ارىستانبەك مۇحامەديۇلى, مادەنيەت جانە سپورت مينيسترى: ەلدىڭ رۋحاني دامۋىنداعى تىڭ باستامالار

2082
0
بولىسۋ:

ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىندا ەڭ الدىمەن, ۇلت ساناسىن جاڭعىرتۋعا, قازاقستاندىق مادەنيەتتى ىلگەرىلەتۋدە جانە داستۇرلەرىمىز بەن مادەنيەتىمىزدىڭ نارىقتىق قاعيدالار مەن جاھاندىق ەكونوميكاداعى وزىق تەحنولوگييالاردى قالىپتاستىرۋدا مادەنيەت-ونەر سالاسىنىڭ قىزمەتكەرلەرىنە ۇلكەن جاۋاپكەرشىلىك جۇكتەدى.

ويتكەنى بابالاردان بىزگە جەتكەن كيەلى دە قاسيەتتى باعا جەتپەس مادەني مۇرالارىمىز ۇلان-بايتاق دالاسى بار ۇلى حالىقتىڭ ىنتىماق-بىرلىگىن ساق­تاپ, ۇلتتىق رۋحىن كوتەردى. عاسىرلار قويناۋىنان جەتكەن بابالار ۇنى – تەرەڭ ويلى ان-جىراۋلارى مەن كۇي­لەرى, سارقىلماس قازىناعا اينالعان حالىق اۋىز ادەبيەتى, قازىرگى داۋىردىڭ تەحنولوگييالارىمەن پارا-پار تۇسەتىن قولونەر مادەنيەتى, بۇلار بىزدىڭ رۋحاني مادەنيەتىمىزدىڭ التىن دىڭ­گەگىنە اينالعان ەدى. وسىناۋ اسىل قا­زىنالاردى ۇرپاق ساناسىنا تەرەڭىنەن بويلاي ۇلىقتايتىن شەشۋشى كەزەڭگە اياق باسقانىمىز مەن ۇشىن ۇلكەن مار­تەبە ارى ماڭىزدى مىندەت بولىپ سانا­لادى. وسى ورايدا بىز وزىمىزدىڭ مادەني مۇرالارىمىز بەن ونەرىمىزدى زەردەلەپ, ۇلتتىق كودىمىزدى ناقتىلاۋىمىز كەرەك. ونىڭ نەگىزى حالقىمىزدىڭ تەكتىلىگىندە, قايماعى بۇزىلماعان ساناسى مەن دىڭىندە ەكەندىگى بەلگىلى.
ححى عاسىر وزىنىڭ الەۋمەتتىك-ەكو­نوميكالىق كەڭىستىگىنە شىقتى. ونىڭ ورتالىعىندا وزىنىڭ تابيعي جانە جيناعان مول قاسيەتتەرىمەن, اتاپ ايت­قاندا, مۇمكىندىك, ىسكەرلىك, ومىرلىك ماماندىق تاجiريبەسىمەن ادام تۇر. قاي قوعامدا بولماسىن, ادام كاپي­تا­لى بىرىنشى كەزەكتە تۇر. ادام – سانا – رۋح. ادامي كاپيتال جوعارى بىلىم مەن مادەنيەتتەن تۇرادى. مىنە, بىزدىڭ قوعامنىڭ رۋحاني ساناسىنىڭ جاڭ­عىرۋىندا سالت-داستۇرلەردىڭ ساباق­تاستى­عىنىڭ ماڭىزى جوعارى. قوس وزەننىڭ ساعاسىنداي بىتە قايناسىپ كەلە جات­قان ۇلت ونەرى مەن رۋحانيياتى قاي قو­عامدا بولماسىن شەشۋشى رول اتقا­رادى. قازاقستاننىڭ تۇكپىر-تۇكپى­رىندە «بولاشاققا باعدار: رۋحاني جاڭ­عىرۋ» شەڭبەرىندە مادەني شارا­لاردىڭ قاتارى كوبەيىپ كەلەدى.

ەلباسى اتاپ وتكەندەي, «وزىنىڭ تاري­حىن, تىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ارى جاھاندىق كوزقاراسى بار قازاق­ستاندىق بىزدىڭ قوعامىمىزدىڭ يدەالىنا اينالۋعا تيىس».
