سىرتتاي وقۋ سىرت قالا ما?

3712
9
بولىسۋ:

2019 جىلدىڭ 1 قاڭتارىنان باستاپ ەلدەگى سىرتتاي وقۋ تۇرى توقتاتىلماق. سونىمەن بىرگە, جوعارى وقۋ ورىندارى بىلىم باعدارلامالارىن, بىلىم بەرۋ قىزمەتتەرىنىڭ وزىندىك قۇنىن وزدەرى انىقتايدى. بۇل تۋرالى بيىل 4 شىلدەدە قابىلدانعان جوعارى وقۋ ورىندارىنىڭ اكادەمييالىق جانە باسقارۋشىلىق تاۋەلسىزدىگىن كەڭەيتۋدى كوزدەيتىن زاڭدا ايتىلعان. بىلىم جانە عىلىم مينيسترى ەرلان ساعاديەۆتىڭ ايتۋىنشا, وزگەرىستەر ازاماتتارعا جوعارى بىلىمگە قولجەتىمدىلىكتى كەڭەيتۋگە باعىتتالعان. مينيستر وسى جايىندا «بۇل زاڭعا ساي بىلىم باعدارلاماسىن يگەرۋ ۇشىن ستۋدەنتتەرگە ناقتى بىر ۋاقىت بەرىلمەيدى. جوعارى وقۋ ورىندارى بىلىم ۇلگەرىمىنىڭ ناتيجەسىنە قاراي ستۋدەنتتەردىڭ باكالاۆردى ۋاقىتىنان بۇرىن بىتىرۋگە مۇمكىندىك بەرەتىن ىڭعايلى باعدارلاما جاسايدى. زاڭدا ۋنيۆەرسيتەتتەردەگى وقۋ اقىسىن رەتتەيتىن نورمانى الىپ تاستاۋ قاراستىرىلعان» دەگەن بولاتىن. راسىندا, سىرتتاي وقۋدىڭ سىنعا ۇشىراعانى جاسىرىن ەمەس. ماسەلەن, ۇلىبريتانييادا سىرتتاي وقۋ تۇرى باعاسى جاعىنان كۇندىزگى بولىمنەن 12 ەسە ارزان بولعانىمەن, بەرىلەتىن جۇكتەمە مولشەرى ەلىمىزدەن الدەقايدا اۋىر. تالاپتارى دا قاتاڭ. قوسىمشا وقىتىلاتىن كىتاپتار وز الدىنا بىر بولەك. ال بىزدە قالاي? ساراپشىلاردىڭ بىر توبى وقۋدىڭ بۇل تۇرى كاسىبي بىلىم بەرە المايتىنىن تىلگە تيەك ەتسە, تاعى بىرەۋلەر بۇل جەمقورلىققا باستايتىن جول ەكەنىن اشىق ايتۋدا.

مۇرات باقتييارۇلى,
سەناتور:

