نۇرلان نىعماتۋلين, ماجىلىس توراعاسى: جاڭعىرتۋ جولىنداعى باتىل قادام

2482
6
بولىسۋ:

– ەلباسىمىز نۇرسۇلتان ابىشۇلى نازارباەۆتىڭ پارلامەنت مىنبەرىنەن جارييالاعان بەس پرەزيدەنتتىك الەۋمەتتىك باستاماسى – شىن مانىندە ەلىمىزدى الەۋمەتتىك جاڭعىرتۋ جولىنداعى باتىل تاريحي قادام ەكەنى سوزسىز.
پرەزيدەنتىمىز تاۋەلسىزدىك العان كۇننەن باستاپ حالىقتىڭ ال-اۋقاتى مەن يگىلىگىن كوتەرۋدى بىرىنشى كەزەكتەگى ماڭىزدى ماسە­لەگە قويىپ, وسى جولدا بارلىق جاعدايدى جاساپ كەلەدى.
ال قازىرگىدەي بۇكىل الەم ەكونوميكالىق داعدارىستان الى تولىق ارىلا الماي تۇرعان كەزدە, اۋقىمدى الەۋمەتتىك باستامالارعا جول اشۋ – ەلباسىمىزدىڭ كورەگەن, دانا ساياساتىنىڭ, بولاشاققا نىق باستاي بىلەتىن ەرەن ەرلىگىنىڭ جەمىسى.
ەگەمەندىك العان جىلدار ىشىندە بىز پرەزيدەنتىمىزدىڭ سىندارلى ساياساتىنىڭ ارقاسىندا الەم تانىعان ابىرويلى ەل اتانىپ, تولاعاي تابىستارعا جەتتىك.
قازىرگى ۋاقىتتا قازاقستانىمىز تورتىنشى ونەركاسىپتىك رەۆوليۋتسييا داۋىرىنە, تەحنولوگييالىق, ەكونوميكالىق جانە الەۋ­مەتتىك سالالارداعى تەرەڭ جانە قارقىندى وزگەرىستەر كەزەڭىنە اياق باستى.
دال وسى ۋاقىتتا جارييالانعان الەۋمەتتىك باستامالار – ەلباسىمىز ايتقانداي, ەسەپ-قيسابى مۇقييات جاسالعان, «الەۋمەتتىك مەملەكەت» جولىندا جىگەرىمىزدى جانىپ, ناقتى ىسكە جۇمىلدىراتىن ەلدىڭ يگىلىگىنە ارنالعان ۇتىمدى, سونىمەن قاتار وپتيميستىك جوبا.
وندا ەلىمىزدىڭ اربىر وتباسىن باس­پانامەن قامتاماسىز ەتۋدىڭ, جالاقىسى تومەن جۇمىسشىلاردىڭ ەڭبەكاقىسىن كوبەيتۋ ۇشىن ولاردىڭ سالىق جۇكتەمەسىن ازايتۋدىڭ, جوعارى بىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحانا جاعدايىن جاقسارتۋدىڭ, وزىن-وزى ەڭبەكپەن قامتىعان جانە جۇمىسسىز تۇرعىنداردىڭ اراسىندا جاپپاي كاسىپكەرلىكتى دامىتۋ ۇشىن اتقارىلىپ جاتقان جۇمىستاردىڭ اياسىندا جەڭىلدەتىلگەن شاعىن نەسيە بەرۋدىڭ, ەلدى گازبەن قامتاماسىز ەتۋدىڭ تيىمدى تەتىكتەرى ۇسىنىلىپ وتىر.
وسىنىڭ بارلىعى – ەلىمىزدەگى ميلليونداعان ازاماتتاردىڭ مۇددەسىن قورعايتىن, ومىر ساپاسىن جاقسارتاتىن, جارقىن بولاشاققا دەگەن ۇمىت-سەنىمدەرىن نىعايتاتىن ىرگەلى ىستەر.
سونىمەن بىرگە, بارشا قازاقستان­دىقتاردى ورتاق ماقسات جولىندا بىرىك­تىرەتىن ىنتىماقتىڭ, ىرىس پەن بەرەكەنىڭ قاينار كوزى.
ناقتى ايتقاندا, بەس الەۋمەتتىك
باستا­ما – حالقىمىزدىڭ يگىلىگىن ارتتىرا وتىرىپ, مەملەكەتىمىزدىڭ تۇراقتى دامۋى جولىنداعى ۇلى ماقساتتاردى قامتاماسىز ەتەتىن تەڭدەسى جوق, ەرەكشە سەرپىندى جوبا.
ونى تابىستى جۇزەگە اسىرۋ جولىندا, پارلامەنتكە دە زور جاۋاپكەرشىلىك جۇكتەلىپ وتىر.
سوندىقتان ەلىمىزدىڭ الەۋمەتتىك مەملەكەت پەن ۇلتتىق وركەندەۋدىڭ شىنايى, ارى سىندارلى قازاقستاندىق مودەلىن جاساۋعا جول اشاتىن الەۋەتتى باستامالاردى وتە جوعارى دەڭگەيدە, ساپالى زاڭدارمەن قامتاماسىز ەتۋ – پارلامەنت دەپۋتات­تارىنىڭ ەڭ نەگىزگى, ەڭ جاۋاپتى, ەڭ ابىرويلى مىندەتى.


