اتامان كالەبوزان: «اي مەن ايشا» جەلىسىمەن فيلم تۇسىرىلۋى تيىس

1284
0
بولىسۋ:

انكارا قالاسىنان شىعاتىن «كاردەش كالەملەر» جۋرنالىنىڭ جاڭا سانىندا قازاقستاننىڭ حالىق جازۋشىسى, مەملەكەتتىك سىيلىقتىڭ يەگەرى شەرحان مۇرتازانىڭ «اي مەن ايشا» رومانى تالدانىپ, قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ راحىمجان وتارباەۆتىڭ «اق كوبەلەكتەر» اڭگىمەسى جارييالاندى. سونداي-اق حالىقارالىق باسىلىمدى اي سايىن شىعارىپ وتىرعان ەۋرازييا جازۋشىلار قاۋىمداستىعىنىڭ توراعاسى, جازۋشى ياكۋپ وماروعلىنىڭ ەلوردامىزدىڭ 20 جىلدىق مەرەيتويىنا وراي جازىلعان «استانا تۋرالى تولعانىس» اتتى ماقالاسى جارىق كوردى.

تۇرىك جازۋشىسى اتامان كالەبوزان وز ساراپتاماسىندا «تۇركى الەمى ادەبيەتىنە سىڭىرگەن ەرەن ەڭبەگى ۇشىن» سىيلىعىنىڭ يەگەرى شەرحان مۇرتازانىڭ سۋرەتكەرلىك تاسىلى مەن جازۋ مانەرىنە, كاسىبي شەبەرلىگى مەن تىلىنىڭ شۇرايلىعىنا توقتالا كەلە, بالا بارىسحاننىڭ كۇرەسكەر اناسىنىڭ ۇلتتىق بەينەسىنە, اقىل-پاراساتىنا تانتى بولعانىن ايتادى.

سونىمەن قاتار,  ايشا ارقىلى قازاق ايەلدەرىنىڭ بولمىسىن جاقىن تاني تۇسكەنىن, تاريحي شىعارمانى وقي وتىرىپ, اۆتوردىڭ بالالىق شاعىنا بىرگە بارىپ قايتقانداي ۇلكەن اسەر العانىن اڭگىمەلەپتى. اربىر وقيعادا ومىرلىك ساباق, تاربيەلىك مان جاتقانىن جەتكىزىپ, «شەرحان مۇرتازا – الەمدىك دەڭگەيدەگى كلاسسيك جازۋشى. سوندىقتان ونىڭ شىعارمالارى دۇنيەجۇزى تىلدەرىنە اۋدارىلىپ, رومان جەلىسى بويىنشا فيلم تۇسىرىلۋى تيىس» دەگەن ۇسىنىس تاستاپتى.


ەستەرىڭىزگە سالا كەتسەك, «اي مەن ايشا» رومانىن جازۋشى-اۋدارماشى مالىك وتارباەۆ – 2017 جىلى, راحىمجان وتارباەۆتىڭ «اق كوبەلەكتەر» اڭگىمەسىن 2016 جىلى تۇرىك تىلىنە اۋدارىپ, قازاقستاننىڭ تۇركيياداعى ەلشىلىگىنىڭ قولداۋىمەن تۇركى الەمى وقىرماندارىنا تارتۋ ەتكەن بولاتىن.

جازۋشى ياكۋپ وماروعلى استانا قالاسىن 20 جىلدىق مەرەيتويىمەن قۇتتىقتاي وتىرىپ, جاڭادان شاھار تۇرعىزىپ, تىڭ جەر يگەرۋ كەز كەلگەن مەملەكەتتىڭ قولىنان كەلە بەرمەيتىن تاۋەكەلدى قادام ەكەنىن ايتا كەلە, مەگاپوليس سالىپ, ونى باس شاھار ەتىپ بەكىتۋ ىلۋ دە بىر كەزدەسەتىن توسىن وقيعا ەكەنىنە باسىمدىق بەرىپتى.

«ار ادام وزى ومىر سۇرگەن قالاعا ۇقسايدى. استانالىقتار دا باس قالا سيياقتى قازاقتىڭ مادەني قۇندىلىقتارىن ساناسىنا سىڭىرۋمەن قاتار, عالامدىق جاڭالىقتارعا قۇلاق تۇرىپ, وزگە مادەنيەتتەرمەن بىرگە وز بولمىسىن ساقتاي بىلگەن تاۋەلسىز ەلدىڭ ەركىن ويلى ازاماتتارى بولىپ قالىپتاسىپ كەلەدى. باس قالا تۇرعىندارىنىڭ ەڭسەلى رۋحى جەر-جاھاننىڭ تۇكپىر-تۇكپىرىنە شۋاق بولىپ تارايدى. بولاشاققا باعدارى بىزدى دە قۋانتادى, الداعى كۇنگە ۇمىت سىيلايدى.


استانانى باس قالاعا اينالدىرعان تۇركى الەمىنىڭ دانا كوشباسشىسى نۇرسۇلتان نازارباەۆتى جەمىستى اتقارعان ەرەن ەڭبەگى ۇشىن ايرىقشا قۇتتىقتاۋ كەرەك. 20 جىلدىق بەلەستى باعىندىرعان جاس قالا – استانا مەن قازاقستاننىڭ ماڭگى عۇمىر كەشەتىنىنە سەنىمدىمىز» دەپ اعىنان جارىلعان.
جۋرنالدان جەرلەس جازۋشى, اۋدارماشى ابدىلدابەك سالىقبايدىڭ جانە باسقا دا تۇركىتىلدەس ەلدەر اقىن-جازۋشىلارىنىڭ اڭگىمەلەرى مەن ولەڭدەرىن جانە تۇركى الەمىنە ورتاق اقپاراتتىق جاڭالىقتاردى وقۋعا بولادى.

قانشايىم بايداۋلەت

بولىسۋ:

پىكىر جازۋ


*