قاشىقتىقتان وقىتۋ تۇرىن دامىتۋ قاجەت 

– زاڭ ىشىندە جوعارى وقۋ ورىندارىنىڭ دەربەستىگىن نىعايتۋ, قارجىلىق دەربەستىك پەن سىرتتاي وقۋعا قاتىستى كوپتەگەن كوكەي­كەستى ماسەلەلەر بار. 2019 جىلدىڭ 1 قاڭتارىنان باستاپ قازاقستانداعى بار­لىق جوو-داعى سىرتتاي وقىتۋ توقتا­تىلادى. بۇل – دۇرىس باستاما. سىرتتاي وقىتۋ كەڭەستىك زامان تۇسىندا كادر تاپشىلىعى بولىپ, وندىرىستە جۇمىس كۇشى جەتىسپەگەن كەزدە ەنگىزىلگەن بولاتىن. ال قازىرگى نارىق كەزەڭىندە سىرتتاي وقىتۋ ەشقانداي بىلىم بەرمەيدى. ستۋدەنتتەر وقۋعا قۇجات تاپسىرىپ, 2-5 جىلدان كەيىن كەلىپ, ديپلومىن الىپ جاتادى. سوندىق­تان بىز ونى قاشىقتىقتان وقىتۋ باعدار­لا­ماسىمەن الماستىردىق. سەبەبى, سىرت­تاي وقىتۋ تيىمدىلىگىن جوعالتتى. جوعارى وقۋ ورىندارىنا عانا قىزمەت ىستەيتىن, اقشا جيناۋدىڭ قۇرالىنا اينالدى. سول سەبەپتى, ونى توقتاتۋدى پارلامەنت دەپۋ­تاتتارى ماقۇلدادى. وندىرىستەن قول ۇزبەي, سىرتتاي بىلىم العىسى كەلەتىن ازاماتتارعا قاشىقتىقتان وقىتۋ جۇيەسى بار.
قاشىقتىقتان وقىتۋدىڭ بىر ەرەكشە­لىگى – ستۋدەنت باعدارلامانى بولىپ, 2-3 جىلدا يگەرۋى مۇمكىن. ياعني, وقۋ باعدارلا­ماسىن تەز يگەرسە, ديپلومىن دا تەزىرەك الۋعا مۇمكىندىك بار. ستۋدەنت تاپسىرما­لارىن ينتەرنەت ارقىلى الىپ, وتكىزىپ وتىرادى. بۇل – الەمدىك ۇردىس. اقش-تا, ەۋروپا ەلدەرىندە وقىتۋدىڭ بۇل فورماسى بۇرىننان كەلە جاتىر.
سونىمەن قوسا, ەندى جوو مەملەكەتتىك بىلىم بەرۋ ستاندارتىن ساقتاي وتىرىپ, اربىر ماماندىققا بايلانىستى وقۋ باعدارلاماسىن جاساۋعا مۇمكىندىك الادى. بۇرىن باعدارلامانى بىلىم جانە عىلىم مينيسترلىگى بەكىتەتىن. ەكىنشىدەن, جوو اككرەديتاتسييالاۋ ماسەلەسى جولعا قويى­لىپ جاتىر. اككرەديتاتسييادان وتكەن ۋنيۆەرسيتەت مەملەكەتتىك ستاندارتتاعى ديپلومدى بەرە الادى. ال بۇل سىناقتان وتپەگەن جوو سول وقۋ ورنىنىڭ عانا ديپلومىن تاپسىرادى. وسىلايشا, ۇزدىك جوو رەيتينگى جاسالادى. اككرەدي­تاتسييادان وتە الماعان وقۋ ورىندارى بىرتە-بىرتە نارىقتان ىسىرىلىپ, جابى­لىپ قالۋى مۇمكىن.
كەلەسى بىر ماسەلە باتىس ەلدەرىندە جاقسى دامىعان دۋالدى بىلىم بەرۋ جۇيەسىن ايتۋ كەرەك. وقۋ باعدارلاماسىنىڭ 60 پايىزى تەورييالىق بىلىمگە نەگىزدەلسە, 40 پايىزى تاجىريبە جيناقتاۋمەن, ياعني وندىرىس ورىندارىندا وتەدى. كەڭەس وداعى كەزىندە بۇل جۇيە وز جەمىسىن بەرگەن. تاۋەل­سىزدىك العاننان كەيىن مۇنى دا جوعالتىپ العانىمىز راس. دۋالدى بىلىم بەرۋ كوبىنە كوللەدجدەردە جاقسى دامى­عان. تىكەلەي وندىرىس ورىندارىمەن بايلانىس ورناتىل­عان. الايدا بىزدە ستۋدەنتتەردى سول جۇيە بويىنشا مامان­دىققا سايكەس وقىتۋعا قابىلداپ الاتىن وندىرىس ورىندارى كوپ ەمەس. بۇل وز الدىنا قيىندىق تۋعىزادى. قازىر نازارباەۆ ۋنيۆەرسيتەتى, قبتۋ, قمەبي سيياقتى جوعارى وقۋ ورىندارىندا بۇل جۇيە قارقىندى جۇمىس ىستەۋدە. ياعني, وندىرىس ورىندارىنىڭ شەبەرلەرى تىكەلەي ستۋدەنتتەرمەن جۇمىس ىستەيدى. بۇل جۇيەگە بىز بىرتە-بىرتە كەلەتىنىمىز انىق. وندىرىس ورىندارىنىڭ ازدىعى, جەكەمەنشىك نارىققا بايلانىستى ماسەلە شەشىمىن تاپپاي كەلە جاتىر.

