بەيبىت كۇننىڭ باتىرلارى ۇلىقتالدى

1389
0
بولىسۋ:

باتىر بابالاردىڭ داڭقتى جولى مەن وتانعا ادال قىزمەت ەتۋ داستۇرىن توعىستىراتىن قوس مەيرام قارساڭىندا, اقوردادا ەلباسى – جوعارعى باس قولباسشى نۇرسۇلتان نازارباەۆتىڭ قاتىسۋىمەن مەملەكەتتىك ناگرادالار, جوعارى اسكەري جانە ارناۋلى اتاقتار مەن سىنىپتىق شەندەر تاپسىرۋ راسىمى وتتى. 

قازاقستان پرەزيدەنتى ەڭ الدىمەن بارشا قازاقستاندىقتاردى, ەر-ازاماتتاردى وتان قورعاۋشى كۇنىمەن جانە جەڭىس كۇنىمەن شىن جۇرەكتەن قۇتتىقتادى. بۇل رەتتە بىرىنەن كەيىن بىرى اتاپ وتىلەتىن وسى قوس مەرەكەنىڭ ماڭىزدىلى­عىنا نازار اۋدارتىلدى.
– بۇل مەيرامدار الدىندا مەن اردايىم جوعارعى باس قولباسشى رەتىندە جوعارى اسكەري جانە ارناۋلى اتاقتاردى, سونداي-اق قىزمەتتەگى جەتىستىكتەرى ۇشىن مەملەكەتتىك ناگرادالاردى تاپسىرامىن. ەرلىك پەن پاتريوتيزمگە دارىپتەيتىن وسى ايتۋلى كۇندەر بيىل استانانىڭ 20 جىلدىق مەرەيتويىمەن تۇسپا-تۇس كەلىپ وتىر. قازاقتا «ەلدى قورعاۋ – ەردىڭ ىسى, ەردى قولداۋ – ەلدىڭ ىسى» دەگەن قاناتتى سوز بار. بۇل رەتتە بۇگىن بيىك مارا­پاتقا, قۇرمەت-قوشەمەتكە ەلىمىزدىڭ بەيبىت ومىرى مەن تىنىشتىعىن ساقتايتىن اسكەرىمىز بەن ار­ناۋ­لى قىزمەتتەردىڭ ۇزدىك وكىلدەرى يە بولىپ وتىر, – دەدى ماراپات يەلەرىنە قايىرىلعان ن.نازارباەۆ.
ەلباسى شيرەك عاسىردان استام ۋاقىتتىڭ ىشىندە انتقا بەرىك, اماناتقا ادال ساردارلار مەن ساربازداردان تۇراتىن ارمييامىز قالىپتاسقانىن ايتتى.
– سايىپقىران ساربازدارىمىز بەن ساردار­لارىمىز قاستەرلى تاۋەلسىزدىگىمىزدىڭ قورعانى بولا بىلدى, بولا بەرەدى دەپ سەنەمىن. «ۇرانى بار ەلدىڭ ۇلانى بار» دەگەن. ايبىنى اسقاق, مەرەيى ۇستەم ۇلاندارىمىز ارقاسىندا اسكەري الەۋەتىمىز نىعايىپ كەلەدى. باھادۇر بابالاردىڭ ەرەن ەڭبەگىن ەگەمەن ەلدىڭ ەرلەرى لايىقتى جالعاس­تىرۋدا, – دەدى پرەزيدەنت.
مەملەكەت باسشىسى الەمدە بەلەڭ الىپ كەلە جاتقان تۇراقسىزدىق جاعدايىندا مەملەكەتتىڭ اسكەرى مەن كۇش قۇرىلىمدارى ەرەكشە ماڭىزعا يە بولاتىنىن ايتتى.
– بىزدىڭ اسكەرىمىز بەن قۇقىق قورعاۋ قۇرىلىمدارىمىز ەل قاۋىپسىزدىگىنىڭ بەرىك قالقانى ارى ەگەمەندىگىمىزدىڭ مىزعىماس كەپىلى بولىپ سانالادى. مەملەكەت بارشا قازاقستان­دىقتاردىڭ بەيبىت ومىرى مەن تىنىشتىعىن ساقتاۋ جولىنداعى سىزدەردىڭ ەرلىكتەرىڭىز بەن قاجىرلى ەڭبەكتەرىڭىزدى جوعارى باعالايدى, – دەدى ەلباسى.
ول ەل قاۋىپسىزدىگىن قامتاماسىز ەتۋ جانە وسكەلەڭ ۇرپاقتى تاربيەلەۋ ىسىندە اربىر اسكەري قىزمەتشىنىڭ زور رول اتقاراتىنىن اتاپ وتتى.
– جاۋىنگەرلەر اردايىم وتان ۇشىن وتقا تۇسۋدى پارىز ساناعان. بۇل – جاي سوز ەمەس. بىز مۇنى ۇلى وتان سوعىسى تاريحىنداعى ەرلىك ىستەردەن جانە اتا-بابامىزدان قالعان مۇرا­لاردان بىلەمىز. ارقاشان وسىلاي بولعان جانە بولا بەرەدى. ەلىمىز وز ارميياسى مەن قۇقىق قورعاۋ ورگاندارىن باعالاپ, قۇرمەت تۇتادى, سونداي-اق سىزدەر ادال ارى قالتقىسىز قىزمەت ەتەدى دەپ سەنەدى, – دەدى نۇرسۇلتان نازارباەۆ.