وتكەن جىلى «رۋحاني جاڭعىرۋ» باع­دار­لاماسى اياسىندا مينيسترلىك العاش رەت تاۋەلسىز قازاقستاننىڭ تاريحىندا جو­عا­رى ۇلتتىق جانە حالىقارالىق قىزىعۋ­شى­لىقتىڭ وبەكتىسى بولاتىن «قازاق­ستاننىڭ كيەلى جەرلەرىنىڭ گەوگرافيياسىن» – ەلىمىز­دىڭ بىرەگەي تاريحي جەرلەرىنىڭ بىرىڭعاي بەلدەۋىن قالىپتاستىرۋعا كىرىستى.
عىلىمي جانە ادىستەمەلىك سۇيەمەلدەۋ جانە ۇيلەستىرۋ ماقساتىندا ۇلتتىق مۋزەيى جانىنان «قاسيەتتى قازاقستان» ورتالىعى قۇرى­لىپ, بۇگىنگى كۇنى وز جۇمىسىن تىڭعى­لىق­تى ارتقارۋدا. ورتالىققا تانىمال عالىم, عىلىم كانديداتى بەرىك ابدىعالي باسشىلىق ەتەدى. سونىمەن قاتار جەتەكشى ولكەتانۋشىلاردان, ارحەولوگتاردان, تاريح­شىلاردان قۇرالعان عىلىمي-ساراپ­شى­لىق كەڭەس جۇمىسىن اتقارادى.
العاش رەت «تۋعان جەر» رەسپۋبليكالىق ولكەتانۋشىلار بىرلەستىگى قۇرىلىپ, بۇگىنگى كۇنگە دەيىن ەكى رەسپۋبليكالىق فورۋم وتكىزىلدى.
بارلىق وڭىرلەردە وسى ۋاقىت ىشىندە ەتنومادەني ەكسپەديتسييالار جانە دالالىق زەرتتەۋلەر جۇرگىزىلىپ, ونىڭ ناتيجەسىندە, 185 جالپىۇلتتىق جانە 456 جەرگىلىكتى دەڭگەي­دەگى كيەلى جەرلەردىڭ تىزىمى قالىپ­تاس­تى­رىلدى. زەرتتەۋلەردىڭ ناتيجەسىندە, «قاسيەت­تى قازاقستان» ەنتسيكلوپەديياسىنىڭ بىرىنشى تومى شىعارىلدى. اربىر وبەكت بويىنشا تولىق سيپاتتامالارى مەن 3D تۋرلارى بار كوپفۋنكتسييالى ۆيرتۋالدى كارتا ازىرلەندى.
العاش رەت قوجا احمەت ياسساۋي جانە قاراحان كەسەنەلەرىنىڭ مودەلدەرى 3D فورماتقا كوشىرىلدى.
كيەلى جەرلەردى جاھاندىق برەند رەتىندە كورسەتۋ ماقساتىندا BBC World News تەلە­ارنا­سىمەن بىرلەسىپ, «قازاقستاننىڭ كيەلى جەرلەرىنىڭ گەوگرافيياسى», «التىن جاۋىن­گەر», «قوجا احمەت ياسساۋي جانە ايشا بيبى كەسەنەلەرى» فيلمدەر تسيكلى شىعارىلدى.
امەريكالىق Castlefilm كومپانيياسى مەن اكتەر مارك داكاسكوستىڭ قاتىسۋىمەن «كۇلتەگىن. جاڭا كوزقاراس» دەرەكتى تاريحي فيلمى جانە «زەمليا نومادوۆ» فيلمى جارىققا شىقتى. بارلىق فيلمدەر بۇۇ-نىڭ التى تىلىندە سۋبتيترلانىپ جانە دۋبلياج­دالىپ, الەمدىك Discovery, Viasat history, National Geographic ارنالارىندا
2 ميللياردتان استام ادام اۋديتورييامەن 170-تەن استام ەلدە كورسەتىلەتىن بولادى.
وتكەن جىلعى قاراشا ايىنان باستاپ, BBC تەلەارناسى بىزدىڭ «التىن جاۋىنگەر» تۋرالى فيلمدى ىسكە قوستى. الەمنىڭ جەتەك­شى مۋزەيلەرىندە جاۋىنگەردىڭ كورمە­سى ۇيىمداستىرىلدى.
الەمنىڭ 20 ەلىندە مادەنيەت پەن ادەبيەت ورتالىقتارى اشىلدى. مەملەكەت باسشىسىنىڭ جاقىنداعى اقش-قا ىس-ساپارى اياسىندا نيۋ-يوركتىڭ كوپشىلىك كىتاپحاناسىندا, سونداي-اق الەمنىڭ ەڭ ىرى كىتاپحانالارىنىڭ بىرى – كەلۋشىلەرى 2 ميلليارد ادامدى قۇرايتىن ۆاشينگ­تون­داعى اقش-تىڭ كونگرەسس كىتاپحاناسىندا وسىنداي ورتالىقتار اشىلدى.