راحمان الشانوۆ,
جوعارى وقۋ ورىندارى قاۋىمداستىعىنىڭ توراعاسى:

ماماندىقتاردى بولۋدە سۇرانىس ەسكەرىلۋ قاجەت

– سىرتتاي وقىتۋدى قانداي باعدار­لامامەن الماستىرا الامىز?
– قازىر سىرتتاي وقىتۋدىڭ ورنىن الماستىراتىن قاشىقتىقتان وقىتۋدىڭ ەرەجەلەرى قاراستىرىلىپ, تالقىلانۋدا. نەگىزگى ماقسات – جۇمىس ىستەپ جۇرگەن ازاماتتاردىڭ بىلىم الۋىنا جاعداي جاساۋ. وسى ورايدا جاڭا جولداردى ىزدەپ جاتىرمىز.
– وقۋ ورنى مەن وندىرىس اراسىنداعى بايلانىستى ورناتۋ ماسەلەسى قالاي شەشىلۋدە?
– جۇمىس بەرۋشىلەر كاسىبي ستاندارت قابىلدايدى. وقۋ ورىندارى سونىڭ نەگىزىندە باعدارلامالارىن دايىندايدى. سونداي تالاپ قويىلىپ وتىر. بىراق جۇمىس بەرۋشىلەردىڭ بارلىعى بۇل ستان­دارتتى نەگىزدەپ ۇلگەرمەي جاتىر. ەلىمىزدە 900 ماماندىق بولسا, بۇگىنگى تاڭدا سونىڭ 40-قا جۋىعىنىڭ عانا ستاندارتى بار. بيىل ستاندارتتاردى 200-گە جەتكىزۋ جوسپارلانۋدا. ياعني, ەندى وقۋ ورىندارى كاسىپورىندارمەن كەلىسىپ, سۇرانىستاعى ماماندىقتى انىقتاپ, وقۋ باعدارلاماسىن وزدەرى جاسايدى.
– جۇمىس بەرۋشىلەر تاراپىنان بەلگىلى ماماندىقتارعا تاپسىرىس بەرۋ ماسەلەسى قالاي?
– بۇگىنگى تاڭدا مەكتەپتەرگە قانشا مۇعالىم قاجەت ەكەنى بەلگىلى. ماسەلەن, سولتۇستىك قازاقستاندا شاعىن مەكتەپتەر كوپ. وندا مۇعالىمدەر جەتكىلىكسىز. سوعان بايلانىستى بيولوگييا مەن حيمييا, ماتە­ماتيكا مەن ينفورماتيكا دەگەن سيياقتى قوسىلعان ەكى ماماندىقتى وقىتۋعا رۇقسات بەرىلدى. سوندا شاعىن مەكتەپتەگى مۇعالىم تاپشىلىعى ماسەلەسىن شەشە الامىز. ياعني, بىر مامان جاقىن ەكى پاننەن ساباق بەرە الادى. ال باسقا سالالاردا جۇمىس بەرۋشىلەر تاراپىنان تاپسىرىس قاجەت. سوندىقتان جۇمىس بەرۋشىلەر بۇل ماسەلەنى مينيسترلىككە دەر كەزىندە جەتكىزسە, بىلىم گرانتتارىن بولگەندە دە ىڭعايلى بولاتىن ەدى.
بيىلدىڭ وزىندە زامان تالابىنا ساي كوپتەگەن ماماندىقتار اشىلدى.
ماسەلە – سولاردىڭ كوپشىلىگىن مەكتەپ تۇلەكتەرى بىلمەۋىندە. سوعان بايلانىستى مەكتەپ – وقۋ ورنى – جۇمىس بەرۋشى بىرلەسە جۇمىس ىستەۋى قاجەت. بىر مىسال, «حيمييالىق في­زيكا» ماماندىعى جايىندا وقۋشىلار بىلمەۋى مۇمكىن. مينيسترلىك جاڭا مامان­دىقتاردى وقۋشىلارعا ەرتەرەك ايتىپ, تانىستىرۋى كەرەك. بيىل «كيبەرقاۋىپ­سىزدىك» ماماندىعىنا گرانت كوپ بولىندى. الايدا مەكتەپتەر بۇدان دا بەيحابار. مەكتەپ تۇلەكتەرى ۇيرەنگەن مامان­دىقتاردى تاڭدايدى.