قاسىم-جومارت توقاەۆ,  سەنات توراعاسى:

– ەلباسىنىڭ الەۋمەتتىك نەگىزگى 5 ما­سەلەنى شەشۋ جونىندەگى جولداۋى قا­زاقستان مەملەكەتتىگىن دامىتۋ جولىنداعى ەرەكشە تاريحي كەزەڭ. جولداۋ حالقىمىزدىڭ مۇددەسىمەن ۇندەس كەلەدى. ن.نازارباەۆ: «ۇلتتىق بىرلىك – الەۋمەتتىك بىرلىك» دەدى.


الي بەكتاەۆ, سەنات دەپۋتاتى:

باستامالاردى حالىق قولدايدى
– ەلباسىنىڭ بۇعان دەيىنگى بارلىق جول­داۋلارى دا حالىق ومىرىنىڭ الەۋمەتتىك ماسەلەلەرى مەن قىرلارىن قامتيتىن. بىراق مەملەكەت باسشىسىنىڭ بۇگىنگى «بەس الەۋمەتتىك باستا­ماسىن» شىن مانىندە تاريحي قادام دەپ باعالاۋى­مىزعا بولادى. ويتكەنى ولار قا­زاقستاندىقتاردى تولعانتىپ وتىرعان باستى-باستى ارى كوكەيتەستى پروبلەمالاردىڭ شەشىمىن ۇسىنادى.
بۇل باستامالاردى حالقىمىز تولىق قول­دايدى. سەبەبى, ولار ەلدىڭ تۇرمىس-تىرشىلىگىن, الەۋەتىن, الەۋمەتتىك جاعدايىن جاقسارتۋدى كوزدەيدى.
اسىرەسە, اۋىل تۇرعىندارىن شاعىن نەسيە­لەن­دىرۋ ماڭىزدى بولىپ تابىلادى. ەگەر ەندى جىل سايىن 14 مىڭ ادام ميكروكرەديت الار بولسا, ەلدە كەم دەگەندە وسىنشا جاڭا جۇمىس ورىندارى قوسىمشا اشىلادى دەگەن سوز. ەگەر سول ازامات­تاردىڭ بىرازى ىسىن كەڭەيتىپ, ەڭ كەمى 2-3 ادامعا جۇمىس بەرسە, 30-40 مىڭ جۇمىس ورنى قۇرىلماق.
بۇل باستامانىڭ ۇلكەن ماڭىزى بار. سەبەبى, كەز كەلگەن قازاقستاندىققا وز ىسىن اشۋعا مۇم­كىندىك جاسالىپ وتىر.
مەنىڭ ويىمشا, ەلباسى تەك اۋىلدىقتار نەمەسە جاستار ۇشىن عانا ەمەس, بارشا قازاق­ستان­دىقتار ۇشىن ۇلكەن الەۋمەتتىك تارتۋ جاسادى.