ۇلتتىق مادەنيەت پەن قۇندىلىقتاردىڭ بىر-بىرىنە جاقىنداۋ ۇدەرىسىن, مادەني, كوممۋ­نيكاتسييالىق, وركەنيەتتەر بايلانى­سىن ارتتىراتىنى سوزسىز. وسىنىڭ وزى ەل­دەگى ىنتىماقتىڭ, اۋىزبىرشىلىكتىڭ نىعايۋى­نا ۇلكەن سەپتىگىن تيگىزەدى. ونىڭ بارى­­سىندا عىلىم مەن ونەر جەتىستىكتەرى, الەۋ­مەتتىك جانە ساياسي قىزمەتتەردىڭ جاڭا تۇرلەرى شاپشاڭ تارالىپ, ونىڭ تۇتاستىعى ساقتالا وتىرىپ, بۇگىنگى الەممەن يگەرىلە تۇسەدى.
قاي كەزدە دە ەل باسقارۋ, ونى قورعاۋ وڭاي بولماعان. قاي زاماندا دا, قاي قوعامدا دا جەكەلەگەن تۇلعالاردىڭ جونى بولەك بولعان. ۇلى دالانىڭ جەلدەي ەسكەن ۇنى – اتا-بابالار اماناتى ەلباسىنىڭ رۋحاني جاڭعىرۋعا باعىتتالعان ماقالا­سىن­دا باستى نازارعا الۋى تەكتەن تەك بولماسا كەرەك-تى. «بىز ححى عاسىردىڭ جاھاندىق كارتاسىندا ەشكىمگە ۇقسامايتىن, دەربەس ورنى بار ۇلت بولامىز دەسەك, «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا تيىسپىز. الەم بىزدى قارا التىنمەن نەمەسە سىرتقى ساياساتتاعى ىرى باستامالارىمىزبەن عانا ەمەس, مادەني جەتىستىكتەرىمىزبەن دە تانۋى كەرەك» دەگەن جولدارىندا ۇلكەن مان جاتىر.
وسى ورايدا, 2017 جىلعى 17 قازاندا پاريج قالاسىنداعى يۋنەسكو-نىڭ شتاب پاتەرىندە «رۋحاني جاڭعىرۋ» باعدارلا­ما­سى­نىڭ اۋقىمدى پرەزەنتاتسيياسى وتتى. ەلباسىنىڭ باستامالارى بەدەلدى حالىق­ارا­لىق ساراپشىلاردىڭ ورتاسىندا قولداۋ تاۋىپ, ولاردىڭ جالپى العاندا يۋنەسكو جانە بۇۇ-نىڭ نەگىزگى ميسسييالارىنا تولىقتاي سايكەس كەلەتىنىن اتاپ وتتى. بۇل ساپار «جاھانداعى زاماناۋي قازاقستاندىق مادەنيەت» جوباسىنا رەسمي باستاۋ بەردى.
شىعىس حالىقتارى مەرەكەلەرىنىڭ سانىن كەلتىرگەن, حالىق اراسىندا كەرەمەت قولداۋ­عا يە ناۋرىز مەيرامىن جاڭا ۇلگىدە وتكىزۋ جونىندە جاڭا باستامانى قولعا الۋىم­نىڭ نەگىزگى سەبەبى, جالپى ۇلتتىق اۋقىم­دا اتاپ وتۋ ەدى. يا, ازداعان جۇرت­شى­لىقتىڭ قىزىق­تاۋىنا عانا اينالعان فولكلورلىق قويىلىم كورىنىسىنەن اسپاي جۇرگەنى راس. سول سەبەپتى, مەرەكەنىڭ وزىنە سايكەس ايشى­لىق­تارىن تۇلەتە وتىرىپ, فولكلورلى-ەتنوگرافييالىق اۋقىمنان جالپى قازاق­ستاندىق مەرەكە دارەجەسىنە جەتكىزۋ كەرەك. بۇل ماسەلەدە ۇلتتىق نامىس پەن رۋحاني بولمىسىمىزدى جاڭعىرتۋ دەگەن اسقاق وي جاتىر. قازىر ناۋرىز دەگەندە, تىگىلگەن كيىز ۇيلەرگە كەلىپ, قوناق بولىپ كەتەتىندەر مەن سىرتتان باقىلايتىندار دەپ ەكىگە بولىپ قاراۋعا بولادى. مەرەكەدە باقىلاۋشىلار بولمايدى, بارى دە قاتىسۋشى بولۋ كەرەك. بىز وسىعان اسا نازار اۋدارعانىمىز جون. سون­دىقتان دا ناۋرىزعا قاجەت ىرگەلى ىزدە­نىس­تەر مەن تاريحي ارى زاماناۋي شارالار تۋراسىندا ايتار بولساق, مۇنىڭ بىرنەشە جولى بار.
