تۋعان اۋىل وتتارى

875
0
بولىسۋ:

ەلورداداعى «استانا» كونتسەرت زالىندا تورعايلىق كومپوزيتور التىنباي سەيىتقاسىمنىڭ شىعارماشى­لىعىنا ارنالعان «تۋعان اۋىل وتتارى» اتتى كەش وتتى.

كەشتىڭ ماقساتى – «رۋحاني جاڭعىرۋ» باعدارلاماسىنىڭ «تۋعان جەر» باعىتى بويىنشا اتقارىلاتىن جۇمىستاردىڭ مادەني مازمۇنىن بايىتۋعا ۇلەس قوسۋ. سازگەر التىنباي سەيىتقاسىم – قايدا جۇرسە دە تۋعان جەرىن جۇرەگىنىڭ تورىندە ساقتاپ, وعان جۇرەگىنەن شىققان نازىك اۋەندەرىن, جىرلارىن ارناعان ونەرپاز. سوندىقتان دا ونىڭ تۇلعا­-
سىن ەلباسىمىزدىڭ «تۋعان جەرگە, ونىڭ مادەنيەتى مەن سالت-داس­تۇرلەرىنە ايرىقشا ىڭكارلىكپەن اتسالىسۋ – شىنايى پاتريوتيزمنىڭ ماڭىزدى كورىنىستەرىنىڭ بىرى» دەگەن سوزدەرىمەن سيپاتتاۋعا بولادى.
بەلگىلى جۇرگىزۋشى جاسۇلان ايساعاليەۆ جۇرگىزگەن كەشكە كوم­پو­زي­توردىڭ ۇزاق جىل بويى شىعارماشىلىق بايلانىستاعى ارىپتەستەرى قازاقستاننىڭ حالىق اقىنى قونىسباي ابىل, اقىن ناعاشىباي مۇقاتوۆ, كومپوزيتورلار باقىتجان ساۋەكەنوۆ, قاليبەك دەرىپسالدين, كومپوزيتوردىڭ شىعارمالارىن ورىنداۋشى بەلگىلى ونەرپازدار انار مۇزداحانوۆا, دوسىمجان تاڭاتاروۆ, ورازبەك عالىموۆ, گۇلميرا جانگەلدى, مەدەت شايكەلوۆ, شاحاريزات سەيداحمەت جانە باسقا دا ونەرپازدار بولدى.
كومپوزيتورلىق ومىربايانى وتكەن عاسىردىڭ 80-جىلدارىنان باستاۋ الاتىن التىنباي سەيىتقاسىم 1957 جىلى 10 تامىزدا قوستا­-
ناي وبلىسى جانكەلدين اۋدانىنىڭ شەگەن اۋىلىندا كوپبالالى وتباسىندا دۇنيەگە كەلگەن. مەكتەپتەن سوڭ اقتوبە قالاسىنداعى رەس­پۋبليكالىق مادەني-اعارتۋ ۋچيليششەسىن بىتىرىپ, تۋعان اۋىلىنا ورا­لادى. سول كەزدەن بەرى تۋعان اۋىلى, ەر جەتىپ, ەسەيگەن مەكەنى ونىڭ شى­عارماشىلىعىنىڭ ارقاۋىنا اينالعان. بۇعان ونىڭ «اقشىعاناق», «تۋعان اۋىل وتتارى», «اينالايىن, تورعايىم», «استانا» تاعى باسقا شىعارمالارى دالەل بولا الادى.
كونتسەرتتە سازگەردىڭ تورعايلىق جەرلەستەرى دە از بولمادى. كەشتەگى قۇلاق قۇرىشىن قاندىرار اۋەندەرگە كوڭىلى تولعان تىڭدارماندار كومپوزيتورعا زور ىلتيپاتىن بىلدىردى.
نۇراي راحىم

بولىسۋ:

پىكىر جازۋ


*