سوز سوڭىندا مەملەكەت باسشىسى سالتاناتتى شاراعا قاتىسۋشىلاردىڭ بارلىعىن وتان قورعاۋشى كۇنىمەن جانە جەڭىس مەرەكەسىمەن تاعى دا قۇتتىقتادى.
سالتاناتتى راسىم بارىسىندا مىنسىز اسكەري قىزمەتىمەن جانە ەلەۋلى ەڭبەگىمەن ەرەكشەلەنگەن ازاماتتارعا ەلىمىزدىڭ جوعارى دارەجەلى وردەن, مەدالدارى تاپسىرىلدى. اتاپ ايتقاندا, ىى دارەجەلى «داڭق» وردەنىمەن – م.تالاسوۆ, م.قۇسايىنوۆ, م.ساتوۆ, ق.جاقىپباەۆ, ى دارەجەلى «ايبىن» وردەنىمەن – د.قۇرماشەۆ, ا.تولەۋوۆ, II دارەجەلى «ايبىن» وردەنىمەن – ج.جاقىپوۆ, ا.كالينين, د.پلاستوۆەتس, «قۇرمەت» وردەنىمەن – ە.وماروۆا, «ەرلىگى ۇشىن» مەدالىمەن – ع.الەۋحانوۆ, ۆ.كالمىكوۆ, «جاۋىنگەرلىك ەرلىگى ۇشىن» مەدالىمەن – ن.زالمۇقانوۆ ماراپاتتالدى.
– قوعامدىق تارتىپتى جانە قاۋىپسىزدىكتى نىعايتۋعا زور ۇلەس قوسقان ىىم بولىمشەسىنىڭ باسشىسى دۋلات قۇرماشەۆتى اتاپ وتكىم كەلەدى. اسا قاۋىپتى قىلمىسكەرلەرگە قارسى ارنايى وپەراتسييانى باسقارىپ, ۇتىمدى وتكىزگەن ونى ى دارەجەلى «ايبىن» وردەنىنە لايىق دەپ سانادىق. مەملەكەت مۇددەلەرىن قورعاۋ, ۇلتتىق قاۋىپسىزدىكتى قامتاماسىز ەتۋ ىسىندە جوعارى ناتيجەلەرگە جەتكەن ۇلتتىق قاۋىپسىزدىك كوميتەتىنىڭ دەپار­تامەنت باستىعى اسحات تولەۋوۆكە ى دارەجەلى «ايبىن» وردەنى تابىستالادى. قىزمەتىن مىنسىز اتقارىپ, اسكەري بىلىمگە بىلىكتى باسشىلىق جاساعانى ۇشىن جاسۇلان جاقىپوۆقا ىى دارەجەلى «ايبىن» وردەنى بەرىلەدى. بيىل قۇرلىق اسكەرلەرى اراسىندا وتكەن كوماندالىق دايىندىق ناتيجەسى بويىنشا ول بىرىنشى ورىنعا يە بولدى, – دەدى مەملەكەت باسشىسى.
سونىمەن قاتار ەل پرەزيدەنتى بەيبىت كۇندە باسىن قاتەرگە تىگىپ, ەكى بالانى ورتتەن قۇتقارعان قورعانىس مينيسترلىگىنىڭ جوندەۋ روتاسىنىڭ ساربازى عالىمجان الەۋحانوۆتىڭ ەرەن ەرلىك كورسەتكەنىن اتاپ وتتى.
– ونىڭ بۇل ىسى بارشا جۇرتقا ۇلگى. سول سەبەپتى «ەرلىگى ۇشىن» مەدالىمەن ماراپاتتالادى. اسكەري قىزمەتتە كاسىبي بىلىكتىلىك تانىتقان قورعانىس مينيسترلىگىنىڭ ەكيپاج كومانديرى نۇرلان زالمۇقانوۆ «جاۋىنگەرلىك ەرلىگى ۇشىن» مەدالىمەن ماراپاتتالادى. ول اسكەري ۇشاقتىڭ اپاتقا ۇشىراۋىن بولدىرماي, باتىل قيمىلداپ, ادامدار ومىرىن ساقتاپ قالدى, – دەدى نۇرسۇلتان نازارباەۆ.
بۇدان بولەك, جەتىستىكتىكتەرى مەن ۇزدىك قىزمەتى ۇشىن بىر توپ اسكەري جانە كۇش-قۇرى­لىمدارى وكىلدەرى جوعارى ارناۋلى اسكەري اتاقتار مەن سىنىپتىق شەندەردى يەلەندى.
سونىڭ ىشىندە, «گەنەرال-لەيتەنانت» اسكەري اتاعى تالعات جانجۇمەنوۆكە, «ۇلتتىق قاۋىپسىزدىك گەنەرال-لەيتەنانتى» ارناۋلى اتاعى نۇرعالي بىلىسبەكوۆ پەن مارات وسىپوۆكە, «سىرتقى بارلاۋ گەنەرال-لەيتەنانتى» ارناۋلى اتاعى عابيت بايجانوۆقا, «گەنەرال-مايور» اسكەري اتاعى ۇلاربەك ابىكەەۆكە, قانىش ابۋباكىروۆكە, دميتريي بوچاروۆقا, قايرات كوپباەۆقا, ارمان قاليەۆكە جانە سەرىك ىزتىلەۋوۆكە بەرىلدى.

 

ايحان شارىپ

بولىسۋ:

پىكىر جازۋ


*