«بيوتەحنولوگييا» ماماندىعىنا كەلۋ­شىلەر قاتارى كوپ بولسا, «ورمان شارۋا­شىلىعىنا» قۇجات تاپسىرعاندار از. «مەتەرولوگييا», «گەودەزييا» مامان­دىق­تارى ەلىمىزگە قاجەت. الايدا وسىنداي سيرەك كەزدەسەتىن ماماندىقتارعا وقۋ­شىلار قىزىقپايتىنىن اڭعاردىق.
قازىر ستۋدەنتتەر وقۋ باعدارلاماسىن 30-40 پايىزعا وزدەرى جاساۋعا قۇقىعى بار. تاعى بىر ايتا كەتەتىنى ۋنيۆەرسيتەت ستۋدەنتتەرىنىڭ شەتەلدىك تاجىريبە جيناقتاۋعا مۇمكىندىگى بار. وتاندىق كاسىپورىندار وقۋ ورىندارىنا قاي شەتەلدىك كاسىپورىننىڭ تاجىريبەسى قاجەت ەكەنىن ايتىپ, وسى ۇش تاراپتىڭ اراسىندا كەلىسىمشارتتار جاسالسا, ستۋدەنتتەردىڭ جۇمىسقا ورنالاسۋى دا جەڭىلدەيتىنى انىق. سۇرانىس پەن ۇسىنىس سايكەس بولۋى كەرەك. ماسەلەن, بيىل كوپتەگەن ماماندىقتاردىڭ اعىلشىن تىلى بولىمدەرىنە 1000 گرانت بولىندى. الايدا وعان تاپسىرعان ستۋدەنتتەر از بولدى. سوندىقتان گرانت وقۋ ورىندارىنىڭ يگەرۋىنە بايلانىستى بولىنگەنى دۇرىس. سول سيياقتى, ورىس بولىمىنە تاپسىرعاندار قاتارى ازايعانىن بايقادىق. كەيبىر ماماندىقتاردا 1-2 بالا عانا تاپسىردى. دەمەك, گرانتتى وقىتۋدىڭ قازاق, ورىس, اعىلشىن بولىمدەرىنە بولگەنشە, بالدىق جۇيەگە نەگىزدەگەن دۇرىس ەكەنىن تۇسىندىك. قازاق بولىمىندەگى بالالاردىڭ بىلىم دەڭگەيى جوعارى ەكەنىن ايتا كەتكەن جون. ورىس مەكتەبى تۇلەكتەرىنىڭ كوپشىلىگى رەسەيگە وقۋعا تاپسىرىپ جاتىر. وسىنىڭ بارلىعىن بولاشاقتا ەسكەرەمىز.
مەكتەپ بىتىرگەن تۇلەكتەردىڭ ىشىندە 75 مىڭى وقۋعا تۇسەتىندەي بالل جينادى. بىلتىرعىعا قاراعاندا كورسەتكىش جوعارى. بىلتىرلارى كوپ ادام سىرتقا كەتىپ ەدى. قازىرگى كەزدە ەلىمىزدە وقيمىز دەگەندەردىڭ سانى وستى. سونىڭ ىشىندە قازاق مەكتەبىن بىتىرگەندەردىڭ كورسەتكىشى جوعارى. قازىر 80 پايىز قازاق مەكتەبىندە وقىپ جاتقاندار بار. بۇرىن 50 دە 50 بولاتىن بولسا, سوڭعى جىلدارى, ياعني بيىل 75 پايىزعا قازاق مەكتەبىن بىتىرگەن بالالار كونكۋرسقا قاتىساتىن بولدى.