سوندىقتان تاريحى ارىدە جاتقان وسى ۇلىق كۇنگە بىز ايرىقشا ىقىلاس تانىتىپ, ونىڭ مازمۇندىق قىرى مەنەن سىرىن ودان ارى بايىتا تۇسۋىمىز كەرەك.
ادام كاپيتالىن دامىتۋدا ونەردىڭ الار ورنى ەرەكشە. ەلىمىزدىڭ ونەر وشاقتارىندا ەلباسىنىڭ ماندى دە ماعىنالى باعدار­لا­ما­لىق ماقالاسى اياسىندا كەڭىنەن مادەني-تانىمدىق شارالار وتكىزىلۋدە. قازاقستان­دا­عى ادام كاپيتالىنىڭ دامۋىن جانە ونىڭ قۇرىلۋىن زەرتتەۋدە نەگiزiنەن مىنا­داي العا قويىلعان ماسەلەلەردى شەشۋ قاجەت­تىلىگى تۋىندايدى: ادام كاپيتالى – ەكو­نوميكالىق كاتەگورييا; ادام كاپيتالى – سوعان سالىناتىن ينۆەستيتسييا نەگiزi; ادام كاپيتالىنىڭ جۇيە قۇرۋشى ستاتۋسى تەورەتيكالى ەكونوميكالىق زەرتتەۋ پانi; ادام كاپيتالى تەوريياسىنىڭ كوزقاراسى تۇرعىسىنان بiلiمگە سالىنعان ينۆەستيتسييا; ادام كاپيتالىنىڭ قازاقستانداعى بiلiم بەرۋ كومپونەنتi; بiلiم بەرۋگە سالىنعان سالىمنىڭ ادام كاپيتالىنا تيiمدiلiگi.
ت.جۇرگەنوۆ اتىنداعى قازاق ۇلتتىق ونەر اكادەميياسى جانە «شابىت» ونەر اكادەميياسى سىندى بىرقاتار ونەر وقۋ ورىندارىندا ستۋدەنتكە تەك مامان رەتىندە عانا قاراماي, ونى وز قوعامىنىڭ ازاماتى, شىعارماشىلىق تۇلعا, كەلەشەكتىڭ يەسى رەتىندە تانىپ, سوعان مۇمكىندىك جاساپ, بىلىم بەرۋدە. وسى شارالاردىڭ تۇپكى ماقساتى بىرەۋ عانا. ول – حالقىمىزدىڭ ساناسىن ماڭگىلىك يدەيالار نەگىزىندە رۋحاني سەرپىلىس بەرۋ.
ادامي كاپيتال تەورييالارىن كلاسسي­كا­لىق مادەنيەتتانۋشىلاردىڭ كوزقاراس­تا­رى­نا شولۋ جاساي كەلە, مىنانداي قورى­تىن­دىعا كەلۋگە بولادى. ولاردىڭ زەرت­تەۋ­­لەرىندە ادامنىڭ ساپاسى – وندىرىس تيىمدىلىگىنىڭ ماڭىزدى فاكتورى, ادامنىڭ ماڭىزدى ساپالارى بىلىم بەرۋ مەن تاربيەسى, قابىلەتتىلىكتى قالىپتاستىرۋ, ادامنىڭ قابىلەتتەرى كاپيتال ەلەمەنتى ەكەندىگى, بىلىم بەرۋدىڭ ەكونوميكالىق وسۋگە تىكەلەي ۇلەس قوساتىندىعى نەگىزدەلەدى.
