«Туған жер» шығармашылықты шыңдайды

«Болашаққа бағдар: рухани жаңғыру» бағдарламасы аясында «Туған жер» жазғы лагері жұмысын бастады. Іс-шара Алматы қаласының белсенді, дарынды жастарының демалыс уақытын тиімді, көңілді өткізу үшін ұйымдастырылуда. «Туған жер» жобасын Алматы қаласы жастар саясаты мәселелері жөніндегі басқарманың мемлекеттік әлеуметтік тапсырысы аясында Social Development Center қоғамдық қоры ұйымдас­тырған. Жастармен жұмыс жасауда Алматы қаласының әкімдігі ұйытқы болып отыр.

13-18 тамыз аралығында «Лесная сказка» таулы курорттық қонақүйі Алматы жастарының 150 өкілін қабылдайды. Жоба аясында қатысушылар үшін бес тәулік бойы белсенді демалыс, пайдалы оқу бағдарла­малары және көркем табиғат баурайында түрлі спорт­тық, мәдени іс-шаралар ұйымдастырылады. Дәстүрлі «Туған жер» жазғы жастар лагері – Алматы жастарының шығармашылық әлеуетін дамытуға мүмкіндік беретін бірден-бір жоба. Басты мақсаты – жастардың жеке тұлға­лық қасиеттерін шыңдау, мәдени, физикалық және кәсіби дамуы үшін барлық жағдай жасау. Сол себепті, «Туған жерге» қатысушыларға шеберлік сабақ­тар, танымдық тренингтер, сонымен қатар футбол және волейболдан турнирлер, Көңілді тапқырлар клубының ойындары, интеллектуалды брэйн-рингтер және тағы басқа да спорттық, шығармашылық жарыс­тар ұйымдастырылуда. Аталған іс-шара – жастар үшін қызықты тәжірибе алмасудың бірегей мүмкіндігі. Жаңа достар тауып, елге танымал тұлғалармен жүздеседі.

Social Development Center қоғамдық қорының қызметкері Біржан Қазтұрғановтың айтуынша, жазғы лагерьге қатысушылар арнайы іріктеуден өтеді. «Дәс­түрлі түрде өткізілетін «Туған жер» жазғы лагері­нің жас­тарға берері көп. Алматы халқының тең жарты­сы – жастар. Біздің мақсатымыз – жазғы ұзақ демалыс кезінде жастардың уақытын тиімді өткізу, үнемі жастар мәселесін естен шығармау. Жазғы лагерьге қатысатын 150 үміткердің 80-ін оқу орындары ұсынады. Жастарға арналған іс-шараларды дәстүрлі түрде өткізудің маңызы зор. Себебі, үгіт-насихатпен жалықтырмай, практи­калық іс-шаралармен демалыс уақытын тиімді өткізу жастардың есінде қалады. Өзара жаңалық­тарымен бөліседі, ақпарат алмасады. Танымдық семинарлар жаңаша бағыт-бағдар береді деп санаймын» деді ол.

Сондай-ақ жазғы лагерьдің оқу және мәдени бағдарламасы аясында танымал саяси қайраткер Айдос Сарым, ChocoFamily холдингінің негізін қа­лаушы Рамиль Мухоряпов, әнші Ғалымжан Мол­даназар, артист, вайнерлер Серік Шәріп, Нұрлан Батыров, тележүргізуші Әділ Лияндар қатысуда.

Майра ЖАНЫСБАЙ