– «سەرپىن» باعدارلاماسىنىڭ جۇزەگە اسۋى تۋرالى نە ايتاسىز?
– باعدارلاما بويىنشا وقۋ ورنىن بىتىرگەن ستۋدەنت 3 جىل سول اۋماقتا جۇمىس ىستەۋى كەرەك. وسىعان وراي, باعدارلاما بويىنشا وقۋعا تاپسىرعاندار ازايىپ كەتتى. سوندىقتان تالاپكەرلەرگە «سەرپىن» باعدارلاماسىنا قاتىساتىن جوعارى وقۋ ورىندار مەن وسىنداي وزگەرىستەر جايىندا تەرەڭىرەك ماعلۇمات بەرىلۋى قاجەت. سول سيياقتى شەتەلدەگى قازاقتارعا بولىنگەن گرانت تا ويلاعانىمىزدان يگەرىلمەي قالدى. مۇنىڭ سەبەبىن انىقتاپ, ولارمەن جۇمىس ىستەۋ كەرەك.
– بيىل بولىنگەن 53 594 مەملەكەتتىك گرانتتىڭ 24 مىڭى تەحنيكالىق مامان­دىقتارعا بەرىلگەن ەكەن. بۇل قانشالىقتى دۇرىس?
– راسىندا, تەحنيكالىق ماماندىق­تارعا باسىمدىق بەرىلدى. 9 مىڭنان استامى – پەدوگوگيكالىق, 2 785-سى اۋىل­شارۋا­شىلىق جانە ۆەتەرينارلىق مامان­دىقتارعا ۇلەستىرىلگەن. 2 700-ى مەدي­تسينالىق ماماندىققا بولىنگەن. ال ەڭ از گرانت سانى زاڭگەر ماماندىعىنا – 100 ورىن. قالعانى الەۋمەتتىك-ەكونومي­كالىق, قىزمەت كورسەتۋ, اسكەري مامان­دىقتارعا قاراستىرىلعان. بولاشاققا تەحنيكالىق ماماندىقتار قاجەت ەكەنى انىق. دەگەنمەن نارىق سۇرانىسى ەسكەرىلمەدى. ماسەلەن, «روبوتوتەحنيكا» ماماندىعىنا 1000 گرانت بولگەنىمىزبەن, «روبوت جاسايتىن كاسىپورىندار جەتكىلىكتى مە?» دەگەن سۇراق الدىمىزدان شىعادى.
قازىر كوپتەگەن بالالار گرانتقا تۇسۋدى عانا ماقسات قويىپ, تاڭداعان ماماندىق­تارى جايىندا ەشنارسە بىلمەيدى. كەيىن وقۋ كەزىندە قاتەلەسكەنىن تۇسىنىپ جاتادى. سوندىقتان كەلەسى جىلدان باستاپ جوعارى وقۋ ورىندارىنا مەكتەپ اتتەستاتىمەن قابىلداۋ ماسەلەسى قاراستىرىلۋدا. فرانتسييا, بالتىق ەلدەرىندە سول جۇيە بار. ياعني, كۋرس سايىن ىرىكتەپ تەك بىلىمدى ستۋ­دەنتتەردى عانا قالدىرماقپىز. تاقىرىپ قىزۋ تالقىلانۋدا.
تاعى بىر كوكەيكەستى ماسەلە, قوسىمشا بىلىم بەرۋ كۋرستارىن تىركەۋ. ياعني, جوعارى وقۋ ورنىنا تاپسىرعان ازامات وسىعان دەيىن ماماندىعىنا قاتىستى قوسىمشا كۋرستاردان بىلىم السا, اتالعان سەرتيفي­كاتتاردى ەسكەرۋ, تىركەۋ جاعى ويلاستى­رىلۋدا. سوندا ستۋدەنتتىڭ كۋرستا وقىعان پاندەرى ەسكەرىلىپ, جالپى وقۋ مەرزىمى دە قىسقاراتىنى دا انىق. بۇل ماسەلە دە تالقىلانۋدا.

