ЖОҒАЛМАЙТЫН МАМАНДЫҚ

2199
0
Бөлісу:

Бәсекеге қабілетті болудың көрсеткіші – білім деңгейімен өлшенеді. Білімді ұрпақ тәрбиелеу – ұстаздардың қолында. Тіпті мойнында десек те болады. Елбасы Нұрсұлтан Назарбаев: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр», – деп атап көрсеткен еді.
«Білімнің салтанаты жалпыға ортақ болуға тиіс. Оның айқын да, бұлтартпас себептері бар. Тех­нологиялық революцияның беталысына қа­ра­сақ, таяу онжылдық уақытта қазіргі кәсіп­тер­дің жартысы жойылып кетеді. Экономиканың кә­сіптік сипаты бұрын-соңды ешбір дәуірде мұн­шама жедел өзгермеген. Біз бүгінгі жаңа атау­лы ертең-ақ ескіге айналатын, жүрісі жыл­дам дәуірге аяқ бастық. Бұл жағдайда кәсібін не­ғұрлым қиналмай, жеңіл өзгертуге қабілетті, аса білімдар адамдар ғана табысқа жетеді. Осы­ны бек түсінгендіктен, біз білімге бөлінетін бюд­жет шығыстарының үлесі жөнінен әлемдегі ең алдыңғы қатарлы елдердің санатына қосы­лып отырмыз». Мемлекет басшысының келе­шек­ті болжай білетін қасиеті осындай сөзді айт­қызып отыр.
Иә, болашақта көптеген кәсіптер жоғалар, мә­ні мен сәні өзгерер. Мүмкін. Алайда ешуа­қыт­­та ескірмейтін, жоғалмайтын мамандық бар,  ол – мұғалім мамандығы. Бұл салаға бала атау­лыны жан-тәнімен сүйетіндер мен нағыз жан­кешті жандар барады. Француз ойшылы Жан Жак Руссо: «Ұстаз болу – өз уақытыңды ая­мау, өзгенің уақытын аялау», – депті. Ал біздің Ыбы­рай Алтынсарин: «Маған жақсы мұғалім бә­рінен де қымбат, өйткені мұғалім – мектептің жүрегі», – деген екен.
Абай атындағы Қазақ ұлттық педагогикалық уни­верситеті – Қазақстандағы тұңғыш жоғары оқу орны. Бір ғасырға жуық уақыт ішінде 250 мың­нан астам жоғары білімді мұғалімдер мен ғы­лыми-педагогикалық кадрлар даярлап шы­ғарған тарлан шаңырақта биыл мерейтой. Ұлт­тық рейтинг бойынша педагогикалық жоғары оқу орындары арасында алдыңғы орында келе жат­қан осы университет ректоры Тахир Балық­баев бір топ БАҚ басшысымен жүздесті. Ор­таға келелі ойлар тасталды. Қазақстан Пре­зидентінің «Алтын сапа» сыйлығымен мара­пат­талған университетте 883 білікті профессор-оқы­тушы дәріс береді екен. Яғни, Қазақстан мек­тептерінде еңбек етіп жүрген, келешекте ең­бек ететін мұғалімдер санаты негізінен, осы оқу ордасының түлектерінен құралады.
«Мұғалім мәртебесі қандай болуы керек», «Жақ­сы мұғалім қайдан шығады», «Ұстаз өне­гелі һәм өнерлі болмайынша, шәкірт жүрегін жау­лай алмайды» деген тұрғыда бірталай мәселе кө­терілді. Соның ішінде кешегі қазақ ауыл­да­рын­да мұғалім ең беделді мамандық иесі атан­ғаны айтылды. Олардың бәрі елді тыңдата алатын, тыңдай алатын. Білімі мен білігі жоғары болды. Бәрі де газет, кітап оқыды. Сол заманда газет оқу, кітап оқу мәдениеті қалыптасты. Қазір осы жағы ойсырап бара жатыр. Жастар, оның ішінде мұғалім мамандығын оқып жатқандар да бар, оқу мәдениетіне салғырт қарай бастады.
«Тәрбиешінің өзі – тәрбиелі болуы керек» деген сөзді бір данышпан айтқан еді. Сол айтқандай, мұғалім мамандығы – керек мамандық. Білім мен тәрбие саласында тер төгетін ұстаздар еңбегінің өтеуі анау-мынаумен өлшенбейді. Ол – күшті, мықты Қазақстан! Жаһандық бәсекеге төтеп бере алатын Қазақстан!

 

Нұртөре ЖҮСІП

 

Бөлісу:

Пікір жазу


*