زەينەتاقى قورى Telegram بوتىن ىسكە قوستى

799
0
بولىسۋ:

بىرىڭعاي جيناقتاۋشى زەينەتاقى قورى تانىمال Telegram مەسسەندجەرى ۇشىن وزىنىڭ بوتىن ىسكە قوستى. بۇل تۋرالى بجزق باسپاسوز قىزمەتى حابارلادى.

پايدالانۋشىلار جاڭا قىزمەتتىڭ كومەگىمەن قىسقا ۇزىندى-كوشىرمە الۋ نەمەسە ۇزىندى-كوشىرمەنى ەلەكتروندىق پوشتاسىنا جىبەرۋ, جەكە كابينەتكە كىرۋ پارولىن قايتا قالپىنا كەلتىرۋ, قوردىڭ ماڭىزدى جاڭالىقتارى مەن اعىمداعى كورسەتكىشتەرىمەن تانىسۋ, سونداي-اق ونىڭ ەڭ جاقىن بولىمشەسىن تابۋ مۇمكىندىگىنە يە بولادى.

ودان باسقا, بوت نەگىزگى ۆاليۋتالاردىڭ (اقش دوللارى, ەۋرو, رۋبل) اعىمداعى باعامىن حابارلايدى, سونىمەن قاتار جول قوزعالىسى ەرەجەسىنىڭ بۇزىلۋىنا قاتىستى  ايىپپۇلدىڭ بار-جوعىن تەكسەرىپ, بجزق ۇيالى قوسىمشاسىن جۇكتەۋگە سىلتەمە بەرە الادى. الداعى ۋاقىتتا بوتتىڭ كورسەتەتىن قىزمەتىن كەڭەيتىپ, بارىنشا پايدالى جانە ىڭعايلى ەتۋ جوسپارلانۋدا.

اتالعان قىزمەتتەردى پايدالانۋ ۇشىن بوتتى مەسسەندجەرگە قوسۋ كەرەك. بۇل ۇشىن ىزدەۋ جولاعىنا enpfbot اتاۋى ەنگىزىلەدى. العاش رەت ىسكە قوسقاندا پايدالانۋشىلارعا قىزمەت كورسەتۋ تىلى رەتىندە مەملەكەتتىك نەمەسە ورىس تىلىن تاڭداۋ ۇسىنىلادى. كەيىن ونى نەگىزگى مازىردە اۋىستىرۋعا بولادى.

ايتا كەتەيىك, وتكەن جىلدىڭ ساۋىر ايىندا قور Telegram مەسسەندجەرىندە رەسمي @enpfkz ارناسىن ىسكە قوسقان بولاتىن. وعان جازىلعان پايدالانۋشى قازاقستان رەسپۋبليكاسىنىڭ جيناقتاۋشى زەينەتاقى جۇيەسى مەن بجزق قىزمەتى تۋرالى ماڭىزدى اقپاراتتار الا الادى.

ۇمىتجان باكەلەكوۆا

بولىسۋ:

پىكىر جازۋ


*