مىنە, پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا: «رۋحاني جاڭعىرۋ تەك بۇگىن باستالاتىن جۇمىس ەمەس. بىز تاۋەلسىزدىك كەزەڭىندە بۇل باعىتتا بىرنەشە اۋقىمدى ىس اتقار­دىق. 2004 جىلى «مادەني مۇرا» باع­دارلاماسى اياسىندا قازاقستان اۋماعىن­داعى تاريحي-مادەني ەسكەرتكىشتەر مەن نىسان­داردى جاڭعىرتتىق. 2013 جىلى «حالىق – تاريح تولقىنىندا» باعدارلاماسى ارقىلى الەمنىڭ ەڭ بەلدى ارحيۆتەرىنەن تول تاريحىمىزعا قاتىستى قۇجاتتاردى جۇيەلى تۇردە جيناپ, زەرتتەدىك» دەگەن ەدى. دەمەك, پرەزيدەنتىمىز: «ەلىمىز مىقتى ارى جاۋاپ­كەر­شىلىگى جوعارى بىرتۇتاس ۇلت بولۋ ۇشىن بولاشاققا قالاي قادام باساتىنىمىز جانە بۇقارالىق سانانى قالاي وزگەرتە­تى­نى­مىز تۋرالى» كوزقاراستارىن ورتاعا سالىپ وتىر.
جالپى, رۋحانيلىق – سانا مەن سانا­سىز­دىق پروتسەستەرىن قامتيتىن (وزىنىڭ ومىر سۇرۋى مەن كورىنىسىنىڭ ناقتى تۇرلەرى جونى­نەن سان الۋان) كوپتۇرلىلىكتىڭ بىر­تۇتاس­تىعى بولا وتىرىپ, تابيعي تىلدەر مەن جاساندى تاڭبالىق – سيمۆولدىق جۇيەلەر تۇرىندە ىس جۇزىنە اسىرىلعان بىلىمدەردى وز بويىنا ەنگىزەتىندىگىن ەسكەرەمىز. رۋحاني ونىمدەر مەن پروتسەستەرگە, سول سيياقتى ادامگەرشىلىك نورمالار مەن ولشەمدەردى, قۇقىقتى, كور­كەم­دىك شىعارماشىلىقتى قوسا العانداعى ادام­دار ارالاسۋىنىڭ پرينتسيپتەرى دە جاتادى.
ەلباسى باستاعان ەلىمىزدىڭ بۇگىنگى قارقىندى دامۋى, سونىڭ ناتيجەسىندە جاستارعا جاسالىپ جاتقان جاقسىلىقتار بىزدىڭ جان-جاقتى بىلىم الۋىمىزعا, جان-جاقتى حاباردار بولۋىمىزعا جول اشىپ وتىر. سول قامقورلىقتى كۇنى ەرتەڭ وز ەڭبە­گىمىزبەن قايتارۋ ازاماتتىق پارىزى­مىز دەپ بىلەمىن.
قازىرگى ححى عاسىردا بىلىمىن دامىتا الماعان ەلدىڭ تىعىرىققا تىرەلەرى انىق. بىز بولاشاق مادەنيەت جانە ونەر سالاسىندا جوعارى بىلىم بەرۋ جانە عىلىمي الەۋەتىن دامىتۋ ۇشىن كادرلار قورىن جاساقتاۋعا تيىسپىز.
ادام وزىنىڭ تابيعاتىندا – امبەباپتى تىرشىلىك يەسى, ياعني قانداي بولماسىن, شىعارماشىلىق سالالارىنىڭ بارىنە قابىلەتتى (ەڭ الدىمەن ونەردە). بىراق ادام سونىمەن قاتار رۋحاني-ۇجداندى, «ادامگەرشىلىكتى» تىرشىلىك يەسى. دەمەك, ادام وزىنىڭ شىعارماشىلىعىندا رۋحاني-ۇجداندىق باستاۋلاردى, جوعارى گۋمانيستىك قۇندىلىقتاردى كورسەتۋگە, ايقىنداۋعا مىندەتتى. كەرى جاعدايدا ونەر جاسامپاز, قۇراۋشى ەمەس, قيراتۋشى جويقىن كۇشكە اينالۋى مۇمكىن. ادام بارلىعىنا قابىلەتتى دەسەك, ول ادامداعى ادامگەرشىلىكتىك قاسيەت­تەر­دى دامىتۋعا ەمەس, جەكە ەگوتسەنتريستىك ماقساتتاعى جەكە مۇددەسىنە باعىتتالدى دەلىك. مۇنداي جاعدايدا ونەر شىعارماسىنا قاندايدا بىر كولەڭكە, نەگاتيۆتى اقپارات نە ەنەرگييا ەنۋى مۇمكىن.
