قولاعا قول جەتكىزگەن گالىشەۆا

1265
0
بولىسۋ:

وڭتۇستىك كورەيادا وتىپ جاتقان وليمپيادا اۋماعىندا الاقايلاپ, بورىكتى اسپانعا اتار اتاۋلى سەبەپ بار. ويتكەنى بيىلعى باس بايگەدەگى العاشقى مەدال – ەنشىمىزدە. جارىستىڭ ۇشىنشى كۇنىندە فريستايلشى يۋلييا گالىشەۆا قازاقستاندى قولا جۇلدەمەن قۋانتتى.

گالىشەۆانىڭ جاسى – 25-تە. شىعىس قا­زاقستاندا دۇنيەگە كەلگەن سپورتشىنىڭ ەڭ العاش قاتىسقان حالىقارالىق جارىسى 2006 جىلعى ەۋروپا كۋبوگى ەدى. ەكى جىل­دان كەيىن ەلىمىزدىڭ ۇلتتىق قۇراماسى سا­پىنا قوسىلعان. سپورتشىنىڭ بىر باسىن­دا بولۋى تيىس بارلىق مەدال يۋلييادا بار. جەتپەي جۇرگەنى وليمپيادا جۇلدەسى ەدى. وعان دا قول جەتكىزدى. اتاپ ايتقاندا, گا­لىشەۆا – الەم بىرىنشىلىگىنىڭ كۇمىس جانە قولا جۇلدەگەرى, ازييا ويىندارىنىڭ ۇش دۇر­كىن جەڭىمپازى, ۋنيۆەرسيادا چەمپيو­نى, الەم كۋبوگى كەزەڭدەرىنىڭ تۇرلى جۇل­دە­لەرىنىڭ يەگەرى. بۇل – يۋلييانىڭ ۇشىنشى وليم­پياداسى. 2010 جىلى ۆانكۋۆەردە 11-ورىن, 2014 جىلى سوچيدە 7-ورىننان كو­رىن­گەن بولاتىن.

فريستايلدىڭ موگۋل تۇرىنەن جارىس­تىڭ وتۋ ادىسى وزگەشە. مەدال الۋ جولىندا ۇش اقتىق كەزەڭنەن سۇرىنبەۋ قاجەت. بى­رىن­شى فينالدىق كەزەڭدە ىرىكتەۋدەن وتكەن جيىر­­ما سپورتشى وزارا جارىسادى. ونىڭ ىشىن­دە 12-سىنە عانا كەلەسى فينالعا جولدا­ما بەرىلەدى. شەشۋشى اقتىق سىنعا تەڭ جار­­تىسى شىعادى. وسى التى سپورتشى وليم­­پيادا مەدالدارىنا تالاسادى. يۋلييا بىرىنشى فينالدا 7-ورىننان كورىن­دى. ودان كەيىن ۇزدىك التىلىقتىڭ ىشىنەن تابىلدى. Big final-دى العاشقى بولىپ باس­تاپ, 77,40 ۇپاي يەلەندى. ەندى قالعانى – وزگە قار­سىلاستاردىڭ ناتيجەسىن باعۋ عانا. التى ارۋدىڭ ارقايسىنا توقتالا كەتسەك, گالىشەۆادان سوڭ جارىستى اۆسترالييالىق دجاكارا ەنتوني جالعادى. ۇپايى – 75,35. كوڭىلگە ۇمىت ۇيالاي باستادى, ويتكەنى بىزدىڭ سپورتشىنىڭ بالى باسىم. بىراق قۋانۋعا الى ەرتە. ودان كەيىن كانادالىق مو­گۋلشى جيۋستين ديۋفۋر-لاپۋانت (77,56) جارىسقا شىقتى. ۇپاي سانى يۋلييا­دان جوعارى. ەندى ۇمىتكە كۇدىك قوسىلدى. تورتىنشى بولىپ فرانتسييالىق پەررين لياففون (78,65) شىقتى. ازىرگە ۇزدىك ۇشتىك انىقتالدى. دەگەنمەن ۇلكەن في­نالعا جولداما العان الى ەكى سپورت­شى­نىڭ بار بولاتىن. ەكىنشى اقتىق سىندا تومەن ناتيجە كورسەتكەندەر باس فينالدا بىرىن­شى شىعاتىنىن ەسكەرسەك, ەندىگى قوس سپورت­شى جوعارى ۇپاي العاندار ەدى. اۆست­رالييالىق بريتني كوكس پەن كانادالىق ەندي ناۋديدىڭ ناتيجەلەرى قازاقستاننىڭ قولا مەدال الارىن نە الماسىن كورسە­تە­تىندىكتەن, جانكۇيەرلەر بىر سات سىلتىدەي تى­نا قالدى. كوكس كەدەرگىلەردەن وتەردە قا­تەلىك جىبەرىپ, 75,08 ۇپايمەن جارىستى اياق­تادى. ناۋدي بولسا, جىلدامدىعىن باس­­قارا الماي, تراسسادان شىعىپ قالدى. وسىلايشا, الدىڭعى كەزەڭدەردەگى باس فا­ۆوريتتەر وليمپيادا مەدالىن يەلەنە ال­مادى.
تورتجىلدىق دوداسىنان حابار تارا­تۋ­عا اتتانعان تىلشىلەرگە گالىشەۆا قىسقا-نۇسقا پىكىر بەرگەن ەدى. سول جەردە سپورتشى اعىنان جارىلىپ, جارىسقا قولىنداعى گيپ­سىن شەشپەستەن قاتىسقانىن جەتكىزدى. «جۇلدە العانىمدى الى تولىق سەزىنگەن جوق­­پىن. بىراق وتە باقىتتىمىن. كومان­داما راقمەت. ىشىمنەن تورتىنشى ورىن ال­عان­­شا بەسىنشى ورىن العانىم جاقسى دەپ وي­­لاپ تۇردىم. سەبەبى, تورتىنشى ورىن ال­سام, سوققى بولار ەدى. اۋا رايى سۋىق بول­عا­­نىمەن قاتتى كەدەرگى كەلتىرگەن جوق. تەك قو­لىم اۋىرىپ تۇر. ۇش اپتا بۇرىن اقش-تاعى جارىستا قولىمدى سىندىرىپ العان­مىن. قازىر بىر قولىم گيپستالعان. سوعان قاراماستان جارىسقا شىقتىم» دەيدى قو­لا جۇلدەگەر.
1994 جىلعى وليمپيادا چەمپيونى, بەل­گىلى شاڭعىشى ۆلاديمير سميرنوۆ گالىشەۆاعا قاتىستى پىكىرىن بىلدىرىپ, قۇت­تىقتادى. «يۋلييا ۇشىن وتە قۋانىشتى­مىن. بۇل مەدالعا ەڭبەگىنىڭ ناتيجەسىندە قول جەتكىزىپ وتىر. باستى ۇمىتكەرلەردىڭ بىرى ەدى. وتكەن وليمپيادادا جۇلدەگە سال عانا جەتپەي قالىپ ەدى. وسى جولى جوعارى نا­تي­جە كورسەتتى. دەگەنمەن بۇل قازاق­ستان­­نىڭ وسى وليمپياداداعى جالعىز مە­دالى بول­ماس دەپ ۇمىتتەنەمىن» دەدى ۆ.سميرنوۆ.

جادىرا اققايىر

بولىسۋ:

پىكىر جازۋ


*