تەڭگە نەگە قۇنسىزداندى?

1132
1
بولىسۋ:

وسى اپتادا تەڭگە قۇنسىزداندى. دوللاردىڭ تاسى ورگە دومالادى. ۇلتتىق بانك وكىلدەرى تەڭگەنىڭ السىرەۋ سەبەپتەرىن تۇسىندىردى. ۇلتتىق بانك وكىلدەرىنىڭ مالىمەتىنشە, ەركىن وزگەرمەلى ايىرباستاۋ باعامىنىڭ ساياساتى ەكونوميكادا تەڭگەرىمسىزدىكتەردىڭ جيناقتالۋىن بولدىرماۋعا مۇمكىندىك بەرەدى.

تەڭگە باعامىنىڭ ۇزاق مەرزىمدى ۇردىسىنە ىرگەلى فاكتورلار اسەر ەتەدى. نەگىزىنەن, مۇناي باعاسى, نەگىزگى ساۋدا ارىپتەس ەلدەرى ۆاليۋتالارىنىڭ باعامدارى, سونداي-اق, تولەم بالانسىنىڭ جاي-كۇيى, ينفلياتسييا دەڭگەيى, ۇلتتىق بانكتىڭ بازالىق مولشەرلەمەسى, الەمدىك پايىزدىق مولشەرلەمەلەر جاتادى.

 

«سوڭعى ۋاقىتتا فەدەرالدىق رەزەرۆتىك جۇيەسى (فرج) مونەتارلىق ساياساتىنىڭ قاتاڭداۋى اياسىندا پورتفەلدىك ينۆەستيتسييالاردىڭ اكەتىلۋىنە بايلانىستى كوپتەگەن دامۋشى نارىقتاردىڭ ۇلتتىق ۆاليۋتالارىنىڭ السىرەۋى بايقالادى. بۇل تۇرعىدان قازاقستان ەرەكشەلەنگەن جوق. سونىمەن بىرگە, باعالاردىڭ نارىقتىق كونيۋنكتۋراسى جانە ەكونوميكا وسۋىنىڭ وڭ قارقىندارى تەڭگەگە قولداۋ كورسەتتى جانە قالعان فاكتورلاردىڭ السىرەۋشى اسەرىن جۇمسارتتى, بۇل تەڭگە باعامىنىڭ اقش دوللارىنا قاتىستى سالىستىرمالى تۇردە العاندا شامالى السىرەۋىندە كورىندى» دەدى ۇلتتىق بانك وكىلدەرى. سونىمەن قاتار ەركىن وزگەرمەلى ايىرباستاۋ باعامىنىڭ قولدانىستاعى ساياساتى ەكونوميكادا تەڭگەرىمسىزدىكتەردىڭ جيناقتالۋىن بولدىرماۋعا مۇمكىندىك بەرەتىنى ايتىلادى. «شەتەلدىك ينۆەستورلاردىڭ پورتفەلدىك ينۆەستيتسييالارى قازاقستاننىڭ ۆاليۋتا نارىعىنا اسەر ەتۋ فاكتورى رەتىندە جەكە ەسكەرۋدى تالاپ ەتەدى.

 