س.كرىمسكييدىڭ رۋحانيلىق قۇبىلى­سى­نا بەرگەن انىقتاماسى ەرەن. «رۋحا­ني­لىق – سىرتقى بولمىس ۋنيۆەر­سۋمىن تۇلعانىڭ ىشكى عالامىنا ەتيكالىق نەگىزدە اينالدىرۋ قابىلەتى, سول ىشكى الەمدى قۇراۋ قابىلەتى ارقىلى ۇنەمى وزگەرىپ وتىراتىن جاعدايدىڭ الدىندا ادامنىڭ وزىنە سايكەستىگى مەن ونىڭ ەركىندىگىن جۇزەگە اسىرا بىلۋى. رۋحاني­لىق اقىر اياعىن­دا وزىندىك ماعىنا­لىق كوس­مو­­گونيياعا, الەم وبرازى تۇلعانىڭ ادام­گەر­شىلىك زاڭىمەن بىرىگۋىنە اكەلەدى» دەگەن تولىققاندى پىكىرى بۇل قۇبىلىستىڭ ىسكە اسىرىلۋى ادام مانىمەن تىكەلەي باي­لا­نىستى ەكەنىن جانە ونى اشاتىنىن كورەمىز.
جالپى, ەلىنە, حالقىنا, جۇرتشىلىعىنا پرەزيدەنتتىڭ جولداۋ ارناپ, مەملەكەتتىڭ الداعى كەزەڭدەردەگى دامۋىن جارييا ەتۋ تمد مەملەكەتتەرى عانا ەمەس, امەريكا قۇراما شتاتتارىندا دا بار. الايدا پرەزي­دەنتتىڭ تاڭداعان حالىققا جولداۋ تۇرى ەرەكشە ەكەندىگىن وزگە ەلدەر دە بايقاپ كەلە­دى. اقش سىندى بىرقاتار مەملەكەت­تەر­دىڭ باسشىلارى وز جولداۋلارىن بۇكىل حالىققا ەمەس, جەكەلەگەن مەملەكەتتىك ينستيتۋتتارعا ارناپ جاتادى. جولداۋدى ناقتى بىر مەملەكەتتىك باسقارۋ نەمەسە اتقارۋ ورگاندارىنا ەمەس, حالىققا ارنا­عا­نى­نان-اق ەلباسىنىڭ دەموكراتييا­لىق باسقارۋدىڭ بىرەگەي ۇلگىسىن تاڭداعانىن اڭعارۋ قيىن ەمەس.
مامانداردىڭ ايتۋىنشا, رۋح – بىلىمسىز, سانا سەزىمسىز بايىمايدى. ولار «رۋحاني جاڭعىرۋ» باعدارلاماسىن ۇش اسپەك­تىدە قاراۋدى العا تارتۋدا. وسى وراي­دا, رۋح تا, سانا دا ۇلتتىق مادەنيەتپەن تىعىز بايلانىستى.
رۋحتى جوعارى دەڭگەيگە جەتكىزۋدىڭ بىر­دەن بىر قوزعاۋشى كۇشى ادامدار اراسىن­داعى, ۇرپاقتار اراسىنداعى بىرلەستىكتە دەيمىز. بۇگىنگى تابىسىمىزدىڭ ەل بولىپ, مەملەكەت بولىپ, قازاقستان قوعامى بولىپ جاتقان تابىسىمىزدىڭ وسىنداي بىر ىرگە­تاس­تارى بار. سول نەگىزدىڭ ۇلكەنگە دە, كىشىگە دە ۇلكەن ماڭىزى بار ەكەنىن, تۇسىن­دىرۋ, تالداپ بەرۋ جانە ۇلت مادەنيە­تى­مەن قىز­مەت ەتەتىن ورتادا, مەملەكەت دەڭگەيىندە تىپ­تى الەمگە جار سالا وتىرىپ تانىستىرۋ – كۇن تارتىبىندەگى وزەكتى ماسەلەلەردىڭ بىرى. بولاشاققا باعدار جاساپ, ۇلكەن سەرپىلىس جاساعان ەلىمىزگە قازىر دۇنيەجۇزى تامسانىپ, ۇلكەن ۇمىتپەن قاراپ وتىر. ەندەشە, يگى­لىك­كە بەتتەگەن كەز كەلگەن جاڭا باستامانى ەرەكشە ىقىلاسپەن اتقارىپ, جاڭعىرعان رۋحتىڭ جارشىسى بولۋعا ۇمتىلايىق.

بولىسۋ:

پىكىر جازۋ


*