رونالدۋ الەم چەمپيوناتىنداعى العاشقى حەت-تريكتى جاسادى (ۆيدەو)

1415
0
بولىسۋ:

15 ماۋسىم كۇنىنە جوسپارلانعان كەزدەسۋلەردىڭ نۇكتەسىن پورتۋگالييا مەن يسپانييا قويدى. ماتچتىڭ تارتىستى وتەرىنە ەشكىم دە كۇماندانباعان جانە سولاي بولدى دا.

العاشقى مينۋتتاردان-اق قوس ۇجىمنىڭ دا دەڭگەيلەس ەكەنى, تورەشىنىڭ سوڭعى ىسقىرىعى شالىنعانشا ەنتىكپەي وينايتىندارى انىق بايقالعان. ماتچتاعى ەسەپتى كريشتيانۋ رونالدۋ 4 مينۋتتا پەنالتيدەن اشتى. ونى ايىپ الاڭىندا «رەالداعى» كوماندالاسى ناچو شالىپ جىققان بولاتىن. بىراق 24 مينۋتتا يسپانييا قۇراماسىنىڭ شابۋىلشىسى ديەگو كوستا ەسەپتى تەڭەستىرىپ كەتتى. وسىدان سوڭ 44 مينۋتتا رونالدۋ تاعى دا مەرگەندىگىمەن كوزگە تۇسىپ, كومانداسىن العا شىعارعان. الايدا ديەگو كوستا 55 مينۋتتا  دۋبلگە دۋبلمەن جاۋاپ بەردى. ەسەپ 2:2. ارادا 3 مينۋت وتكەندە ناچو ويىننىڭ العاشقى ساتىندەگى قاتەلىگىن تۇزەپ, الىستان رۋي پاتريسيۋ قاقپاسىن دال كوزدەدى. دەگەنمەن ويىننىڭ بۇكىل قىزىعى 88 مينۋتتا تۇر ەكەن. كريشتيانۋ رونالدۋ ايىپ الاڭىنىڭ سىرتىنان ايىپ دوبىن تەۋىپ, داۆيد دە حەاعا ەشقانداي مۇمكىندىك قالدىرعان جوق.

وسىلايشا, رونالدۋ بۇل الەم چەمپيوناتىنىڭ العاشقى حەت-تريگىن جاسادى. تيىسىنشە تورت الەم چەمپيوناتىندا قاتارىنان گول سوققان بىرەگەي فۋتبولشى اتاندى. بۇعان دەيىن ونداي اتاققا ۋۆە زەەلەر, پەلە جانە ميروسلاۆ كلوزە قول جەتكىزگەن بولاتىن.

رونالدۋ 8 ىرى تۋرنيردە قاتارىنان گول سوعىپ كەلە جاتقان بىرەگەي ويىنشى: ەۋرو-2004, اچ-2006, ەۋرو-2008, اچ-2010, ەۋرو-2012, اچ-2014, ەۋرو-2016, كونفەدەراتسييا كۋبوگى-2017 جانە اچ-2018.

اباي ايماعامبەت

بولىسۋ:

پىكىر جازۋ


*