ەلباسىنىڭ تۇلەكتەرگە تىلەگى

1544
0
بولىسۋ:

قازاقستان وسى جۇزجىلدىقتا 20 مىڭ جىلعا بارا-بار وركەندەۋ جولىن جۇرىپ وتۋى كەرەك. بۇل تۋرالى نازارباەۆ ۋنيۆەرسيتەتى تۇلەكتەرىنىڭ IV وقۋ بىتىرۋ سالتاناتتى راسى­مىنە قاتىسقان ەلباسى نۇرسۇلتان نازارباەۆ مالىم ەتتى.

راسىمگە قاتىسۋشىلارعا ارنالعان سو­زىندە ەلباسى بيىل بۇكىل ەلىمىز بويىنشا 140 مىڭنان استام ستۋدەنت جوعارى وقۋ ورنىن بىتىرىپ, ديپلوم الاتىنىن اتاپ وتتى.
– بۇگىن بىز قازاقستاننىڭ ەڭ ۇزدىك وقۋ ورنىنىڭ تۇلەكتەرىنە اق جول تىلەۋ ۇشىن جينالىپ وتىرمىز. نازارباەۆ ۋنيۆەر­سيتەتىنىڭ تورتىنشى جىلعى بىتىرۋشىلەرىن جانە ەلىمىزدەگى بارلىق وقۋ ورىندارى­-نىڭ تۇلەكتەرىن شىن جۇرەكتەن قۇتتىق­تايمىن! – دەدى پرەزيدەنت.
نۇرسۇلتان نازارباەۆ بىلىم ەكونومي­كاسى مەن يننوۆاتسييالىق دامۋدى قالىپ­تاستىرۋ ىسىندەگى زەرتتەۋ ۋنيۆەر­سيتەتتەرىنىڭ رولى مەن ماڭىزىن ەرەكشە اتاپ وتتى. سون­داي-اق قىسقا مەرزىم ىشىندە ۋنيۆەرسيتەت جاڭارۋدىڭ سيمۆولىنا جانە ەلىمىزدىڭ عىلىمي-زەرتتەۋ, يننوۆاتسييالىق جانە كادر­لىق الەۋەتىنىڭ وسۋ ورتالىعىنا اينالعانىن ايتتى.
– نازارباەۆ ۋنيۆەرسيتەتىنىڭ عا­لىمدارى حالىقارالىق رەيتينگى جوعارى باسىلىمداردا 1700-دەن استام ماقالا جارييالادى. 36 پاتەنت الىندى. كورپو­راتيۆتى دەمەۋشىلەر عىلىمي زەرتتەۋلەرگە 40-تان استام گرانت بولدى. ۋنيۆەرسيتەت يننوۆاتسييالىق كلاستەردى تابىستى قا­لىپتاستىرۋدىڭ نەگىزى بولدى. عىلىمي-تەح­نيكالىق قىزمەت ناتيجەلەرىن كوم­مەرتسييالاندىرۋ اياسىندا 21 جوبا قولداۋعا يە بولدى, – دەدى ەلباسى.
مەملەكەت باسشىسى ۋنيۆەرسيتەتتىڭ ودان ارى تابىستى دامۋى ەلىمىزدىڭ ادامي كا­پيتالىنىڭ ارتۋىنا سەپتىگىن تيگىزىپ, قا­زاقستاندا بۇكىل ورتالىق ازييا وڭىرى اۋ­قىمىنداعى تولىققاندى بىلىم بەرۋ حا­بىن قالىپتاستىرۋعا مۇمكىندىك بەرە­تىنىن ايتتى.
نۇرسۇلتان نازارباەۆ قويىلعان مىن­دەت­­تەردى ىسكە اسىرۋ ۇشىن وسى جوعارى وقۋ ورنىنا الدىڭعى قاتارلى زيياتكەرلىك جانە عىلىمي رەسۋرستاردى جۇمىلدىرۋ, وندىرىس پەن كاسىپكەرلىكتىڭ يننوۆاتسييالىق مادە­نيە­تىنە باعىتتالعان وقۋ باعدارلاما­لارى­نا بەت بۇرۋ, سونداي-اق قاشىقتىقتان بىلىم بەرۋ پلاتفورماسىن دامىتۋ ارقىلى ۋني­ۆەر­سيتەت جۇمىسىن جانداندىرۋدى تاپسىردى.
– ۋنيۆەرسيتەت ەلىمىزدىڭ عانا ەمەس, سونداي-اق الىس جانە جاقىن شەتەلدەردىڭ وقىمىستىلارىن تارتاتىن ورتالىققا, جاستاردىڭ جوبالارىن بىرلەسە جۇزەگە اسىراتىن ورىنعا جانە گارۆارد, كورسەر, حان اكادەميياسىنىڭ ونلاين-كۋرستارى ۇلگىسىمەن بىلىم بەرۋدىڭ ينتەرنەت-پلاتفور­ماسىنا اينالۋعا تيىس, – دەدى قازاقستان پرەزيدەنتى.
نۇرسۇلتان نازارباەۆ استانا ەكو­نومي­كالىق فورۋمىندا كوتەرىلگەن جاھاندىق وزگەرىستەردىڭ بەس مەگاترەندى تۋرالى اي­تىپ, ەلدىڭ اۋقىمدى ەكونو­ميكالىق, ساياسي جانە رۋحاني جاڭعىرۋىن جۇزەگە اسىرۋ ىسىندەگى وسكەلەڭ ۇرپاقتىڭ رولىنە باسا نازار اۋداردى.
