ەرىكتىلەر توبى مارپاتتالدى

793
0
بولىسۋ:

مەملەكەتتىك رامىزدەر كۇنىنە وراي «نۇر وتان» پارتيياسى ماڭعىستاۋ وبلىستىق فيليالى «اقتاۋ قالاسىنىڭ قايىرىمدى جاندارى» ەرىكتىلەر توبىن ماراپاتتادى. وڭىردەگى مۇقتاج, از قامتىلعان, مۇمكىندىگى شەكتەۋلى ازاماتتارعا ەرىكتى تۇردە قول ۇشىن بەرىپ جۇرگەن 16 ادامعا سىي-قۇرمەت كورسەتىلدى.
«نۇر وتان» ماڭعىستاۋ وبلىستىق فيليالى توراعانىڭ بىرىنشى ورىنباسارى نۇري تۋمىشەۆ ەرىكتىلەر توبىنا جىلى لەبىزىن بىلدىردى.
– سىزدەردىڭ ازاماتتارعا كورسەتكەن شىنايى قامقورلىقتارىڭىز بەن ەلىمىزدىڭ الەۋمەتتىك ماسەلەسىنە قوسقان ۇلەستەرىڭىزدى وتان الدىنداعى پاتريوتتىقتىڭ بورىش دەپ بىلەمىز.
«پاتريوتيزم – كىندىك قانىڭ تامعان جەرىنە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى» دەپ ەلباسى ن. ا. نازارباەۆ اتاپ وتكەن بولاتىن. بىز «بولاشاققا باعدار: رۋحاني جاڭعىرۋ» باعدارلاماسىنىڭ جاڭعىرۋ جولىنداعى جاستارعا رۋح پەن جىگەر بەرەتىن, وزگە جاستارعا ۇلگى بولاتىن قادامدارىڭىزدى قۇرمەتتەيمىز! – دەدى ول.
«اقتاۋ قايىرىمدى جاندار» توبىنىڭ جەتەكشىسى ناعيما تۇركمەنباەۆا ەرىكتىلەر توبىنىڭ ماقساتى جونىندە جونىندە ايتىپ بەردى.
– قايىرىمدىلىق توبىنىڭ باستى ماقساتى – ەلىمىزدە قارتتار ۇيى مەن جەتىم بالالار ۇيىنىڭ بولماۋىن, قوعامدا از قامتىلعان وتباسىلاردىڭ سانىن ازايتىپ, ادامدار اراسىندا سىيلاستىق, كىشىپەيىلدىلىك ورناتۋ. جۇمىسىمىزدى وسىدان ەكى جىل بۇرىن باستادىق. ەرىكتىلەر توبىندا ار تۇرلى جاستاعى ازاماتتار, كاسىپكەرلەر, ستۋدەنتتەر, انالار بار. وسى ۋاقىتقا دەيىن وتاسىنا قارجى تالاپ ەتىلەتىن بالالارعا, باسپاناسى جوق وتباسىلارعا, مەكتەپ جاسىنداعى بالالاردىڭ كيىمدەرىن بۇتىندەۋگە كۇش جۇمساپ كەلەمىز. ماسەلەن, جەتىبايدا كولىك اپاتىنا تۇسكەن بالانىڭ 4-5 وتاسىنا جەتەتىندەي ەتىپ, 10 كۇننىڭ ىشىندە 4,5 ملن تەڭگە جيناپ بەردىك. وسىنداي بالالاردىڭ ساۋىعۋىنا قاراجات بولىپ, ولاردىڭ تولىق جازىلىپ كەتۋىن باقىلاپ وتىرامىز. مۇجالسىز وتباسىلاردان شىققان بالالارعا ارناپ «ارمانىڭ ورىندالسىن, بالاقاي!» اتتى اكتسييا ۇيىمداستىرىپ, مەكتەپكە باراتىن كەرەكتى زاتتارمەن قامتاماسىز ەتتىك. ولاردىڭ تىزىمىن مەشىتتەن جانە جۇمىسپەن قامتۋ ورتالىعىنان الامىز. ونىمەن قوسا مۇمكىندىگى شەكتەۋلى بالالار تاسادا قالماسىن دەپ «جۇلدىزدى سات» دەگەن شارا وتكىزدىك. وندا بالالار وز ونەرلەرىن ورتاعا سالادى, – دەگەن ناعيما تۇركمەنبايقىزى بولاشاق جوسپارلارىمەن دە بولىستى.
«اقتاۋ قايىرىمدى جاندار» تورايىمى توپتىڭ اعىمداعى جىلدىڭ تامىز ايىندا تۇركىستان قالاسىندا وتەتىن سلەتكە قاتىسىپ, رەسپۋبليكا كولەمىندە قايىرىمدىلىق شارالارىن ۇيىمداستىراتىنىن ايتتى.

جولداسبەك دۋاناباي

بولىسۋ:

پىكىر جازۋ


*