پرەزيدەنت تۇركىستان وبلىسىن قۇرۋ تۋرالى جارلىققا قول قويدى

1052
0
بولىسۋ:

پرەزيدەنت نۇرسۇلتان نازارباەۆ وڭتۇستىك قازاقستاننىڭ ورتالىعىن تۇركىستانعا اۋىستىرۋ تۋرالى جارلىققا قول قويدى, دەپ حابارلايدى Baq.kz اقپارات اگەنتتىگى اقوردانىڭ باسپاسوز قىزمەتىنە سىلتەمە جاساپ.

مەملەكەت باسشىسى جارلىققا قول قويۋ راسىمى كەزىندە استانا جانە الماتىمەن قاتار شىمكەنتتىڭ تۇرعىندار سانى 1 ميلليوننان ادامنان اساتىن قازاقستاندىق قالالار قاتارىنا كىرگەنىن ايتتى.

«قازاقستان رەسپۋبليكاسى اكىمشىلىك-تەرريتورييالىق قۇرىلىمى تۋرالى» زاڭنىڭ 3-بابى 1-تارماقشاسىنا سايكەس بۇگىن مەن قول قويىپ وتىرعان جارلىق شىمكەنتتىڭ رەسپۋبليكالىق مارتەبەسىن بەكىتەدى. بۇل اكىمشىلىك بىرلىك ەلىمىزدىڭ 17-ايماعى بولادى. وبلىس ورتالىعى عاسىرلار بويى قازاق حاندىعى مەن تۇركى الەمىنىڭ ساياسي جانە رۋحاني ومىرىنىڭ جۇرەگى بولىپ كەلگەن تۇركىستان قالاسى بولادى», – دەدى قازاقستان پرەزيدەنتى.

نۇرسۇلتان نازارباەۆ جاڭا قۇرىلعان تۇركىستان وبلىسى جاڭا اكىمشىلىك مىندەتتەردى ساپالى ىسكە اسىرۋعا قاجەتتى مۇمكىندىكتەردىڭ بارلىعىنا يە ەكەنىن ايتتى.

پرەزيدەنت سونىمەن قاتار, جاڭا شەشىمنىڭ تاريحي ماڭىزىنا دا توقتالدى.

«شىمكەنت ينۆەستيتسييالار, تەحنولوگييالار جانە ينتەللەكتۋالدىق رەسۋرستاردى بىزدىڭ ەلگە عانا ەمەس, تۇتاس ورتالىق ازييا ايماعىنا تارتاتىن جاڭا ورتالىق بولادى. بۇعان قاجەت بارلىق شارتتار مەن الەۋەت بار», – دەدى نۇرسۇلتان نازارباەۆ.

مەملەكەت باسشىسى شىمكەنتتىڭ رەسپۋبليكالىق مارتەبە يەلەنۋى ونىڭ ارى قاراي دامۋىنا جاعداي جاساپ, قالاعا جاڭا دا ايرىقشا مۇمكىندىكتەر اشاتىنىنا سەنىمدى ەكەنىن ايتتى.

«بۇل قادام قالانىڭ قالىپتى الەۋمەتتىك-ەكونوميكالىق جاڭعىرۋىنا تۇراقتى سەرپىن بەرىپ, بۇكىل ايماق تۇرعىندارىنىڭ ومىر ساپاسىن جاقسارتۋعا جاعداي جاسايدى», – دەدى پرەزيدەنت.

قول قويۋ راسىمى سوڭىندا مەملەكەت باسشىسى پرەزيدەنت اكىمشىلىگىنە, ۇكىمەتكە جانە وبلىس اكىمدىگىنە جارلىقتى ساپالى ارى جەدەل ىسكە اسىرۋ جانە جەرگىلىكتى مەملەكەتتىك ورگاندار مەن ۇيىمداردىڭ تۇراقتى ارى تيىمدى جۇمىسىن قامتاماسىز ەتۋ جونىندە ناقتى تاپسىرمالار بەردى.

بولىسۋ:

پىكىر جازۋ


*