بالالار ۇيىنىڭ تاربيەلەنۋشىلەرى نەيمارعا قوناققا بارادى

1221
0
بولىسۋ:

«باۋىرجان» قورىنىڭ ۇيىمداستىرۋىمەن «تسەسنابانك» اق, «نۇر وتان» پارتيياسى, قازاقستاننىڭ فۋتبول فەدەراتسيياسىنىڭ قولداۋىمەن بالالار ۇيى مەن مەكتەپ-ينتەرناتى تاربيەلەنۋشىلەرى اراسىنداعى «ارمانىڭا جاقىندا» اتتى فۋتبول چەمپيوناتى باستالدى. تۋرنيردىڭ باستى سىيلىعى – «پاري سەن-جەرمەن» فۋتبول كلۋبىنا قوناققا بارۋ.

بىر ايدىڭ كولەمىندە قازاقستاننىڭ 13 وبلىسىنان جينالعان بالالار ۇيىنىڭ 21 كومانداسى ەلىمىزدىڭ ەڭ مىقتى كومانداسى دەگەن ستاتۋسى مەن 2018 جىلدىڭ چەمپيونى اتاعىنا تالاسادى. جەڭىمپازدار فرانتسييا استاناسىنداعى «پاري دە پرەنس» ستاديونىندا بارىپ, «پاري سەن-جەرمەن» كلۋبىنىڭ نەيمار, تيياگو سيلۆا جانە ت.ب سىندى ويىنشىلارىمەن كەزدەسۋ مۇمكىندىگىن الادى.

«باۋىرجان» قورىنىڭ سپورتتىق جوبالار جەتەكشىسى اينۇر سالىمباەۆانىڭ ايتۋىنشا, الەمنىڭ مىقتى دەگەن فۋتبول كلۋبتارىن كورۋ مۇمكىندىگى تەك قانا ەلىمىزدىڭ ىرى قالالارىندا عانا ەمەس, سونىمەن قاتار باسقا ايماقتارىندا دا بالالار مەن جاسوسپىرىمدەر اراسىنداعى فۋتبولدىڭ دامۋىنا ىقپال ەتەدى.

– الەمنىڭ مىقتى فۋتبول كلۋبىنا جولداما الۋ – قازاقستان بالالار ۇيىنىڭ تاربيەلەنۋشىلەرىنە وسىمەن 6-شى جىل بەرىلىپ وتىرعان مۇمكىندىك. التى جىل ىشىندە «ارمانىڭا جاقىندا» جوباسى 11 مەن 14 جاس ارالىعىنداعى 2000 جۋىق جاسوسپىرىمدى فۋتبولعا باۋلىپ, ونىڭ 56-سىندا بالا ارمانى ورىندالىپ, كۋميرلارىمەن كەزدەسىپ, الەمنىڭ «ميلان», «بارسەلونا», «چەلسي», «باۆارييا», «اتلەتيكو مادريد» سىندى مىقتى كلۋبتارىمەن كەزدەستى. بۇگىن بىز وسىمەن تورتىنشى جىل بالالاردىڭ جىگەرىن قۇلاتپاي, ارماندارىنىڭ ورىندالۋىنا كومەگىن اياماي كەلە جاتقان تسەسنا بانكپەن بىرلەسە وتىرىپ, بيىلعى چەمپيوناتتىڭ باستالۋىن حابارلايمىز,- دەيدى سالىمباەۆا اينۇر.

وز كەزەگىندە «تسەسنابانك» اق الماتى فيليالىنىڭ ديرەكتورىنىڭ ورىنباسارى شيرىكالوۆ يگور ەۆگەنەۆيچ قازاقستانداعى جاڭا سپورتسۇيەر بۋىندى تاربيەلەپ وتقان وسىنداي باستامالاردىڭ ماڭىزىن اتاپ وتتى.

         قازاقستان فۋتبولىنىڭ ارداگەرى, «قايرات» فك فۋتبولدى جاپپاي دامىتۋ باسشىسى قۇرالبەك ورداباەۆ فۋتبوليستەر اراسىنداعى جاڭا بۋىنعا ۇمىت ارتاتىنىن جانە دە جاسوسپىرىمدەر اراسىنداعى فۋتبولعا دەگەن ۇلكەن قىزىعۋشىلىقتىڭ بارىن ايتتى.

ۇيىمداستىرۋشىلار سونىمەن قاتار, بالالار ۇيىنىڭ تاربيەلەنۋشىلەرى اراسىندا سپورتتى دارىپتەۋدىڭ ماڭىزىن ەسكەرە وتىرىپ, جوبانىڭ 5 جىلدىق ناتيجەسى – «ارمانىڭا جاقىندا» تۋرنيرىنىڭ 60-قا جۋىق قاتىسۋشىسى قازاقستاننىڭ كاسىبي فۋتبول كلۋبتارىندا جاتتىعىپ, وينايتىنىن جەتكىزدى.

