اسكەردەگى 100 جاڭا ەسىمدى تابۋدى ۇسىندى

667
0
بولىسۋ:

ماجىلىستىڭ جالپى وتىرىسىندا بىرقاتار دەپۋتاتتار ۇكىمەت مۇشە­لەرىنە ساۋال جولدادى. اتاپ ايتقان­دا, «نۇر وتان» فراكتسيياسىنىڭ مۇ­شە­سى ب.سماعۇل پرەمەر-مينيستر ب.سا­عىنتاەۆقا قايىرىلىپ, ەلبا­سىنىڭ بيىلعى جولداۋىندا «جاڭعى­رۋ نەگى­زى» دەپ باعالانعان ادامي كا­پيتالدى دامىتۋ قورعانىس سالاسىنا دا تىكەلەي قاتىستى ەكەنىنە نازار اۋدارتتى.

بارلىق وزىق ەلدە جاۋىنگەرلەردىڭ ساپاسىنا, جەكە قۇرامنىڭ مورالدىق-پسيحولوگييالىق جاعدايىنا دەگەن قامقورلىق مەملەكەتتىك ساياسات دەڭگەيىنە شىعارىلعان. ويتكەنى اسكەريلەردىڭ بيىك رۋحى, قارۋلى كۇشتەردەگى قىزمەتىن ماق­تانىش تۇتۋى سايىپ كەلگەندە, جاۋىنگەرلىك دايارلىقتى جانە ەلدىڭ قورعانىس قابىلەتىن جوعارعى دەڭگەيدە قامتاماسىز ەتۋگە ىقپال ەتەدى. قازىرگى زامانعى ارميياعا جۇكتەلگەن مىندەتتەر اسكەري قىزمەت­كەرلەردى اسكەري تاربيەلەۋدى ۇيىمداس­تىرۋعا, ولاردىڭ بويىندا كاسىبي جانە ادامگەرشىلىك قاسيەتتەردى قالىپتاستىرۋ ىسىنە جوعارى تالاپتار قويادى.
– 1993 جىلعى 19 قاڭتاردا قابىلدانعان «قازاقستان قارۋلى كۇشتەرiندە كومان­ديرلەردiڭ (باستىقتاردىڭ) تاربيە جانە الەۋمەتتiك-قۇقىقتىق جۇمىس جونiندەگi ورىنباسارلارىنىڭ ينستي­تۋتىن قۇرۋ تۋرالى» پرەزيدەنت جارلىعىنا سايكەس, «تاربيە جانە الەۋمەتتiك-قۇقىقتىق جۇمىس (تاقج) بويىنشا ورىنباسارلار ينستيتۋتى» قورعانىس مينيسترلىگىنىڭ ورتالىق اپپاراتىنان باستاپ, روتالارعا دەيiنگi بۋىنداردا تەگىس ەنگىزىلدى. الايدا كەيىن بۇل سالا وزگەرىسكە ۇشىراپ, قارۋلى كۇشتەردە وسى جۇمىس باس شتابقا جۇكتەلدى. ناتيجەسىندە, قازىرگى كەزدە مينيسترلىكتىڭ ورتالىق اپپاراتىندا تاقج-نىڭ دەربەس باسقارۋ ورگانى جوق. بۇل تاقج ورگان­دارى مارتەبەسىنە جاۋاپ بەرمەيدى, – دەي كەلە, باقىتبەك سماعۇل قورعانىس مي­نيسترىنىڭ تاربيە جانە الەۋمەتتiك-قۇقىقتىق جۇمىس جونىندەگى ورىنباسارى لاۋازىمىن قايتا قالپىنا كەلتىرۋدى ۇسىندى. بۇل – دامىعان ەلدەر تاجىريبەسى.
سونداي-اق ول قارۋلى كۇشتەردەگى تاربيە جانە الەۋمەتتiك-قۇقىقتىق جۇمىس باعىتتارى قايتا قارالىپ, ەلباسى جا­رييالاعان رۋحاني جانە تەحنولوگييالىق جاڭعىرۋ مىندەتتەرىمەن ۇشتاستىرىلۋعا تيىستىگىن نىقتادى. بۇدان بولەك ب.سماعۇل پرەزيدەنتتىڭ «رۋحاني جاڭعىرۋ» باع­دارلاماسىنداعى باستامانى ۇلگى ەتە وتىرىپ, تاۋەلسىز قازاقستاننىڭ وتان قورعاۋشىلارىنىڭ قاھارماندىعى مەن جەتىستىكتەرىن كورسەتىپ, قوعام اراسىندا ناسيحاتتايتىن «اسكەردەگى 100 جاڭا ەسىم» جوباسىن وتكىزۋ تۋرالى ۇسىنىس ايتتى.
ال نۇروتاندىق دەپۋتات س.قانىبەكوۆ ۆيتسە-پرەمەر – اۋىل شارۋاشىلىعى مينيسترى و.شوكەەۆكە جۇگىنىپ, «2016 جىل­دىڭ قازانىندا ماقتا سالاسىنا قاتىستى ساۋال جولداعانىن, وزەكتىلىگى مەن شەشىلمەگەن ماسەلەلەرگە بايلانىستى وسى تاقىرىپقا قايتادان ورالىپ وتىرعانىن» جەتكىزدى.
«ماقتا شارۋاشىلىعى قازاقستان ەكونوميكاسىندا ەرەكشە ورىن الادى. وقو-دا 500 مىڭعا جۋىق اۋىل تۇرعىنى وسى سالادا جۇمىس ىستەيدى. بۇل حالىقتىڭ الەۋمەتتىك-ەكونوميكالىق جاعدايى مەن ال-اۋقاتى كوبىنەسە, ماقتا شارۋاشى­لىعىنىڭ تيىمدىلىگىنە بايلانىستى. ماقتا وندىرۋ بۇگىندە نارىقتىق ەمەس, الەۋمەتتىك ماسەلەگە اينالدى» دەدى دەپۋتات.
ونىڭ دەرەگىنشە, قازىرگى ۋاقىتتا ەگىستىك الاڭدارى جارتىسىنا دەيىن قىس­قارىپ, تۇقىمدىق ماتەريالدىڭ ساپاسىز بولۋى سالدارىنان ماقتانىڭ ساپاسى ناشارلاپ كەتتى. بۇل «بىرىنشى كەزەكتە, 2007 جىلى ماقتا قولحاتتارى جۇيەسىنىڭ ەنگىزىلۋىنە بايلانىستى», ول تيىمسىز بولىپ, قارجىلاندىرۋدىڭ قولدانىستاعى جۇيەسىن بۇزدى, سالانىڭ قۇلدىراۋىنا اكەپ سوقتى.
سوندىقتان دەپۋتات جاعدايدى تۇزەۋ ۇشىن «شۇعىل شارالاردى قابىلدايتىن كەز كەلدى» دەپ ەسەپتەيدى. ماسەلەن, «زاەم نەگىزدە ۇزاقمەرزىمدى قارجىلاندىرۋدىڭ بانكتەردەن باسقا بالامالى تەتىكتەرىن قاراستىرۋدى» سۇرادى.
ەرىك ەردەنوۆ

بولىسۋ:

پىكىر جازۋ


*