرورتتىق قوناقۇيى الماتى جاستارىنىڭ 150 وكىلىن قابىلدايدى. جوبا اياسىندا قاتىسۋشىلار ۇشىن بەس تاۋلىك بويى بەلسەندى دەمالىس, پايدالى وقۋ باعدارلا­مالارى جانە كوركەم تابيعات باۋرايىندا تۇرلى سپورت­تىق, مادەني ىس-شارالار ۇيىمداستىرىلادى. داستۇرلى «تۋعان جەر» جازعى جاستار لاگەرى – الماتى جاستارىنىڭ شىعارماشىلىق الەۋەتىن دامىتۋعا مۇمكىندىك بەرەتىن بىردەن-بىر جوبا. باستى ماقساتى – جاستاردىڭ جەكە تۇلعا­لىق قاسيەتتەرىن شىڭداۋ, مادەني, فيزيكالىق جانە كاسىبي دامۋى ۇشىن بارلىق جاعداي جاساۋ. سول سەبەپتى, «تۋعان جەرگە» قاتىسۋشىلارعا شەبەرلىك ساباق­تار, تانىمدىق ترەنينگتەر, سونىمەن قاتار فۋتبول جانە ۆولەيبولدان تۋرنيرلەر, كوڭىلدى تاپقىرلار كلۋبىنىڭ ويىندارى, ينتەللەكتۋالدى برەين-رينگتەر جانە تاعى باسقا دا سپورتتىق, شىعارماشىلىق جارىس­تار ۇيىمداستىرىلۋدا. اتالعان ىس-شارا – جاستار ۇشىن قىزىقتى تاجىريبە الماسۋدىڭ بىرەگەي مۇمكىندىگى. جاڭا دوستار تاۋىپ, ەلگە تانىمال تۇلعالارمەن جۇزدەسەدى.

Social Development Center قوعامدىق قورىنىڭ قىزمەتكەرى بىرجان قازتۇرعانوۆتىڭ ايتۋىنشا, جازعى لاگەرگە قاتىسۋشىلار ارنايى ىرىكتەۋدەن وتەدى. «داس­تۇرلى تۇردە وتكىزىلەتىن «تۋعان جەر» جازعى لاگەرى­نىڭ جاس­تارعا بەرەرى كوپ. الماتى حالقىنىڭ تەڭ جارتى­سى – جاستار. بىزدىڭ ماقساتىمىز – جازعى ۇزاق دەمالىس كەزىندە جاستاردىڭ ۋاقىتىن تيىمدى وتكىزۋ, ۇنەمى جاستار ماسەلەسىن ەستەن شىعارماۋ. جازعى لاگەرگە قاتىساتىن 150 ۇمىتكەردىڭ 80-ىن وقۋ ورىندارى ۇسىنادى. جاستارعا ارنالعان ىس-شارالاردى داستۇرلى تۇردە وتكىزۋدىڭ ماڭىزى زور. سەبەبى, ۇگىت-ناسيحاتپەن جالىقتىرماي, پراكتي­كالىق ىس-شارالارمەن دەمالىس ۋاقىتىن تيىمدى وتكىزۋ جاستاردىڭ ەسىندە قالادى. وزارا جاڭالىق­تارىمەن بولىسەدى, اقپارات الماسادى. تانىمدىق سەمينارلار جاڭاشا باعىت-باعدار بەرەدى دەپ سانايمىن» دەدى ول.

سونداي-اق جازعى لاگەردىڭ وقۋ جانە مادەني باعدارلاماسى اياسىندا تانىمال ساياسي قايراتكەر ايدوس سارىم, ChocoFamily حولدينگىنىڭ نەگىزىن قا­لاۋشى راميل مۋحورياپوۆ, انشى عالىمجان مول­دانازار, ارتيست, ۆاينەرلەر سەرىك شارىپ, نۇرلان باتىروۆ, تەلەجۇرگىزۋشى ادىل ليياندار قاتىسۋدا.

 

مايرا جانىسباي

بولىسۋ:

پىكىر جازۋ


*