كورەيا قازاقستانمەن سەرىكتەس بولۋعا دايىن

1248
0
بولىسۋ:

مەملەكەت باسشىسى نۇرسۇلتان نازارباەۆ كورەيا رەسپۋبليكاسى ۇلتتىق اسسامبلەياسىنىڭ سپيكەرى چون سە گيۋنمەن كەزدەستى.
ەلباسى كەزدەسۋ بارىسىندا قازاقستان مەن وڭتۇستىك كورەيا اراسىنداعى ساۋدا-ەكونوميكالىق قارىم-قاتىناستىڭ دامىپ كەلە جاتقانىن جانە ونى ارى قاراي نىعايتۋعا مۇددەلى ەكەنىن اتاپ وتتى.

– قازاقستان كورەيا رەسپۋبليكاسىمەن جاقسى قارىم-قاتىناس ورناتقان. ەلدەرىمىز اراسىنداعى تاۋار اينا­لىمىنىڭ كولەمى 2 ميلليارد دوللارعا جۋىقتادى. سىزدەردىڭ تاۋارلارىڭىزدىڭ بىزدىڭ ەلگە ليانيۋنگان پورتى ارقىلى كەلىپ جاتقانى قۋانتادى, وندا بىزدىڭ لوگيستيكالىق تەرمينالىمىز بار. قازاقستان كورەيامەن جاڭا جانە تسيفرلى تەحنولوگييا, يندۋس­ترييالاندىرۋ, مەديتسينا جانە باسقا دا سالالاردا ىنتىماقتاستىق ورناتۋعا نيەتتى, – دەدى قازاقستان پرەزيدەنتى.
سونىمەن قاتار مەملەكەت باسشىسى قازاقستان مەن وڭتۇستىك كورەيا اراسىنداعى پارلامەنتارالىق قارىم-قاتىناستاردى نىعايتۋدىڭ جانە ولاردى دامىتۋدىڭ ماڭىزدىلىعىنا نازار اۋداردى.
چون سە گيۋن كەزدەسۋگە جانە ەكىجاقتى قاتىناستار ماسەلەسىن تالقىلاۋعا مۇم­كىندىك بەرگەنى ۇشىن نۇرسۇلتان نازارباەۆقا العىس بىلدىردى.
ۇلتتىق اسسامبلەيا سپيكەرى استانانىڭ قارقىندى دامىپ كەلە جاتقانىن ايتىپ, قازاقستاندا وتكەن جاھاندىق ىس-شارا-
لار – حالىقارالىق ەحرو ماماندان­دى­رىلعان كورمەسى مەن دۇنيەجۇزىلىك XXVIII قىسقى ۋنيۆەرسياداعا جوعارى باعا بەردى.
چون سە گيۋن ەكىجاقتى بايلانىستىڭ سترا­تەگييالىق سيپاتتا دامىپ كەلە جات­قانىنا توقتالىپ, «قازاقستان – 2050» سترا­تەگيياسىنىڭ ماقساتتارىنا جەتۋ جولىندا كورەيا قازاقستانمەن سەرىكتەس بولۋعا دايىن ەكەنىن اتاپ وتتى.
بۇدان بولەك, ۇلتتىق اسسامبلەيا سپي­كەرى وتكەن عاسىردىڭ 30-جىلدارىندا قازاق­ستانعا جەر اۋدارىلعان ەتنيكالىق كارىس­تەرگە كومەك قولىن سوزىپ, قولداۋ كورسەت­كەنى ۇشىن ەلىمىزدىڭ حالقىنا العىس بىلدىردى.

بولىسۋ:

پىكىر جازۋ


*