سەيىلبەك مۇساتاەۆ,
ساياسي عىلىمداردىڭ دوكتورى: 

بينارلىق بىلىم بەرۋدى دامىتساق…

– الەمدىك تاجىريبەدە سىرتتاي وقۋ بول­ماعانىمەن, قاشىقتىقتان وقىتۋ جۇيە­سى جاقسى جولعا قويىلعان. بىزدە قا­لىپتاسقان سىرتتاي وقۋدىڭ كەمشىلىگى – بىلىم ساپاسىنىڭ تومەن بولۋىندا. سەبەبى, از ۋاقىت ىشىندە بىر ماماندىق يەسى بولۋ قيىن. كوپشىلىك ديپلوم ۇشىن وقىدى. كوپ ادامدار جۇمىس بارىسىندا تاجىريبە جيناقتاپ, وزدەرىن دامىتىپ مامان اتا­نىپ جاتتى. سەبەبى, سىرتتاي وقۋدان كا­سىبي بىلىم الۋ قيىن ەكەنى سوزسىز. ال جاقسى جاقتارىنا كەلسەك, بىراز ادامنىڭ جوعارى بىلىم الۋىنا سەبەپكەر بولدى. تۇرمىستىق, وتباسىلىق جاعدايلارعا بايلانىستى بىلىم الا الماعان ازاماتتار مامان ديپ­لو­مىن الدى. كەيدە جوعارى بىلىمدى ازا­ماتتار ومىردەن وز ورنىن باسقا سالادان تاۋىپ جاتقان جاعدايلار بولادى. سول كەز­دە سىرتتاي وقۋ ارقىلى بىلىمىن جەتىل­دىرىپ, جۇمىستان اجىراماي قوسىمشا بىلىم الىپ, وز ماماندىعىنىڭ يەسى اتانادى.
ۋاقىت وتە كەلە زامان اعىمىنا باي­لانىستى سىرتتاي وقۋدىڭ دا مانى كەتىپ بارا جاتقانى جاسىرىن ەمەس. سىرتتاي وقۋ بىردەن جويىلىپ كەتپەيتىنى انىق. ونىڭ ورنىن قاشىقتىقتان وقىتۋ الماستىرىپ, دامي تۇسەدى. قاشىقتىقتان وقۋدىڭ سىرتتاي وقۋدان ارتىقشىلىعى كوپ. ادامنىڭ ينتەرنەت ارقىلى كۇندە­لىكتى تاپسىرمالارىن الىپ, ىزدەنىپ, وزىن-وزىن دامىتۋىنا جول اشادى.
بىز قازىر بولون پروتسەسى بويىنشا جۇمىس ىستەيمىز. ال ەۋروپالىق بىلىم بەرۋ جۇيەسىنىڭ باستى ەرەكشەلىگى – ستۋدەنتتىڭ جان-جاقتى ىزدەنۋىنە كوبىرەك كوڭىل بولۋدە. وسى قاعيداعا سۇيەنە وتىرىپ, كۇندىزگى وقۋ بولىمىندە دە ستۋدەنتتەردىڭ وز بەتىنشە ىزدەنىپ, جۇمىس ىستەۋىن قولعا العان ابزال.
قازىر كوپشىلىكتەن «مىنا ۋنيۆەر­سيتەتتىڭ بىلىمى جاقسى, ال انا ۋنيۆەر­سي­تەتتە ساپاسى تومەن» دەگەن سيياقتى پىكىر­لەردى ەستىپ جاتامىز. راسىندا, بارلىق ۋنيۆەرسيتتە مينيسترلىك بەكىتكەن بىر وقۋ باعدارلاماسى, بىر سيللابۋس. بۇگىنگى زاماندا ۋنيۆەرسيتەتتەردى ولاي سالىستىرۋ ويعا قونىمسىز. ويتكەنى ماسەلە – ستۋ­دەنتتىڭ بەرىلگەن تاپسىرمانى ورىنداپ, وز بەتىنشە ىزدەنۋىندە. مۇنداي پىكىردىڭ قالىپتاسۋىنىڭ سەبەبى دە سول, كەيبىر وقۋ ورىندارىندا ستۋدەنتكە قويىلعان تالاپ كۇشتىرەك بولادى.
