جوعارى بىلىمدى ساربازدار انت قابىلدادى

819
0
بولىسۋ:

قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى  ۇلتتىق قورعانىس ۋنيۆەرسيتەتىندەگى اسكەري-عىلىمي ۆزۆودىنا تۇسكەن جاس ساربازدار سالتاناتتى تۇردە اسكەري انت قابىلدادى.

قازاقستان قارۋلى كۇشتەرى مەرزىمدى اسكەري قىزمەتكە العاش شاقىرىلعان جاستاردى اسكەري-عىلىمي ۆزۆود قۇرامىنا بىرىنشى رەت قابىلداپ وتىر. اسكەري-عىلىمي ۆزۆود اسكەري باسقارۋ ورگاندارى مۇددە­سىنە قولدانبالى جانە ىرگەلى زەرتتەۋ­لەر سالاسىنداعى پەرسپەكتيۆالىق عىلىمي-زەرتتەۋلەر, تاجىريبەلى-قۇراستىرۋ جانە سىناق جۇمىستارىن جۇرگىزۋ ماقساتىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتى اسكەري-عىلىمي زەرتتەۋ ورتالىعىنىڭ قۇرامىندا قۇرىلعان. جاڭادان قۇرىلعان اسكەري-عىلىمي ۆزۆود قۇرامىنا بەلگىلى بىر بىلىمى, ديپلومى بار ساربازداردى شاقىرۋ تۋرالى قورعانىس مينيسترلىگى تيىستى شەشىم قابىلداپ, تارتىبى بەكىتىلدى. ونىڭ تەتىكتەرى پىسىقتالدى. جاس ساربازداردىڭ ارقايسىسى جوعارى وقۋ ورىندارىندا وقىپ بىلىم العان, ديپ­­لومدارى بار, روبوتوتەحنيكا, اقپارات­تىق تەحنولوگييالار مەن كيبەرقاۋىپسىزدىك سال­ا­سىنداعى بىلىمدەرى بار ساۋاتتى ساربازدار.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىندە قورعانىس ۆەدومستۆوسىنىڭ باسشىسى اسكەري-عىلىمي ۆزۆود قۇرامىنا مەرزىمدى اسكەري قىزمەتكە الىنعان اسكەري قىزمەتشىلەرمەن كەزدەستى. كەزدەسۋ بارىسىندا قورعانىس مينيسترى قىسقا مەرزىمدەگى اسكەري قىزمەتكەرلەردىڭ تۇرعىن جايىمەن, الداعى ۋاقىتتا اسكەري-عىلىمي ۆزۆودتىڭ ماماندارىن تارتۋ جوس­پار­­لا­نعان عىلىمي جوبالارمەن تانىستى. قور­عانىس ۆەدومستۆوسىنىڭ باسشىسى ۋنيۆەر­سيتەتتىڭ اسكەري-عىلىمي بازاسىنىڭ دامۋى­نا باسا نازار اۋداردى. مەرزىمدىك اسكە­ري قىزمەتكە شاقىرىلىپ وتىرعان تۇڭ­عىش اسكەري-عىلىمي ۆزۆود قۇرامىنا, اسكەري عىلىمنىڭ دامۋىنا قوماقتى ۇلەس قوسۋعا جانە قازاقستان قارۋلى كۇشتەرى قاتارىندا لايىقتى قىزمەت ەتۋلەرىنە تىلەك بىلدىردى.

قايىرجان تورەجان

بولىسۋ:

پىكىر جازۋ


*