نۇر كەلبەتتى استانا

1495
0
بولىسۋ:

12 ماۋسىم كۇنى ۇلتتىق مۋزەيدە مادەنيەت جانە سپورت مينيسترلىگىنىڭ باستاماشى بولۋىمەن استانانىڭ 20 جىلدىق مەرەيتويىنا ارنالعان «نۇر كەلبەتتى استانا» اتتى كوركەمسۋرەت كورمەسى اشىلدى. كورمەدە باس قالامىزدىڭ اسەم كەلبەتىن كەسكىندەگەن الەمدىك سۋرەتشىلەردىڭ تۋىندىسى قويىلماق. شارا اياقتالعان سوڭ, كوپشىلىك نازارىنا ۇسىنىلعان بارلىق سۋرەت  ۇلتتىق مۋزەيدىڭ قورىنا تابىستالادى. 
كورمەگە اقش, برازيلييا, رەسەي, جاپو­نييا, ۇندىستان ەلدەرىنەن كەلگەن قىلقا­لام شەبەرلەرىنىڭ تۋىندىلارى قويى­لىپتى. ونەرلەرىنە الەم جۇرتشى­لىعى تانتى بولعان الەكساندرا كوننور (ۇلىبريتانييا), دجوۆاني توماسسي (يتالييا), جيزەل ۋليسس (برازيلييا), يگور دۋبوۆوي (رەسەي), ماركو زۋباك (حور­ۆا­تييا), ادىلبەك بايتەرەكوۆ (قىرعىز­ستان) سەكىلدى شەبەرلەر استانانىڭ كوركەم بەينەسىن وز قييالدارىمەن توعىستىرىپ, تاماشا تۋىندىلاردى ەل نازارىنا ۇسىن­عان. شەتەلدىك سۋرەتشىلەردەن بولەك, قازاق­ستاندىق امانگەلدى كەنەنباەۆ, نۇر­بازار قوجين, قايىر ورازعاليەۆ, اينابەك وسپانوۆتاردىڭ دا سۋرەتتەرى كورمە تورىنەن ورىن العان.
شارانىڭ ماقساتى – كورمە قوناق­تا­رىن استانامىزدىڭ 20 جىلدىق تاريحىمەن تانىس­تىرۋ, شاھاردىڭ تاريحي-مادەني جەتىستىكتەرىن پاش ەتۋ. سۋرەتشىلەردىڭ قييالى سان تاراپتى شارلاعان. استانانىڭ ارحيتەكتۋرالىق انسامبلدەرىن, ونەر مەن بىلىم وشاقتارىن بەينەلەگەندەر دە بار. ەندى بىرى دەمالىس ورىندارىن, گۇلزار مەن ساياباقتى تاقى­رىپتارىنا ارقاۋ ەتىپتى. ادەتتەگى نۇسقادان اۋىتقىپ, قييالى مەن ەلوردانىڭ كوركەم بەينەسىن ۇيلەستىرە وتىرىپ, جاڭاشا باعىتتا سۋرەت ۇسىنعان قاتىسۋشىلار دا بارشىلىق. ەڭ باستىسى, فەستيۆالگە كەلگەن كورەرمەن شىعار­ما­شىلىق كورمەدەن ەرەكشە اسەر الىپ, مەرەيلەنىپ قايتپاق. فەستيۆال قوناق­تا­رى­­نىڭ اراسىندا – ايگىلى لۋۆر مۋزەيىنە دە تۋىن­دىلارى قويىلعان مەيماندار بار. ولاردىڭ قازاق جەرىنە اياق باسۋى ارينە, ۇلكەن قۇرمەتتىڭ بەلگىسى. ادەتتە, قول جەتە بەرمەيتىن قىلقالام شەبەرلەرىنىڭ قازاق­ستان­عا كەلگەنىن پاي­دالانىپ قالعان ۇيىم­داس­تىرۋشىلار, قوناقتاردىڭ قاتىسۋىمەن وقۋشىلار سارايىندا جانە «شابىت» ۋنيۆەرسيتەتىندە ارنايى شەبەرلىك ساباق­تا­رىن دا وتكىزبەك. كوركەمسۋرەت ونەرىنە قىزىعاتىن دارىندى تالىمگەرلەر ۇشىن بۇل ارينە تاپتىرماس مۇمكىندىك.
– اۋەجايدان شىعا سالا ەڭ بىرىنشى نازارعا ىلىككەنى – جاپ-جاسىل كەڭ دالا. تابيعاتى تاماشا ەكەن. استانا – بولاشاق قالاسى دەپ اۋىز تولتىرىپ ايتۋعا بولادى. ەگەر مەن جاپونييادا تۋماسام جانە قالانى تاڭداۋ مۇمكىندىگى وزىمە بەرىلسە, استانادا دۇنيەگە كەلۋىمدى قالاۋشى ەدىم, – دەيدى جاپون سۋرەتشىسى اكيرا مۋراتا.
ۇلىبريتانييالىق سۋرەتشى الەك­ساندرا كوننوردىڭ ايتۋىنشا, ونى قازاق­تار­دىڭ تۇرمىس-تىرشىلىگى, ەتنيكالىق نەگىز­دەگى سالت-داستۇرى قاتتى قىزىقتىرعان. «ۇشاردىڭ الدىندا بىر اپتا بۇرىن ۇستىمدەگى بەشپەتتى كورىپ قالىپ, ويلان­باس­تان ساتىپ الدىم. مۇنى قازاققا دەگەن قۇر­مەتىم دەپ ەسەپتەڭىز. سونداي-اق بۇركىت­شى­نىڭ سۋرەتىن سالا باستادىم. جالپى, تۋىندىلارىمنىڭ باسىم بولىگىن تاريحقا ارناعىم كەلەدى» دەيدى ول.

اباي ايماعامبەت

بولىسۋ:

پىكىر جازۋ


*