قاشىقتىقتان وقىتۋ جۇيەسىمەن قوسا, بينارلىق بىلىم بەرۋدى دامىتۋ قاجەت. ياعني, بۇل – ستۋدەنتتىڭ وقۋ مەن تاجىريبەنى قاتار الىپ جۇرۋىنە ۇلكەن مۇمكىندىك اشاتىن جول. بۇل جۇيە بىزدە الى دە كەنجەلەپ كەلەدى. مىسالى, كەزىندە زاۋىت-فابريكالار جاقسى جۇمىس ىستەپ تۇرعان زاماندا ستۋدەنت ۋنيۆەرسيتەتتە العان تەورييالىق بىلىمىن بىردەن ىس جۇزىندە كورسەتىپ, تاجىريبە جيناقتايتىن. وندىرىس ورنى مەن وقۋ ورنىنىڭ اراسىنداعى بايلانىس ستۋدەنتتىڭ وز ماماندىعىنا ماشىقتانىپ, كاسىبيلىگىن ارتتىراتىنى سوزسىز. قازىر كوپتەگەن ستۋدەنتتەر جازعى كانيكۋل كەزىندە داياشى, كۇزەتشى بولىپ قوسىمشا ناپاقا تاۋىپ جۇرگەنىن كورەمىز. الايدا بينارلىق بىلىم جۇيەسى دامىسا, ستۋدەنت سول اقشاسىن وز سالاسىندا تاۋىپ, بۇعان قوسا تاجىريبە دە جيناقتاۋىنا مۇمكىندىك تۋاتىن ەدى. بۇل جۇيە قازىر كاسىپتىك-تەحنيكالىق كوللەدجدەردە جاق­سى جولعا قويىلعان. ۋنيۆەرسيتەت تۇلەك­تەرى ديپلوم العاسىن ەڭبەك نارىعىندا وز ورنىن تابا الماي جاتقان جاعدايلاردى دا بايقاپ جاتامىز. مۇنىڭ بارلىعى ستۋدەنت كەزىنەن وندىرىس ورنىمەن بايلانىس ورناتىپ, ماماندىقتىڭ قىر-سىرىمەن تانىسپاعاندىقتان بولادى.
بۇگىنگى تاڭدا ەلباسىنىڭ «تسيفرلى قازاقستان» باعدارلاماسى دامىپ كەلە جاتىر. وسى ورايدا قاشىقتىقتان وقىتۋ­دىڭ ماڭىزى زور. ال يندۋستريالدىق-يننوۆاتسييالىق باعدارلامانى جۇزەگە اسىرۋ ۇشىن بينارلىق بىلىمدى دامىتۋ قاجەت. ەلباسى باستاماسىمەن قولعا الىن­عان ومىربويى بىلىم الۋ سالتىن قالىپ­تاستىرۋعا اتسالىسۋىمىز كەرەك. ەگەر كەڭەس وداعى تۇسىندا ادام بىر مامان­دىقتى يگەرىپ, ومىر بويى سول بىلىمى ازىق بولسا, بۇگىنگى زاماندا كۇندەلىكتى بىلىمىن جەتىلدىرىپ, جاڭاشىلدىقتاردان قالماي وتىرعانى ماڭىزدى.