سەرىك بەكتۇرعانوۆ, سەنات دەپۋتاتى:

ازاماتتاردىڭ ال-اۋقاتىن ارتتىرۋ جولى
– پارلامەنت پالاتالارىنىڭ بىرلەسكەن وتى­رىسىندا ايتىلعان پرەزيدەنتتىڭ بەس باستاماسى ميلليونداعان ازاماتتارىمىزدىڭ ال-اۋقاتىن ارتتىرۋعا تەڭدەسىز اسەر ەتەتىنى سوزسىز.
وسى ورايدا, بارلىق قازاقستاندىقتار پرەزيدەنت ۇسىنعان باستامالاردى بىراۋىزدان قولدايتىنىنا سەنىمدىمىن.
ەلباسىمىز الەۋمەتتىك-ەكونوميكالىق دامۋ مىندەتتەرىن شەشۋ جولدارىن ۇسىنا وتىرىپ, ولاردىڭ ناقتى ەسەپتەۋلەرگە نەگىزدەلگەنىن جانە قارجىلاي قامتاماسىز ەتىلەتىنىن ايتتى.
بۇدان باسقا, ولار مۋلتيپليكاتيۆتى ناتيجەگە يە بولادى. اتاپ ايتقاندا, قۇرىلىس سالاسىن دامىتۋدا تۇرعىن ۇي نەسيەسىنىڭ قولجەتىمدىلىگى باستاماسى, شاعىن جانە ورتا بيزنەستى دامىتۋدا ازاماتتارعا بەرىلەتىن ميكرونەسيەلەۋگە بولىنەتىن سومانى ارتتىرۋ, جاستاردى جۇمىسپەن قامتاماسىز ەتۋ مەن جوعارى بىلىم الۋعا بولىنەتىن گرانتتار كولەمى مەن قارجىنى ۇلعايتۋ, جاڭا گاز قۇبىرى سالى­ناتىن وڭىرلەردە ەكولوگييانى جاقسارتۋ جانە تۇرعىنداردىڭ تۇرمىستىق ماسەلەلەرىن شەشۋ.
ەلباسى ۇسىنعان كولەمدى يدەيالار بىر كۇندە تۋىنداماعان. ولار تۋرالى سوز قوزعاۋ بىر بولەك تە, ولاردى ناقتى شەشۋ ۇشىن پرەزيدەنتىمىز نەگىز قالىپتاستىراتىن ماڭىزدى باستامالاردى ۇسىنىپ وتىر. قوعامداعى تۇراقتىلىقتى ساقتاي وتىرا ەكونوميكانى جوسپارلى تۇردە دامىتۋ ارقىلى ەلباسى اتالعان كۇرمەۋى قيىن ماسە­لەلەردى شەشۋدىڭ نەگىزىن نىق قالىپتاستىرا بىلدى.
قازاقستاننىڭ ۇستانىپ وتىرعان جولى – ازا­ماتتارىمىزدىڭ ال-اۋقاتىن جوسپارلى ارتتىرۋدىڭ, تۇراقتى قوعام قالىپتاستىرۋدىڭ, ورتاق ماقساتتارعا قول جەتكىزۋدە كۇش-جىگەردى بىرىكتىرۋدىڭ جولى.

ازات پەرۋاشەۆ,
ماجىلىس دەپۋتاتى, «اق جول» فراكتسيياسىنىڭ جەتەكشىسى:

كاسىپكەرلىكتى دامىتۋ ورىستەتىلەدى
– «پرەزيدەنتتىڭ بەس الەۋمەتتىك باستاماسى» اراسىنان مەن سالىق جۇكتەمەسىن ازايتۋ ارقىلى جالاقىسى تومەن جۇمىسشىلاردىڭ ەڭبەك­اقىسىن كوبەيتۋدى اتاپ وتكىم كەلەدى. بۇل رەتتە الداعى 2019 جىلدىڭ 1 قاڭتارىنان باستاپ ولاردىڭ سالىق جۇكتەمەسى 10 ەسەگە ازايتىلادى, ياعني 1% عانا سالىق ۇستالا باستايدى. بۇل ەكى ميلليونداي ادامدى قامتىماق. وسىدان-اق اتالعان باستامالاردىڭ الەۋمەتتىك ماعىناسى ايقىندالادى.
سونداي-اق الدا اۋىل بيزنەسىن قولداۋ, وزىن-وزى ەڭبەكپەن قامتىعان جانە جۇمىسسىز تۇرعىندار اراسىندا جاپپاي كاسىپكەرلىكتى دامىتۋ ورىستەتىلەدى. ول ۇشىن ۇكىمەتكە بيىل قوسىمشا 20 ميلليارد تەڭگە بولىپ, شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋ جۇكتەلدى. ناتيجەسىندە, ميكروكرەديت الاتىنداردىڭ سانى بىلتىرعى جىلمەن سالىستىرعاندا, 2 ەسەگە ارتىپ, 14 مىڭ ادامدى قۇ­راۋعا تيىس. سويتىپ, اۋىلدا دا قوعام مەن ەكونومي­كانىڭ تىرەگى بولار ورتا توپتى قۇرۋ كوزدەلەدى.
ەلباسى بارلىعىن انىق ايتتى, تاپسىرمالار جۇكتەدى. ولاردى تيىمدى جۇزەگە اسىرۋ مىندەتى ەندى ۇكىمەتتىڭ موينىندا. مەملەكەت باسشىسى باستا­مالاردى تابىستى ىلگەرىلەتۋ ۇشىن قاجەتتى مۇمكىن­دىكتەردىڭ جانە رەسۋرستاردىڭ بارلىعىن, ەسەپتەمەلەرى جاسالعانىن ەسكەرتتى.