– جاڭارعان قازاقستاننىڭ كەلبەتى دە, جاڭا فورماتسييانىڭ ۇرپاعى دا جانە مۇنى ومىردە ىسكە اسىراتىن دا سىزدەر بولا­سىزدار. سىزدەردىڭ كۇش-قۋاتتارىڭىز, باستاما­شىلدىقتارىڭىز, اقىل-وي­لارىڭىز بەن كرەاتيۆتى ۇستانىم­دارىڭىز وتانىمىزدىڭ تابىستى دامۋىنىڭ كەپىلى سانالادى. سىزدەر وزدەرىڭىزدىڭ قايتالانباس ومىر جولدارىڭىزدى جۇرىپ وتكەلى تۇرسىزدار. مەن سىزدەردىڭ ارقايسىڭىزدى ماقتان تۇتامىن, – دەدى ەلباسى.
مەملەكەت باسشىسى ۇزدىك ديپلوم­داردى تاپسىرۋ ساتىندە نازارباەۆ ۋني­ۆەرسي­تەتىنىڭ وقىتۋشى-پروفەسسورلار قۇرامىن جانە تۇلەكتەردى تاعى دا قۇتتىقتاپ, ولار­دىڭ وز يدەيالارىن جەمىستى جۇزەگە اسىرۋىنا تىلەكتەستىك بىلدىردى.
– قۇرمەتتى تۇلەكتەر, دوستارىم, بالا­لارىم! تەحنولوگييالىق دامۋ بولاشاعى تۋرالى عىلىمي بولجام جاسايتىن جەر جۇزىندەگى بىر بەدەلدى مامان فۋتۋرولوگ بار, ونىڭ اتى – رەي كۋرتسۆەيل. ونىڭ ايتۋىن­شا, ادامزات ححى عاسىردا بۇگىنگى ولشەممەن العاندا 100 جىلدىق ەمەس, 20 مىڭ جىلدىق پروگرەسپەن ىلگەرىلەيدى. ادامزاتتىڭ قا­زىرگى زاماندا قانداي قايران قالدىرارلىق جىلدامدىقپەن العا باسىپ بارا جاتقانىن وسىدان-اق سەزىنۋگە بولادى. مۇنداي جاعداي­دا بىز دە دال سونداي قارقىنمەن دامىماساق, ارتتا قالامىز. سوندىقتان سىزدەر, جاس ۇرپاق وركەندەۋدەگى ەل ۇمىتىن اقتاڭىزدار! ماق­ساتتارىڭىز اردايىم ايقىن, جولدارىڭىز ارقاشان اشىق ارى جازىق بولسىن! – دەپ تۇيدى سوزىن پرەزيدەنت نۇرسۇلتان نازارباەۆ.
بيىل نازارباەۆ ۋنيۆەرسيتەتىن باكالاۆريات, ماگيستراتۋرا جانە PhD دوكتورانتۋرا باعدارلامالارى بويىنشا 811 ستۋدەنت بىتىردى. بۇل رەتتە قازاق­ستاندىق جاستار سىرتىندا, رەسەي, قىتاي, تاجىك­ستان, قىرعىزستان جانە وزبەكستاننان كەلگەن 8 شەتەلدىك ازامات تا ديپلوم الدى.
عىلىم جانە تەحنولوگييالار مەكتەبى داستۇرلى تۇردە ەڭ كوپ ستۋدەنت شىعاردى (195 تۇلەك), ولاردىڭ اراسىندا بولاشاق بيولوگتار, عالىمدار, ينجەنەرلەر جانە باسقالارى بار. سونداي-اق بيىل تۇڭعىش رەت ۋنيۆەرسيتەتتىڭ مەديتسينا مەكتەبىنىڭ العاشقى 25 تۇلەگى قانات قاقتى, ولار ەندى مەديتسينا دوكتورلارىنىڭ, عىلىمي زەرتتەۋشىلەر مەن اكادەمييالىق كليني­تسيستەردىڭ (كلينيكالىق دارىگەرلەر) بىرىنشى ساناتىن تولىقتىرادى.
بۇگىندە ۋنيۆەرسيتەتتە تەگىن بىلىم الاتىن گرانت يەگەرلەرىنىڭ سانى 4 مىڭ ادامعا جەتتى. وقۋعا تۇسۋ ەمتيحاندارىنىڭ قورىتىن­دىلارى بويىنشا ەڭ جوعارى ناتيجەلەر كورسەتكەن تالاپكەرلەردىڭ نازارباەۆ ۋنيۆەرسيتەتىندە وقۋىنىڭ شىعىستارى مەملەكەتتىك بىلىم گرانتى اياسىندا تولىعىمەن وتەلەدى. ماگيسترانت­تار مەن دوكتورانتتاردى وقىتۋ دا وسىندا مەملە­كەتتىك گرانت اياسىندا جۇزەگە اسىرىلادى.
جوعارى وقۋ ورنى باسشىلىعىنىڭ دەرەگىنشە, بۇعان دەيىنگى ۇش جىلدىڭ 1800-گە جۋىق تۇلەك ارتۇرلى كومپانييالارعا جۇمىسقا ورنالاسقان. نازارباەۆ ۋنيۆەرسيتەتىنىڭ پرەزيدەنتى شيگەو كاتسۋ تۇلەكتەردىڭ جارتىسىنان كوبى بىردەن جۇمىسقا تۇراتىنىن ايتادى. ولاردىڭ كوبى قازاقستاندا قالادى. تەك بۇرىن تۇلەپ ۇشقان 30-دان استام تۇلەك ەۋروپا, سولتۇس­تىك امەريكا جانە ازييا ەڭبەك نارىق­تارىندا وز ورنىن تاۋىپتى. ولاردىڭ اراسىندا بىرقاتارى Google, Microsoft سەكىلدى جەتەكشى ىت كومپانييا­لاردا, سيليكون القابىندا جۇمىس جاساۋدا.

 

ايحان شارىپ

بولىسۋ:

پىكىر جازۋ


*