–  ماسەلەن, بىلتىرعى پاۆلودار وبلىسىنداعى ىرىكتەۋ ويىندارىندا بىزدىڭ تۋرنيرگە قاتىسقان ۆلاد كوزارەنكونى قازاقستان فۋتبولىنىڭ مايتالمانى, قر ەڭبەك سىڭىرگەن جاتتىقتىرۋشىسى ۆيكتور يارىشەۆ بايقاۋعا شاقىردى. بۇگىندە ۆلاد پاۆلودار قالاسىنىڭ فۋتبول اكادەميياسىندا جاتتىعادى. الدىڭعى جىلداردىڭ قاتىسۋشىلارى «تاڭشولپان» بالالار ۇيىنىڭ 4 تاربيەلەنۋشىسى «شاحتەر» كلۋبىنىڭ اكادەميياسىندا وينايدى, – دەدى اينۇر سالىمباەۆا.

«ارمانىڭا جاقىندا» فۋتبول چەمپيوناتىنىڭ العاشقى ىرىكتەۋ ماتچى الماتى قالاسى مەن الماتى وبلىسى بالالار ۇيىنىڭ تاربيەلەۋشىلەرى اراسىندا وتەدى. تۋرنيردى قورىتىندىلاۋ كەزەڭىندە بالالار ۇيىنىڭ تاربيەلەنۋشىلەرىنەن تۇراتىن ۇش كوماندا ونەر كورسەتتى. ناتيجەسىندە  الماتى وبلىستىق №1 بالالار ۇيىنىڭ تاربيەلەنۋشىلەرىنەن قۇرالعان «بارىس» كومانداسى  قارسىلاستارىنان مىقتىراق بولىپ, فينالعا جولدامانى جەڭىپ الدى. ولار وز كەزەگىندە قازاقستان بويىنشا مىقتى دەگەن توعىز كوماندامەن كۇش سىناساتىن بولادى.

چەمپيوناتتىڭ 5 جىلدىق تاريحىندا قازاقستاننىڭ بالالار ۇيىنىڭ 56 تاربيەلەنۋشىسى الەمنىڭ اتاقتى دەگەن فۋتبول كلۋبتارىندا قوناقتا بولىپ, مەسسي, روبەنا, حاۆي, رونالدو جانە باسقا دا الەمدىك فۋتبولدىڭ ويىنشىلارىمەن بەتپە-بەت كەزدەستى. 2013 جىلدىڭ جەىمپاز كومانداسى – ەسىل قالاسىنىڭ №2 بالالار ۇيىنىڭ تاربيەلەنۋشىلەرى «بارسەلونا» فۋتبول كومانداسىمەن كەزدەسىپ, «كامپ نوۋ» ستاديونىندا بولدى. 2014 جىلى ميلانعا بارىپ, «ميلانەللو» بازاسىندا بولعان جەڭىمپازدار – الماتى وبلىسىنىڭ №1 بالالار ۇيىنىڭ تاربيەلەنۋشىلەرى «بارىس» كومانداسى. 2015 جىلى قاراعاندى قالاسىنىڭ «تاڭشولپان» بالالار ۇيىنىڭ تاربيەلەنۋشىلەرى ميۋنحەنگە جول تارتىپ, ALLIANZ ARENا-دا وتكەن «باۆارييا» مەن «رەال مادريد»اراسىنداعى ويىندى تاماشالادى. 2016 جىلدىڭ جەڭىمپازدارى قوستاناي وبلىسىنداعى بالالار ۇيىنىڭ تاربيەلەنۋشىلەرى «اتلەتيكو مادريد» جاتتىعۋ بازاسىن كورىپ, انتۋان گريزمان, فەرنانو توررەس, كاكا سىندى فۋتبوليستەرمەن كورىستى. بىلتىرعى جىل جەڭىمپازدارى «تاڭشولپان» كومانداسى «چەسلي» كلۋبىندا بولىپ, پەدرو, داۆيد لۋيز, ماركو الونسو جانە ت.ب. فۋتبوليستەرمەن تانىستى.   

ۇيىمداستىرۋشىلاردىڭ العا قويعان باستى ماقساتى – بولاشاقتا قازاقستان فۋتبولىنىڭ دامۋىنا سالماقتى ۇلەسىن قوسۋ مۇمكىندىگى بار جەتىم بالالار اراسىنداعى فۋتبول ويىنىنا دەگەن ىنتانى ارتتىرۋ جانە دامىتۋ.

ايشا ەرسۇلتان

بولىسۋ:

پىكىر جازۋ


*