بالانى مەكتەپكە دايىنداۋ قانشا تۇرادى?

1350
0
بولىسۋ:

بىر ايدان سوڭ جاڭا وقۋ جىلى باستالادى. اتا-انالار بالاسىن مەكتەپكە دايىنداۋ قامىنا كىرىسەدى. باعاسى مەن ساپاسى ۇيلەسەتىن كيىم-كەشەك پەن قۇرال-جابدىقتاردى تۇگەندەۋ وڭاي شارۋا ەمەس. بىر بالانى مەكتەپكە كيىندىرۋ مەن قاجەتتى قۇرال-جابدىقتارىن الۋ قانشا تۇرادى? بىز دە بازار باعاسىن باعامداپ كوردىك.

جالپى, قازىرگى نارىق اركىمنىڭ قالتاسىنا قاراي تۇرلى باعانى ۇسىنادى. بىر انىعى – بيىلعى باعا بىلتىرعىمەن بىردەي ەمەس. وتكەن وقۋ جىلى بازاردان ەر بالالارعا ار­نال­عان ەڭ وتىمدى «تۋرەتسكيي» مەكتەپ فورما­سىن جاكەتىمەن 14-15 مىڭعا الۋعا بولسا, بيىل ولاردىڭ قۇنى 18 مىڭنان تۇسپەي تۇر. قىتاي استاناسىنداعى زاۋىتتان شىعاتىن مەكتەپ فورماسى – 14-15 مىڭ تەڭگەنىڭ اينالاسىندا. بىراق جىبى شىعىپ, تىگىسى قيسايىپ تۇرعان فورمانىڭ بىراز ۋاقىتتان كەيىن تۇسى وڭىپ, تۇتە-تۇتەسى شىعىپ كەتەرى انىق.
جوعارى سىنىپ وقۋشىسى فورماسىنىڭ قۇنى باستاۋىش سىنىپتىكىنە قاراعاندا قاشان دا قىمباتتاۋ بولادى. قىز بالالاردىڭ مەكتەپ فورماسىندا بەلدەمشە, شالبار, جاكەت پەن پەنجاك جۇرەتىندىكتەن, ولاردىڭ دا باعاسى بىردەي ەمەس. ماقتا-ماتالى جەيدە مەن بلۋزكالاردىڭ باعاسى 3500 مىڭ تەڭگەدەن باستالادى. ودان ارزانداۋ سينتەتيكالىق جەيدەلەر دە تۇر, بىراق تا «ارزاننىڭ جىلىگى تاتىمايتىنى» انىق.
قازاقستاندىق كومپانييالار دا مەكتەپ فورماسىنىڭ تۇرلى جيىنتىعىن ۇسىنادى.
ۇل بالانىڭ 28-34 ولشەم ارالىعىن­داعى پيدجاك-شالبارى 15 مىڭ بولسا, 36-40 ولشەمدەگى – 16 مىڭ, 42-58 ولشەم ارالى­عىن­داعى پيدجاك-شالبار – 20 مىڭنىڭ ۇستىندە. جاكەتى مەن جەيدەسىن ارقايسىسىن 4-5 مىڭ تەڭگەگە بولەك ساتىپ الاسىز. گالستۋگى 100-1500 تەڭگە. ارنايى دۇكەندەردە پيدجاگى مەن شالبارىن بولەك الۋعا دا بولادى. بىلتىر كيگەن فورماسىنىڭ ۇستى الى دە كييۋگە جاراپ تۇرسا نەمەسە اۋىستىرىپ كيەتىن شالبار كەرەك كەزدە, وسىنداي ۇسىنىستار قاجەت.
قىز بالالاردىڭ مەكتەپ فورماسى باس­تاۋىش سىنىپ وقۋشىلارى ۇشىن 20-24 مىڭنان باستالادى. جوعارى سىنىپ وقۋشىلارىنىڭ فورماسى 27-31 مىڭ تەڭگە ارالىعىندا. جەي­دەلەر مەن بلۋزكالار 3500-7000 تەڭگە تۇرادى. ناتيجەسىندە, مەكتەپ فورماسىنىڭ وزىنە 20-30 مىڭ تەڭگە كەتەدى.
تاعى بىر ايتا كەتەرلىگى, ارنايى دۇكەندەردە تاۋاردىڭ ساپا سەرتيفيكاتى بولادى. الاتىن فورماڭىز سال دە بولسا كيىس بەرەدى. وعان قوسا ەلىمىزدىڭ باس سانيتار دارىگەرى جانداربەك بەكشين مەكتەپ فورماسى گيگيەنالىق تالاپتارعا دا ساي بولۋ قاجەتتىگىن ەسكە سالعان ەدى. «فورمانىڭ سىرتقى قاباتىنىڭ قۇرا­مىن­داعى تابيعي تالشىقتار – جۇن, ماقتا, جىبەكتىڭ ۇلەسى 30 پايىزدان كەم بولماۋى تيىس. كيىمنىڭ استارى 100 پايىز تابيعي ماتادان تۇرۋى كەرەك. جەيدە مەن بلۋزكالار قۇرامى­نىڭ 65 پايىزى تابيعي ونىمنەن تۇرۋى تالاپ ەتىلەدى. بۇنداي تالاپ نە ۇشىن قويىلادى? ويت­كەنى سينتەتيكالىق تالشىقتار اۋا وتكىزبەيدى». مەكتەپ فورماسىندا بالالار كۇنى­نە كەمى 5-6 ساعات جۇرەدى. وسى ۋاقىتتا ۇس­تىن­دەگى كيىمى قىسپاي, اۋا وتكىزىپ تۇرۋى شارت.
جاڭا وقۋ جىلىنا تەك مەكتەپ فورماسى ەمەس, اياقكيىم, سپورتتىق فورما, سپورتتىق اياقكيىمدى دە الۋ كەرەك. ولاردىڭ دا باعاسى سان الۋان. بازاردان باستاۋىشتىڭ وقۋشىسىنا اياق قيىمدى 3-4 مىڭنان جوعارى الۋعا بولادى. بىراق ساپاسى سىن كوتەرمەيدى. بىر-ەكى كيىستەن سوڭ مىجىرايىپ, تۇسى كەتىپ شىعا كەلۋى مۇمكىن. ورتوپەد ماماندار اياققيىمگە اقشا ۇنەمدەمەۋگە كەڭەس بەرەدى. كيگەن كەزدە وكشە جاعىنان بالانىڭ بىر ساۋساعى سىياتىنداي كەڭىستىك قالۋى كەرەك. سال دە بولسا, ساپالى اياقكيىمدەر 15 مىڭنان جوعارى تۇرادى. سپورتتىق اياقكيىمدە سول شامادا. ال مەكتەپ­كە قاجەتتى قارىنداش-قالام, كىتاپ-داپتەر مەن سومكەنى جارمەڭكەلەردەن العان تيىمدىرەك. بالانىڭ وقيتىن سىنىبىنا قاراي, كەڭسە تاۋارلارىنا 5 مىڭ تەڭگەدەن ارتىق قارجى جۇمسالادى. مەكتەپ سومكەسىن تاڭداعان كەزدە دە ونىڭ سالماعىنا نازار اۋدارعان ابزال. مامانداردىڭ ايتۋىنشا, بوس سومكەنىڭ سالماعى 1 كەلىدەن اسپاۋى كەرەك. سونداي-اق تارتپاسى بالانىڭ يىعىن قيماي, سالماقتى بۇكىل ارقاسىنا بىردەي سالاتىنداي, نەگىزگى قاڭقاسى قاتتىلاۋ بولعانى دۇرىس. بۇگىندە بىر بالانى مەكتەپكە جيناۋ ۇشىن ۇنەمدەپ جۇرىپ, ارزانداۋىن تاڭداعان كۇننىڭ وزىندە كەمى 50-60 مىڭ تەڭگە قاجەت.

