МИНИСТРЛІК МЕНИНГИТТІ МІСЕ ТҰТПАЙ ТҰР

1033
0
Бөлісу:

Менингококк инфекциясынан 12 адам қайтыс болып, 7 науқас жансақтау бөлімінде жатыр. Сондай-ақ жыл басынан бері елімізде аталған ауруды жұқ­тыр­ған 58 науқас тіркелген. Бұл туралы  Денсаулық сақтау министрі Елжан Бір­танов Орталық коммуникациялар қызметінде өткен баспасөз мәслихатында мә­лімдеді.

Менингококк инфекциясынан Ал­маты қаласы мен Алматы облысының тұр­ғындары көп зардап шегуде. Мысалы, Ал­маты облысында 19 жастағы қыз ме­нин­гококк инфекциясынан көз жұмған бо­латын. Ал оның алдында Алматыда 5 жа­сар бала менингиттің салдарынан қай­тыс болды. Министрдің айтуынша, ба­ла аурудың бірден асқынатын түріне шал­дыққан.
– Балаға қатысты оқиғада жақындағы Талғар ауруханасына жеткізу талпынысы болды. Алайда сәбидің анасы өзі Алма­тыға бағыт алып, сол жерден жедел жәр­дем шақыртты. Осы орайда қанша уақыт жоғалғандығы айқын көрініп тұр. Ал оның туысқанына қатысты оқиғаға тоқ­тал­сақ, аталған әйелдің сөзі бойынша нау­қасты Талғардан Қаскелеңге жеткіз­бек болған. Осы жағдай бойынша біз тексеру жүргіземіз. Егер де заңбұзу­шы­­лық­тар болса, құқық қорғау орган­дары да тиісті шараларды атқарады. Сонымен бір­ге, Алматы қаласы про­кура­турасы қол­­даныстағы стандарт­тардың орын­далуы­на қатысты тексеру­ді бастады. Сон­дықтан да тергеу ша­ралары таяуда ғана басталғандықтан, нақ­ты нәти­же­лер­ді қазір айта алмай­мын, – дейді ол.

КАРАНТИН НЕГЕ ЖАРИЯЛАНБАЙДЫ?
Сондай-ақ министр менингитке шал­дыққан жағдайда өздігінен ем қол­дан­бауға шақырды. Өйткені өздігінен ем алу қауіпті инфекциядан құтылуға мүм­кін­дік бермейді.
– Адамдардың өлімімен аяқталған оқи­ғаның көпшілігінде науқастар ма­мандардың көмегіне тым кеш жүгін­ген. Біз менингит белгілері пайда болған ке­зде дереу медициналық қызметкер­лер­ге хабарласу керектігін қайталап ке­ле­міз. Денсаулық сақтауға, вакци­на­лау­ға түрлі көзқарастар болуы мүмкін, алайда осы жағдайда кері салдарға жол бер­мес үшін бас мамандардың ұсынысын орын­дауды өтінемін. Инфекция жыл бойы болады. Бұның барлығы біз үшін стан­дартты жағдай, сәйкесінше біз дәрі­гер­лердің стандартты нұсқауларын орын­дауды талап етеміз. Осы орайда өзін-өзі емдеумен немесе тексерілмеген ем-дом түрлерімен айналысқан дұрыс емес, – деді министр.
Қазіргі таңда қоғамда аталған ауру­дан зардап шеккен азаматтардың саны артып, жұрт үрейде отыр. Сондықтан да көп­шілік менингококк инфекциясына байланысты карантин жариялануы ке­рек деген пікірде. Алайда Елжан Бір­та­нов болса, карантин жариялаудың қа­же­ті жоқ дейді. Нақтырақ айтсақ, ол дә­рі­герлердің айтқан кеңестеріне құлақ асу керек екенін айтады.

