قازاقتىڭ جانى

1515
0
بولىسۋ:

مەملەكەت باسشىسى بيىلعى 12 ماۋسىمدا قوعامدى ۇلتتىق مادەنيەت پەن بىرەگەيلىكتى ساقتاۋ مەن قايتا جاڭعىرتۋ يدەياسىنىڭ توڭىرەگىندە ودان ارى توپتاستىرۋ ماقساتىندا «ۇلتتىق دومبىرا كۇنى تۋرالى» قاۋلىعا قول قويدى. وندا «شىلدەنىڭ بىرىنشى جەكسەنبىسى ۇلتتىق دومبىرا كۇنى بولىپ ايقىندالسىن» دەلىندى. جارلىقتىڭ ورىندالۋىن قاداعالاۋ مىندەتى پرەزيدەنت اكىمشىلىگىنە جۇكتەلدى.
ەلباسىنىڭ وسىناۋ كورەگەن شەشىمى تۋراسىندا ەلىمىزدىڭ بىر توپ زييالى قاۋىمى نۇرسۇلتان نازارباەۆقا حات جولدادى. «سىزدىڭ جارلىعىڭىزبەن شىلدەنىڭ بىرىنشى جەكسەنبىسى «ۇلتتىق دومبىرا كۇنى» رەتىندە بەكىتىلدى. بۇل كورەگەن شەشىم قاستەرلى قارا دومبىرامىزدىڭ مارتەبەسىن بيىكتەتىپ, ۇلت مۇراسىنىڭ ابى­رويىن اسقاقتاتتى. قازاق حالقىمەن بىرگە جاسا­سىپ كەلە جاتقان ۇلتتىڭ قوڭىر ۇنى – دومبى­را­نىڭ قايتا جاڭعىرۋ داۋىرى باستالدى دەپ بىلەمىز. شامىرقانعان ماحامبەت, تولعانعان اباي, جىر توككەن جامبىلدى دومبىراسىز ەلەستەتۋ استە مۇمكىن ەمەس. دومبىرا – قازاقتىڭ جاۋىنا قارۋ, جانىنا دارۋ ەتكەن جان سەرىگى. ۇلت اسپا­بىنا ارنايى كۇنتىزبەدەن ورىن بەرىلۋىن ەل ەرەكشە ىقى­لاسپەن قابىلدادى» دەلىنگەن حاتتا.
مەملەكەت باسشىسى «بولاشاققا باعدار: رۋحاني جاڭعىرۋ» باعدارلامالىق ماقا­لاسىندا «ۇلتتىق جاڭعىرۋ ۇعىمىنىڭ وزى ۇلتتىق سانانىڭ كەمەلدەنۋىن بىلدىرەدى. ونىڭ ەكى قىرى بار: بىرىنشىدەن, ۇلتتىق سانا-سەزىمنىڭ كوكجيەگىن كەڭەيتۋ. ەكىنشىدەن, ۇلتتىق بول­مىستىڭ وزەگىن ساقتاي وتىرىپ, ونىڭ بىرقاتار سيپاتتارىن وزگەرتۋ» دەپ جازدى. وسىناۋ قازاقتىڭ قىلىشتان وتكىر, قۇرىشتان بەرىك ارنالى اسپابىن ۇلىقتاۋ, دومبىرا داۋىرىن قايتا جاڭعىرتۋ ۇلتتىق بولمىستىڭ وزەگىن ساقتاۋعا باعىتتالعانداي. وسى تۋراسىندا حاتتا «ۇلت جادىنىڭ تۇعىرناماسى بولعان «رۋحاني جاڭعىرۋ» ماقالاڭىزدان كەيىن ۇلت ونەرى ەرەكشە قامقورلىققا الىنىپ, باستاماڭىز كەزەڭ-كەزەڭىمەن جۇزەگە اسىرىلۋدا. سونىڭ بىر دالەلى – ۇلتتىق دومبىرا كۇنى. بۇل مەرەكەنىڭ وسكەلەڭ ۇرپاققا بەرەر تاعىلىمى مول بولادى دەپ سەنەمىز. ماسەلەن, «رۋحاني جاڭعىرۋ» اياسىندا ەكىنشى رەت ۇيىمداستىرىلعان «مەن قازاقپىن» مەگاجوباسى سىزدىڭ ۇلت ونەرىنىڭ ناسيحاتىنا باعىتتالعان باستا­ماڭىزدى ودان ارى جالعاستىرىپ, ونەرلى جاستاردى ناسيحاتتاپ, ۇلت ونەرىن دارىپتەيدى» دەپ جازىپتى زييالى توپ.
حاتقا ەلىمىزدىڭ ونەرى مەن مادەنيەتىنە ەڭبەك سىڭىرگەن حالىق ارتيستەرى مەن قايرات­كەرلەرى قول قويعان. انشى, پروفەسسور قايرات بايبوسىنوۆ, انشى-جىرشى بەكبولات تىلەۋحان مەن ۇلجان بايبوسىنوۆا, داستۇرلى انشىلەر رامازان ستامعازيەۆ, تولعاناي سەمباي, ايگۇل قوسانوۆا, كۇيشىلەر جانعالي جۇزباي, جارقىن شاكارىم مەن ايگۇل ۇلكەنباەۆا, قوبىزشى القۋات قازاقباەۆ, تەر­مەشى ايگۇل ەلشىباەۆا مەن ارداق بالاجانوۆا, ۇلتتىق ارنانىڭ باسقارما توراعاسى ەرلان قارين, سونداي-اق «مەن قازاقپىن» جوباسىنىڭ اۆتورى قۋانىش سۇلەيمەنوۆ قۇرمەتپەن ىقىلاس, ايرىقشا العىسىن بىلدىرگەن. «قازاقتىڭ ان-كۇيىن ناقىشىنا كەلتىرە ورىنداپ, جانىڭىزعا ازىق ەتۋمەن ۇلت ونەرىن ۇلىقتاۋدا ەڭبەگىڭىز ايرىق­شا. وسى رەتتە ۇلت ونەرىنىڭ العى ساپىندا جۇرگەن بارلىق ونەرپازدىڭ اتىنان جانە قالىڭ بۇقارا حالىقتىڭ اتىنان ۇلتتىق اسپابىمىز – قوس ىشەكتى دومبىراعا كورسەتكەن ەرەكشە ىقى­لاسىڭىزعا ايرىقشا العىس بىلدىرەمىز!» دەپ اياقتالادى العىسحات. مادە­نيەت پەن ونەر ەليتاسى بۇل كۇننىڭ قوعامدى ۇلتتىق جاڭعىرۋ يدەياسىنا توپتاستىراتىنا سەنىم دە بىلدىرىپتى.

ايدانا نۇرمۇحان

بولىسۋ:

پىكىر جازۋ


*