ۆلاديسلاۆ كوسارەۆ,
ماجىلىس دەپۋتاتى, «حالىقتىق كوممۋنيستەر» فراكتسيياسىنىڭ جەتەكشىسى:

بۇدان بۇكىل قوعام ۇتادى
– مەملەكەت باسشىسىنىڭ بۇگىنگى ۇندەۋى تەك اعا ۇرپاققا عانا ەمەس, جاستارعا دا قىزىقتى بولسا كەرەك. بۇل – جاستاردى قولداۋعا باعىتتالعان ۇلكەن باعدارلاما. ماسەلەن, پرەزيدەنت جىل سايىن بولىنەتىن 54 مىڭ گرانتقا قوسىمشا 2018-2019 وقۋ جىلىندا تاعى 20 مىڭ گرانت بولۋدى جۇكتەدى. وسىلايشا, گرانت بويىنشا عىلىم مەن ماماندىقتى تەگىن مەڭگەرەتىن قازاقستاندىقتار سانى بىر جارىم ەسەدەي وسكەلى وتىر.
بۇل رەتتە نۇرسۇلتان نازارباەۆ جاڭا گرانتتاردىڭ 11 مىڭى تەك تەحنيكالىق ماماندىقتار بويىنشا باكالاۆرلىق بىلىم بەرۋگە باعىتتالۋعا تيىستىگىن نىقتادى. سەبەبى, بىزدە الى كۇنگە زاڭگەرلىك, ەكونوميكالىق جانە قارجىگەرلىك ماماندىقتاردىڭ باسىمدىعى ساقتالۋدا. ال تەحنيكالىق-تەحنولوگييا­لىق ورلەۋگە ەكپىن بەرەتىن ماماندار از.
بۇل باستاما ارقاسىندا قانات قاعار جاڭا ماماندار ەل ەكونوميكاسىن كوتەرۋگە, تەحنيكالىق جاڭعىرۋعا سۇبەلى ۇلەستەرىن قوساتىن بولادى. ەرتەڭ جاڭا جۇمىس ورىندارىن تۇزەتىن, جاڭا ونىمدەردى جاسايتىن, وزىق تەحنولوگييالاردى ويلاپ تاباتىن دا سولار بولادى. بۇل وز كەزەگىندە حالىقتىڭ ال-اۋقاتىنىڭ كوتەرىلۋىنە ىقپال ەتەدى. ياعني, بۇدان بۇكىل قوعام ۇتادى.

ومارحان وكسىكباەۆ, ماجىلىس دەپۋتاتى:

باسپانا ماسەلەسى شەشىلەدى
– پرەزيدەنتتىڭ بەس باستاماسى قازاقستان­دىقتاردىڭ بىراز ماسەلەسىن شەشۋگە باعىتتالعان. ەگەر ازاماتتار وز مۇمكىندىكتەرىن دۇرىس جۇزەگە اسىرا بىلسە, الەۋمەتتىك جانە ەكونوميكالىق جاعدايلارىن تۇزەتۋگە بار جاعداي جاسالۋدا.
شىنى كەرەك, قازىرگى ۋاقىتتا قازاقستاندىق­تاردىڭ, اسىرەسە, جاستاردىڭ ۇلكەن ماسەلە­لەرىنىڭ بىرى ارى بىرەگەيى – باسپانا تۇيتكىلدەرى. باسىندا باسپاناسى بولماسا, ول ادامنىڭ ىستەگەن ىسىنىڭ بەرەكەسى دە بولمايدى. سوندىقتان مەملەكەت باسشىسى وسى تۇيىندى تارقاتۋعا باسا مان بەرىپ وتىر.
ەلباسىنىڭ «7–20–25» باعدارلاماسىنداعى 7 پايىزدىق مولشەرلەمە جۇرتشىلىق ۇشىن وتە قولجەتىمدى مەجە. بۇعان دەيىن دە «تۇرعىنۇي قۇرى­لىسجيناقبانكى» 5-8 پايىزبەن يپوتەكا بەرىپ كەلگەن, ارينە, وعان قول جەتكىزۋ ۇشىن بىراز ۋاقىت جيناقتاۋ تالاپ ەتىلەتىن. ونىڭ ۇستىنە قازىر بانكتەر باستاپقى جارناعا پاتەر-ۇي قۇنىنىڭ – 30, كەيدە تىپتى 50 پايىزىن بىردەن سالۋدى تالاپ ەتسە, بۇل باعدارلاما بويىنشا ول 20 پايىزدان اسپاۋعا تيىس. بۇل ورتا تابىستى وتانداستارىمىز الدىنا يپوتەكا الۋ مۇمكىندىگىن اشادى. بۇل بىراز قازاقستاندىقتىڭ باسپا­ناسىزدىق ماسەلەسىن شەشۋگە ىقپال جاساۋعا تيىس.
ەرلان ساعاديەۆ, بىلىم جانە عىلىم مينيسترى:

جوبالاردى ىسكە اسىرۋعا كىرىسەمىز
– «پرەزيدەنتتىڭ بەس الەۋمەتتىك باستاماسى» اياسىندا بىزدىڭ سالامىزعا قاتىستى دا وتە جاقسى جاڭالىقتار جارييا ەتىلدى. وسى وزەكتى ماسەلەلەردى كوتەرىپ قانا قويماي, شەشىمىن ايتقانى ۇشىن ەلباسىعا ري­زاشىلىعىمىزدى بىلدىرگىمىز كەلەدى. ەندى بىز ناقتى جوبالاردى دايىنداپ, ىسكە اسىرۋعا كىرىسەمىز.
ەلباسى ستۋدەنتتەردىڭ بىلىم الۋىنا جانە تۇراتىن جەرىنە جاعداي جاساۋعا لايىقتى نازار اۋدارۋدى تاپسىردى. بۇل رەتتە جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى كوكەيكەستى بولىپ وتىر. سوندىقتان پرەزيدەنت 2022 جىل اياقتالعانشا, ستۋدەنتتەر ۇشىن كەمىندە 75 مىڭ ورىندى جاڭا جاتاقحانالار سالۋ مىندەتىن قويدى.
جاتاقحانالاردى ۋنيۆەرسيتەتتەردىڭ وزدەرى دە, سونداي-اق مەملەكەتتىك-جەكەمەنشىك ارىپتەستىك تەتىكتەرى بويىنشا بيزنەس تە سالا الادى. جەرگىلىكتى اكىمدىكتەر دە بۇل ىسكە تارتىلسا, جول اشىق. ال بىز جاتاقحانالارداعى اربىر ورىن ۇشىن جان باسىنا شاققانداعى قارجىلاندىرۋدى ەنگىزەتىن بولامىز. بۇل تەتىك وسى سالانى بانكتەر جانە دەۆەلوپەر-كومپانييالار ۇشىن قىزىقتى ەتۋگە تيىس.
مەنىڭ ويىمشا, 75 مىڭ ورىندى جا­تاقحانالاردى ۇش-تورت جىل ىشىندە تۇرعىزىپ شىعۋعا بولادى.
ەلباسى تاپسىرماسى بويىنشا قوسىمشا بولىنگەلى وتىرعان 20 مىڭ گرانت جايىنا كەلسەك, مينيسترلىك ولاردى مەملەكەتتىك نەمەسە جەكە جوو-لارعا وز بەتىنشە بولمەيدى. ونداي تاجىريبە تيىلعان. مەملەكەتتىك بىلىم گرانتتارى ۇبت قورىتىندىسى بويىنشا بولىنەدى. ارى قاراي گرانتتى جەڭىپ العان تالاپكەرلەر قانداي جوو-عا – ۇلتتىق الدە جەكە ۋنيۆەرسيتەتكە باراتىنىن وزى تاڭدايدى. دەمەك, جاڭا گرانتتار دا وسى قاعيدا نەگىزىندە وز باعىتىن تابادى.
تەك ماگيستراتۋرا, دوكتورانتۋرا بويىنشا گرانتتار عانا ناقتى جوو-لارعا ۇلەستىرىلەدى.