МИНИСТР ВАКЦИНА ЕГУДІҢ ҚАЖЕТІ ЖОҚ ДЕЙДІ

Сондай-ақ жұртты «Министрлік ауру­ға қар­сы вакцина неге екпей отыр?» деген сұ­рақ мазалап отыр. Ел­жан Біртановтың ай­туын­ша, Ден­сау­лық сақтау министрлігі ме­нингитке қарсы вакциналау шарасын жүр­гіз­бейді.
– Біз қажетті эпидемиологиялық және ме­дициналық көмекті ұйым­дас­тыру жұ­мыс­тарын барша өңірлер бойын­ша қам­ты­дық. Өткен аптада ме­нің бұйрығыммен ар­найы респуб­ли­калық штаб құрылды, со­нымен қа­тар әр облыс негізінде өңірлік штаб­­тар да жасақталды. Біз күн сайын бар­лық ақпараттарды үйлестіреміз. Елі­­міздің нормативтік-құқықтық база­сына сәйкес, вакциналау туралы ше­шімді инфекциялар бойынша ұлт­тық үйлестіру консультативтік ко­митеті қабылдайды. Өткен аптада осы комитеттің отырысы өтті. Оның құра­мына барлық инфекционистер мен эпидемиологтар кіреді. Олар вакци­налау туралы шаралар қазір ерте деген шешім қабылдады. Сәйкесінше, екпелердің ұлттық күнтізбесіне ме­нингит бойынша вакциналауды ен­гізудің қажеттігі жоқ. Бұл өз кезегінде тиімсіз болады, – дейді ол.
Министрдің айтуынша, ме­нин­гококк бактерияларының түрлері үшін көптеген вакцина бар. Жал­пы, олардың екеуі пайдаланылып ке­леді, қазіргі кезде оның ішінде бі­реуі Қазақ­станда тіркелген. Министр­дің атап өтуінше, вакциналарды тіркеу фарма­цев­тикалық компания­лард­ың өтінімі бойынша іске асады. Қа­жет болған жағдайда, бұл препа­рат­тар бірден кіргізіліп, вакциналау бас­та­лады.
– Ауруға шалдығудың екі кезеңі бар. 100 мың тұрғынға шаққанда апта­сы­на үш оқиға тіркелсе, штаб құру бас­талады. Бүгінде бізде бұл деңгей екі есеге төмен. Яғни, біз профи­лакти­ка­лық, алдын алу шараларын ерте бастадық. Вакциналау мәселесі 100 мың адамға шаққанда аурудың 10 оқи­ғасы тіркелген кезде көтеріледі. Сәй­кесінше, ауруға шалдығу деңгейі жеті есе­ге төмен. Сондықтан вакци­на­лау ша­­­ралары бойынша мәселе көтерілген жоқ, – дейді ол.

4 136 АДАМҒА ВАКЦИНА ЕГІЛДІ

Алайда министр менингитке шал­дық­қандармен байланыста болған 4 мың­нан астам адамға антибиотиктік про­филактика жүргізіліп жатқанын айта­ды. Сондай-ақ ол баға­сының шарықтауына жол бермеу ша­раларын қабылдап жатқанын атап өтті.
– Қоғамдық денсаулық сақтау ко­митеті қызметкерлері менингитке шал­дыққандармен байланыста болған адам­дарды барша өңірлерде анықтап жа­тыр. Бүгінде 4 136 адам анықталды. Бұл – адамдар науқастармен күніне 3 с­а­ғат және одан артық мерзімде бай­ла­ныста болғандар. Олардың барлығы антибиотиктік профилактикамен қамтылған. Шыны керек, аталған адам­дарды кей кезде анықтау оңайға түс­пейді. Қазіргі кезде барша қажетті жұ­мыстар жүргізілді және біздің са­нитарлық қызмет ол адамдарды анық­тады. Екпе құны қымбаттау, яғни ол қым­бат фармацевтикалық өнім ретін­де белгілі. Бүгінде дәрі-дәрмектің ба­­ғасы шарықтамауы үшін тиісті ша­ра­ларды атқарып жатырмыз, – дейді ол.
Министрдің мәліметінше, әске­ри­лер, студенттер мен балалар арасында вак­циналау басталған жоқ. Себебі, Ден­саулық сақтау министрлігі бұл ше­шімді қолдамайды. Белгілі болған­дай, вакцина бүгінде бөлшек желіде емін-еркін саудаланып жатыр. 330 адам менингитке қарсы өз еркімен ек­пе салдырған.
Айналасы бір айдың ішінде ме­нин­гиттен 12 адам көз жұмып, 7 адам­ның жан сақтау бөлімінде жатуы – жақ­сылықтың белгісі емес. Алайда Ден­саулық сақтау министрлігі ме­нин­гитті місе тұтпай, мәселеге жүрдім-бар­дым қарап отырған тәрізді.

 

Серік ЖОЛДАСБАЙ

Бөлісу:

Пікір жазу


*