زاڭنامادا وتەماقى قاراستىرىلادى

1015
0
بولىسۋ:

ماجىلىس توراعاسى نۇرلان نىعماتۋليننىڭ توراعالىعىمەن پالاتانىڭ بيۋرو وتىرىسى وتتى. وندا ماجىلىستىڭ كەلەسى جالپى وتىرىسى كۇن تارتىبىنىڭ جوباسى قالىپتاستىرىلدى. الداعى سارسەنبىدە دەپۋتاتتار ساقتاندىرۋ ماسەلەلەرىنە قاتىستى, سونداي-اق مەنشىك قۇقىعىن قورعاۋدى كۇشەيتۋ جانە تورەلىك ماسەلەلەرى بويىنشا زاڭنامالىق تۇزەتۋلەردى بىرىنشى وقىلىمدا قارايتىن بولادى. 

ۇلتتىق بانك ازىرلەگەن ساقتاندىرۋ قىزمەتىنە قاتىستى جاڭا زاڭ جوباسى ساقتاندىرۋ قىزمەتتەرىن ۇسىنۋشىلارعا دەگەن جەكە تۇلعالاردىڭ سەنىمىن ارتتىرۋعا ىقپال ەتىپ, قارجىلىق قىزمەتتەردى تۇتىنۋشىلاردىڭ قۇ­قىق­تارىن قورعاۋدىڭ تيىمدى تەتىگىن قۇرۋعا باعىتتالعان.
قالاۋلىلار بۇدان بولەك, تورەلىك-اربيتراج­دى جانە جەكەمەنشىكتى قورعاۋدى كۇشەيتۋدى قاراس­تىراتىن جاڭا زاڭ جوباسىن دا بىرىنشى وقىلىمدا تالقىعا سالماق. جوبا نەسيەلىك كەلى­سىمشارتار بويىنشا كرەديتور مەن قارىز الۋ­شى مۇددەلەرىنىڭ تەڭگەرىمىن قامتاماسىز ەتۋگە, مەملەكەت مۇقتاجدىقتارى ۇشىن الىناتىن مۇلىك قۇنىنا تەڭبە-تەڭ كولەمدە وتەماقى تولەۋدىڭ نەگىزدەرىن بىرەگەيلەندىرۋگە باعىتتالعان. سونىمەن بىرگە, مۇلىكتى يەلەنۋ, پايدالانۋ جانە وعان بيلىك ەتۋ سيياقتى مەنشىك قۇقىقتارىن قورعاۋدى كۇشەيتۋ, داۋدى رەتتەۋدىڭ بالاما تاسىلى رەتىندە تورەلىك سالاسىن رەتتەي­تىن زاڭنامانى جەتىلدىرۋ سيياقتى باسقا دا ماقساتتاردى كوزدەيدى.
الداعى جالپى وتىرىستارىندا پالاتا دەپۋتاتتارى 1992 جىلعى 6 شىلدەدەگى تمد ەكونوميكالىق سوتىنىڭ مارتەبەسى تۋرالى كەلى­سىمگە وزگەرىستەر ەنگىزۋ تۋرالى حاتتامانى راتيفيكاتسييالاۋعا بايلانىستى زاڭ جوباسى بويىنشا بەيىندى كوميتەتتىڭ قورىتىندى ازىرلەۋ مەرزىمىن تاعايىندايدى دەپ كۇتىلۋدە.

 

ايحان شارىپ

بولىسۋ:

پىكىر جازۋ


*