قارجى نارىعىنداعى جاعداي تۇراقتى

556
0
بولىسۋ:

مەملەكەت باسشىسى ۇلتتىق بانك توراعاسى دانييار اقىشەۆتى قابىلدادى. كەزدەسۋ بارىسىندا نۇرسۇلتان نازارباەۆقا ۇلتتىق بانكتىڭ بىرىنشى جارتى جىلدىقتا اتقارعان جۇمىستارىنىڭ قورىتىندىلارى جونىندە ەسەپ بەردى.

قازاقستان پرەزيدەنتى قازىرگى ۋاقىتتا ۆاليۋتا-قارجى نارىعىنداعى تۇراقتىلىقتى ساقتاۋ جانە ەكونوميكانى ارى قاراي دامىتۋ ۇشىن ەلىمىزدە قاجەتتى جاعداي جاسالعانىن اتاپ وتتى.
– قازىر بىزدە ۇلتتىق ۆاليۋتا مەن ەكونوميكانىڭ تۇراقتىلىعىن قامتاماسىز ەتۋ ۇشىن مۇمكىندىكتەر بار. بىرىنشى جارتى جىلدىقتا ەكونوميكا 4 پايىزدان استام وستى. قۇبىلمالى باعامعا كوشكەنىمىز دۇرىس بولدى. بەلگىلى بىر دەڭگەيدە اۋىتقۋلاردىڭ بولاتىنىنا ۇيرەنۋ كەرەك. بۇل تۇرعىنداردىڭ ال-اۋقاتىنا اسەر ەتپەيدى, – دەدى نۇرسۇلتان نازارباەۆ.
قازاقستان پرەزيدەنتى بانك سەكتورىن ساۋىقتىرۋ ۇشىن قابىلدانعان شارالار جونىندە ايتتى.
– مەملەكەت تاراپىنان بانكتەرگە ايتارلىقتاي كومەك كورسەتىلدى. بانك جۇيەسىن قولداۋ ماقساتىمەن ۇش تريلليون تەڭگە بولىندى. سونىمەن قاتار ۆاليۋتالىق رەتتەۋ جانە ۇلتتىق بانكتىڭ قىزمەتىن جەتىلدىرۋ ماسەلەلەرى جونىندەگى زاڭنامانى قايتا قارادىق. سوندىقتان بانكتەردىڭ ەكونوميكاعا, سونىڭ ىشىندە شاعىن جانە ورتا بيزنەس سالاسىنا نەسيە بەرۋ جۇمىسىن جانداندىرۋ قاجەت, – دەدى نۇرسۇلتان نازارباەۆ.
مەملەكەت باسشىسى تۇرعىنداردىڭ سالىمدارىن ادال جۇمىس ىستەمەيتىن اكتسيونەرلەردىڭ الاياقتىق ارەكەتتەرىنەن قورعاۋ ماقساتىمەن, ۇلتتىق بانك توراعاسىنىڭ نازارىن بانك سەكتورىنىڭ جۇمىسىن رەتكە كەلتىرۋ قاجەتتىگىنە اۋداردى.
د.اقىشەۆتىڭ مالىمەتىنە سايكەس, نەگىزگى كورسەتكىشتەر بويىنشا, ەلىمىزدىڭ قارجى نارىعىندا تۇراقتى جاعداي قالىپتاسىپ وتىر.
– 2018 جىلعى ماۋسىم ايىنىڭ قورىتىندىسى بويىنشا ينفلياتسييانىڭ جىلدىق كورسەتكىشى 5,9 پايىزدى قۇرادى. بۇل – سوڭعى ۇش جىل ىشىندەگى ەڭ تومەنگى كورسەتكىش. ۇلتتىق بانك ينفلياتسييا دەڭگەيىن 2020 جىلعا قاراي 4 پايىزعا دەيىن تومەندەتۋدى كوزدەپ وتىر, – دەدى ۇلتتىق بانك توراعاسى.
د.اقىشەۆ نۇرسۇلتان نازارباەۆقا ۇلتتىق ۆاليۋتا باعامىنىڭ وزگەرۋىنە اسەر ەتەتىن نەگىزگى فاكتورلار جونىندە باياندادى.
– تەڭگە باعامىنىڭ وزگەرۋىنە اسەر ەتەتىن نەگىزگى فاكتور – قازاقستاننىڭ ساۋدا-ەكونوميكالىق نارىعىنداعى ۆاليۋتا-قارجىلىق جاعداي. ەكىنشى فاكتور – باسقا ۆاليۋتالارعا قاتىستى دوللاردىڭ بۇكىل الەم بويىنشا نىعايۋى. بۇل ورايدا, كاسىپ­ورىندار مەن تۇرعىنداردىڭ مۇنداي قۇبىلمالى باعامعا بەيىمدەلگەنىن اتاپ وتۋ كەرەك. جالپى, ەلىمىزدە شەتەلدىك ۆاليۋتاعا دەگەن سۇرانىستىڭ تومەندەگەنى بايقالىپ وتىر, – دەدى ۇلتتىق بانك توراعاسى.
كەزدەسۋ سوڭىندا مەملەكەت باسشىسى بىرقاتار ناقتى تاپسىرما بەردى.

بولىسۋ:

پىكىر جازۋ


*