بىزدىڭ بايلام

ەلباسى نۇرسۇلتان نازارباەۆ ار جولداۋىندا بىلىم سالاسىن جەكە بولىم رەتىندە كورسەتىپ, ينتەللەكتۋالدى ۇلت قالىپتاستىرۋدى باستى مەجە ەتىپ قويعانى بەلگىلى. ۇلتتىڭ باسەكەگە قابىلەتتىلىگىن ارتتىرۋدىڭ باستى قۇرالى سانالاتىن بىلىم بەرۋ سالاسىنىڭ دا زامان اعىمىنا قاراي جاڭارىپ وتىرۋى – زاڭدى قۇبىلىس. سوندىقتان اقپاراتتىق تەحنولوگييالىق عاسىردا سىرتتاي وقۋ تۇرىن قاشىقتىقتان وقىتۋ الماستىرسا قۇبا-قۇپ. ەندىگى ماسەلە – بىلىم ساپاسىن ارتتىرۋ نازاردان تىس قالماي, زامان تالابىنا ساي كاسىبي ماماندار دايارلاۋ. بۇل تۇرعىدا دۋالدى بىلىم بەرۋدى
دامىتۋ قاجەت-اق.


اقبوتا يسلامبەك 

بولىسۋ:

9 پىكىر جازىلعان

  1. ايدىن 7 تامىز, 2018 at 13:10 جاۋاپ

    وسى سىرتتاي وقۋدى بۇرىننان جويۋ كەرەك ەدى. ەشقانداي بىلىم دە ساپا دا جوق. تەك جەمقورلىق

  2. الىبەك 24 تامىز, 2018 at 18:01 جاۋاپ

    جالپى بىلىمدى ۋاقىتىلى جانە ناقتى الۋ كەرەك دەپ ويلايمىن. سىرتتاي وقۋ, تيڭپ-قاشىپ ديپلوم الىپ شىعۋ دەگەن سوزعو.

  3. داۋرەن 24 تامىز, 2018 at 18:01 جاۋاپ

    جالپى بىلىمدى ۋاقىتىلى جانە ناقتى الۋ كەرەك دەپ ويلايمىن. سىرتتاي وقۋ, تيڭپ-قاشىپ ديپلوم الىپ شىعۋ دەگەن سوزعو.

  4. ابىلاي 24 تامىز, 2018 at 18:01 جاۋاپ

    يا دۋمايۋ س زاچونىم وبرازوۆانيە ۆ فەرە وبرازوۆانييا ۋچاستيليس پوكۋپكا ديپلوموۆ, ستۋدەنت ي نە ۆيديت سۆوەگو ۆۋزا

  5. جانار 23 قاڭتار, 2019 at 20:26 جاۋاپ

    سىرتتاي بولگان جاكسى كولەدجدە 3 جىل تاگى ۋنيۆەردە وكيما سىرتتاي كالگانى جاكسى بالا وزي جۋمىس جاساپ سىرتتاي وكۋىن بيتيرەدي
    اتا اناگا دا كوپ كومەك بولار ەدي اري بير ۋيدە جالگىز بالا وكىمايدى

پىكىر جازۋ


*