قازىرگى ۋاقىتتا قازاقستان رەسپۋبليكاسى  باعالى قاعازدار نارىعىندا ۇلتتىق بانكتىڭ نوتتارىن ۇستاۋشى بەيرەزيدەنتتەر كولەمىنىڭ جانە ايىرباستاۋ باعامىنىڭ كەرى تاۋەلدىلىگى بايقالادى» دەدى ۇلتتىق بانك. ناۋرىزدا بايقالعان ۇستاۋشى بەيرەزيدەنتتەردىڭ ەڭ كوپ كولەمى – 453,9 ميلليارد تەڭگە (بالاماسى 1,43 ميلليارد تەڭگە  اقش دوللارى) 2018 جىلى ۇلتتىق ۆاليۋتانىڭ نىعايۋ شىڭىنا (ناۋرىزدىڭ سوڭىنداعى جاعداي بويىنشا 1 اقش دوللارى ۇشىن 318,31 تەڭگە) سايكەس كەلەدى. مامىردان باستاپ ۇستاۋشى بەيرەزيدەنتتەردىڭ ۇلەسى دامۋشى نارىقتاردان پورتفەلدىك ينۆەستيتسييالار اعىنىنىڭ جالپى ۇردىسى جانە فرج مونەتارلىق ساياساتىن قاتاڭداتۋ بويىنشا كەيىنگى كۇتۋلەر اياسىندا تومەندەي باستادى. 2018 جىلعى 30 شىلدەدەگى جاعداي بويىنشا, ۇستاۋشى بەيرەزيدەنتتەردىڭ كولەمى 158,5 ميلليارد تەڭگە (بالاماسى 0,45 ميلليارد اقش دوللارى) بولدى, سوڭعى 4 ايدا بەيرەزيدەنتتەر 900 ميلليون, اقش دوللارىنا جۋىق سوماعا باعالى قاعازدار نارىعىنان شىقتى (شىعۋ ساتىندەگى تەڭگە باعامىنىڭ ماندەرىن ەسكەرە وتىرىپ), بۇل ۆاليۋتا نارىعىنا اسەر ەتپەي قويعان جوق. رەزيدەنتتەردىڭ ەكسپورتتىق كىرىستەرىنىڭ وسۋىمەن بايلانىستى ساۋدا بالانسىنداعى ەداۋىر وڭ جاعدايعا قاراماستان, قازاقستاننىڭ تولەم بالانسىنىڭ اعىمداعى شوتى شەتەلدىك ينۆەستورلاردىڭ كىرىستەردى شىعارۋىنان تەرىس بولىپ قالۋدا. 2017 جىلى بەيرەزيدەنتتەرگە كىرىستەر تولەمدەرى 19 ميلليارد اقش دوللارىنا جۋىق بولدى.

 

«اقش مونەتارلىق ساياساتىنا كەلەتىن بولساق, فرج سارسەنبىدەگى وتىرىسىندا نەگىزگى پايىزدىق مولشەرلەمەلەردى وزگەرىسسىز قالدىردى. اشىق نارىقتار جونىندەگى كوميتەت ىلەسپە تۇسىنىكتەمەلەرىندە ەكونوميكالىق بەلسەندىلىكتىڭ ۇدەمەلى وسۋ قارقىندارى, جۇمىسسىزدىقتىڭ تومەن دەڭگەيدە ساقتالۋى جانە ۇي شارۋاشىلىقتارى مەن بيزنەستىڭ نەگىزگى كاپيتالعا ۇدەمەلى شىعىستارى (ينۆەستيتسييالار) تۋرالى بەلگى بەردى. فرج ەكونوميكا مەن ينفلياتسييانىڭ قالىپتى وسۋ قارقىندارىن ساقتاۋ ۇشىن وزىنىڭ ينديكاتيۆتىك مولشەرلەمەسىن ودان ارى بىرتىندەپ ارتتىرۋدى قايتالاپ كورسەتتى, سول ارقىلى وسى جىلعى ۇشىنشى رەت قىركۇيەكتەگى قاتاڭداتۋعا نەگىز دايىندادى. نارىق كۇتۋلەرىنە سايكەس, قىركۇيەكتە مولشەرلەمەنىڭ وسۋ ىقتيمالدىلىعى 92 پايىز, ال جەلتوقساندا قايتادان وسۋ ىقتيمالدىلىعى 73 پايىز بولدى. فرج مولشەرلەمەلەرىنىڭ وسۋى اياسىندا كوپتەگەن ينۆەستورلار بارىنشا تاۋەكەلدى اكتيۆتەردەن, اتاپ ايتقاندا دامۋشى نارىقتاردان باسىمدىقتارىن اقش قازىناشىلىق وبليگاتسييالارىنا وزگەرتۋدە. قازاقستاننىڭ الەمدىك قارجى نارىعىمەن ىقپالداستىعى جەرگىلىكتى نارىقتاعى جاعدايعا اۋقىمدى ۇردىستەر اسەر ەتپەك» دەپ مالىمدەدى دەدى ۇلتتىق بانك وكىلدەرى.

«ايقىن» اقپارات

بولىسۋ:

1 پىكىر جازىلعان

پىكىر جازۋ


*