بوزداقتار رۋحىنا تاعزىم ەتتى

1301
0
بولىسۋ:

قازاقستان پرەزيدەنتى نۇرسۇلتان نازارباەۆ الماتىداعى 28-گۆارديياشى-پانفيلوۆشىلار اتىنداعى ساياباقتا ورنالاسقان داڭق مەموريالىنا گۇل شوعىن قويۋ راسىمىنە قاتىستى.

مەملەكەت باسشىسى قۇرمەتتى قاراۋىلدىڭ ساپ تۇزەۋىمەن داڭق مەموريالىنداعى ماڭگىلىك الاۋعا گۇل شوعىن قويىپ, بىر مينۋتتىق ۇنسىزدىكپەن ۇلى وتان سوعىسىندا قازا تاپقانداردىڭ رۋحىنا تاعزىم ەتتى.
ەلباسى ارداگەرلەر مەن راسىمگە قاتىسۋشىلارعا ارنالعان قۇتتىقتاۋ سوزىندە قازاقستاندىقتاردىڭ فاشيستىك باسقىنشىلاردى جەڭۋگە زور ۇلەس قوسقانىن ەرەكشە اتاپ وتتى.
– قازاقستان مايدانعا 1 ميلليون 800 مىڭنان استام جاۋىنگەر اتتاندىردى. سولاردىڭ جارتىسى قايتىپ ورالمادى. ولار سوعىستا ەرەن ەرلىك كورسەتتى. 500 وتانداسىمىز كەڭەس وداعىنىڭ باتى­رى اتاندى. تىل ەڭبەككەرلەرى مايداندى قارۋمەن, ازىق-تۇلىكپەن جانە كەرەك-جاراقپەن قامتاماسىز ەتۋ ۇشىن كۇندىز-تۇنى تىنىمسىز جۇمىس ىستەدى, – دەدى نۇرسۇلتان نازارباەۆ.
قازاقستان پرەزيدەنتى سۇراپىل سوعىستى كورمەگەن قازىرگى ۇرپاقتىڭ باقىتتى ەكەنىن ايتتى.
– بىزدىڭ اتالارىمىز رەۆوليۋتسييا مەن رەپرەس­سييا­نى, ال اكەلەرىمىز ۇلى وتان سوعىسىن باستان وتكەردى. تەك بىزدىڭ ۇرپاق قانا بەيبىت زاماندا ومىر سۇرۋدە. بۇعان ارداگەرلەرىمىزدىڭ قوسقان ۇلەسى زور. سىزدەرگە العىسىمىز شەكسىز! – دەدى مەملەكەت باسشىسى.
راسىم سوڭىندا ەلباسى سوعىس جانە ەڭبەك اردا­گەرلەرىمەن ەركىن اڭگىمەلەستى.
– سىزدەر جانىمىزدا بولساڭىزدار, بىز, بالا­لارىڭىز بەن نەمەرەلەرىڭىز, وزىمىزدى الاڭسىز سەزىنەمىز. ەرلىكتەرىڭىزدى ۇلگى-ونەگە تۇتىپ, سىز­دەردەن قايسارلىقتى, وتانىمىزدىڭ پاتريوتى بولۋدى, اتامەكەندى سۇيۋدى, سونداي-اق وتانىمىز ۇشىن قاسىق قانىمىز قالعانشا كۇرەسىپ, سۇيىكتى قازاقستانىمىز ۇشىن جانى­مىزدى قۇربان ەتۋدى ۇيرەنەمىز. قىمباتتى دوستار, بارشاڭىزدى مەرەكە­لەرىڭىزبەن قۇتتىقتاي­مىن! سىزدەرگە زور دەن­ساۋلىق, تابىس جانە بار جاقسىلىقتى تىلەيمىن! – دەدى قازاقستان پرەزيدەنتى.
مايدانگەرلەر نۇرسۇلتان نازارباەۆقا ەرەكشە ىلتيپاتى مەن قامقورلىعى ۇشىن شىنايى ريزا­شىلىعىن بىلدىردى.

 

قانشايىم بايداۋلەت

بولىسۋ:

پىكىر جازۋ


*