 


كەرەك كەڭەس:

1. بازارعا بارعاندا مىندەتتى تۇردە ساۋدالاسىڭىز. ساۋداگەرلەر ەشقاشان وز پايداسىنان جەلىنبەيدى.
2. سىنىپتاعى باسقا وقۋشىلاردىڭ اتا-اناسىمەن سويلەسىڭىز. بۇكىل سىنىپ بولىپ, بىر جەردەن السا, كوتەرمە باعاسى ارزان تۇسەدى.
3. قالام-قارىنداشتى مەكتەپ جارمەڭكەسىنەن العان دۇرىس.
4. دۇكەندەردىڭ ارنايى بونۋستىق باعدارلاماسىن پايدالانىڭىز. ارينە, قىزۋ ساۋدا كەزىندە ەشكىم ۇلكەن جەڭىلدىك جاسامايدى, دەگەنمەن از دا بولسا, پايدا.
5. مەكتەپ فورماسىن ەرتەرەك الۋعا ۇلگەرمەي, قالساڭىز دۇرلىكپە باسىلعانىن كۇتە تۇرىڭىز. قىركۇيەك ايىنىڭ ورتاسىنا قاراي بازارداعى ادام اياعى سيرەپ, ساتۋشىلار جەڭىلدىكتەر دە ۇسىنا باستايدى.


سامال ماكەن

بولىسۋ:

پىكىر جازۋ


*