يكرام حاشيمجانوۆ,
قازاقستان وزبەكتەرىنىڭ «دوستىق» قاۋىمداستىعىنىڭ توراعاسى:

جاڭا بەلەستەردى باعىندىرامىز
– جالپى, قازاقستان پرەزيدەنتىنىڭ اربىر جولداۋى ەكونوميكالىق احۋال سىرتىندا, قازاقستاندىقتاردىڭ الەۋمەتتىك جاعدايىن دا جاقسارتاتىن كەزەكتى قادام بولىپ سانالاتىنى مالىم. ال بۇگىنگى جاڭا بەس باستاما ناقتى الەۋمەتتىك مازمۇنىمەن دارالانىپ وتىر.
پرەزيدەنتتىك باستامالاردى جۇزەگە اسىرۋعا قازاقستان حالقى اسسامبلەياسىنىڭ وكىلدەرى دە بەلسەنە اتسالىساتىن بولادى. ويتكەنى بىزدىڭ اسسامبلەيا ەلباسى ايتقان بىرلىكتى نىعايتۋ ۇردىسىنىڭ باسىنان تابىلۋى شارت. ەتنوسارالىق تاتۋلىق پەن ەلدەگى تىنىشتىق ارقاسىندا ەلىمىز وسىنداي ۇلكەن ەكونوميكالىق, الەۋمەتتىك سەرپىلىس جاساي الىپ وتىر. ىنتىماقتى ارى قاراي دا ىرىسقا ۇلاستىرۋ ارقىلى بىز ەندى جاڭا بەلەستەردى باعىندىرا الامىز.
بىز ۇشىن «پرەزيدەنتتىڭ بەس الەۋمەتتىك باستاماسىنىڭ» تاريحي جانە ساياسي ماڭىزى بار. قازاقستانداعى بارلىق ەتنوس وكىلدەرى ونى بىراۋىزدان قولداپ, شاپاعاتىنىڭ كوكتەم شۋاعىنداي كەڭ تارالۋىنا ۇلەستەرىن قوسارىنا سەنىمدىمىن.

بولىسۋ:

6 پىكىر جازىلعان

  1. دوس 6 ناۋرىز, 2018 at 16:11 جاۋاپ

    كەشەگى ەلباسىمىزدىڭ ۇندەگەن 5 باستاماسى ەلىمىزدىڭ تۇراقتى دامىپ كەلە جاتقانىنىڭ كورىنىسى

  2. اسەل 6 ناۋرىز, 2018 at 16:23 جاۋاپ

    ايتقان 5 باستاماسى دا الەۋمەتتىك ماسەلەلەردىڭ شەشىمى. حالىقتىڭ وزىنشە شەشە الماي كەلە جاتقان پروبلەمالارى ەدى

  3. اسەم 6 ناۋرىز, 2018 at 16:28 جاۋاپ

    باعدارلامالاردىڭ قاشان ورىندالاتىنىن اسىعا كۇتەمىز. ەستىگەننەن بەرى وتە قۋانىشتىمىز.

  4. گارري 6 ناۋرىز, 2018 at 16:43 جاۋاپ

    دۇرىس, پرەزيدەنت تۇرلى باعدارلامالارمەن قاتار, ەندى ۇندەۋ جولداپ, بەس باستامانى جۇزەگە اسىرىپ جاتىر. بۇل دەگەن, شەنەۋنىكتەردىڭ مويىنىنا تاعى دا جۇك ارتىلدى دەگەن سوز.

پىكىر جازۋ


*