«Үшінші жаңғыру» зор міндет қойды

Елбасы былтырғы «Қазақстанның үшінші жаңғыруы: жаһандық бәсекеге қабілеттілік» Жолдауында Қазақстанның 2050 жылы дамыған 30 елдің қатарына қосылуы тиістігін алға тартып, сол мақсатқа табандылықпен ілгерілеу қажеттігін айтқан болатын. Үшінші жаңғыру жөнінде жаңа міндеттер қойып, Үкіметке және де бірнеше мемлекеттік құрылымдарға нақты тапсырмалар жүктеді. Бұл туралы Мемлекет басшысы Нұрсұлтан Назарбаев «Тәуелсіздік дәуірі» кітабындағы тәуелсіз еліміздің 33 нәтижесінің 29-тармақшасында көрсетілген.

Мәселен, оған дейінгі жолдауларында Елбасы негізінен әлеуметтік салаларға (білім беру, медицина, зейнетақы мен жәрдемақы, шәкіртақыны өсіру және т.б.) және индустрияландыруға басымдық берсе, бұл жолы Үкіметтің алдына жаңа технологияларды дамыту, экономиканы жаппай цифрландыру секілді тапсыр­маларды қойды.

2017 жылы Президент Н.Назарбаев Қазақстанның үшінші жаңғыруын жариялады. Сонымен мемлекет пен қоғам жаңаруының үш бірдей: саяси (конституциялық реформа), экономикалық (2017 жылғы Жолдау) және рухани жаңғыру (Елбасының «Болашаққа бағдар: рухани жаңғыру» еңбегі) үдерісіне жол ашылды.

Бұл тұрғыда Елбасы «Тәуелсіздік дәуірі» еңбегінде кең ауқымда түсіндіріп өткен: «Үшінші жаңғыру еліміздің алдына тағы бір үлкен мақсат қояды – Қазақстан­ның жаңа жаһандық ахуалда бәсекеге қабілеттілігін қамтамасыз ететін, XXI ғасырдың ортасында әлемдегі ең дамыған отыз мемлекеттің қатарына қосылуға жағдай туғызатын экономикалық өсудің жаңа моделін құру. Белгіленген саяси реформаның мақсаты – мемлекеттік басқа­рудың тиімділігін арттыру және мемлекеттің халық алдында есеп беруін қамтамасыз ету, Президент пен биліктің заң шығарушы тармағының арасында өкілеттіктерді қайта бөлу, мемлекеттік шешімдерді дайындау мен қабылдау үдерісіндегі азаматтық қоғамның рөлін күшейту. Қабылданған қажетті заңдар мен заңнамалық өзгертулер қоғамды одан әрі демократияландыруға қызмет етеді» делінген.
«Қазақстанның үшінші жаңғыруы: жаһандық бәсекеге қабілеттілік» Жолдауында Президент Н.Назарбаев әлемде болып жатқан күрделі құры­лымдық және технологиялық өзгерістер еліміз үшін өнімділікті арттыру жолында кедергі келтіру мүмкін екенін, нәтижесінде Қазақстан экономи­касының бәсеке­лес­тік қабілетін әлсірету қаупі барын ескеріп, экономиканы жеделді түрде технологиялық жаңғыртуға басымдық берген болатын: «Біз цифрлы технологияны қолдану арқылы құрылатын жаңа индустрияларды өркендетуге тиіспіз. Елде 3D-принтинг, онлайн-сауда, мобильді банкинг, цифрлы қызмет көрсету секілді денсаулық сақтау, білім беру ісінде қолданылатын және басқа да перспекти­валы салаларды дамыту керек. Бұл индустриялар қазірдің өзінде дамыған елдер­дің эконо­микаларының құрылымын өзгертіп, дәстүрлі салаларға жаңа сапа дарытты» деп атап көрсеткен.
Жолдауда еліміздің әлеуметтік, эконо­микалық көрсеткіштерін алдағы жылдарда жақсарту қажеттігі, еңбек нарығын жақсарту, бизнес-ортаны түбе­гейлі жақсар­ту және кеңейту керектігінен бөлек, Үкі­метке «Цифрлы Қазақстан» жеке бағдар­ламасын әзірлеуді және қабылдауды, EXPO – 2017 нысандарының бірінің базасында IT-стартаптар халықаралық технопаркін құруды, жоғары оқу орын­дары, Назарбаев университеті және «Алатау» инно­вациялық технологиялар паркі базасында өзіміздің ғылыми және инно­вациялық әлеуетімізді дамытуды, бизнес өкіл­дерімен бірге 2025 жылға дейін базалық салаларды технологиялық тұрғыдан қайта жарақтандырудың кешенді шаралары мен бірыңғай экспорт стратегиясын әзірлеуді, 1 қыркүйекке дейін Қазақстанның инвестициялық стратегиясын дайындауды, «Қазақстан киберқалқаны» жүйесін қалып­тастыруды, «Қазақстанның ұлттық технологиялық бастамасы» деп аталатын елді үшінші жаңғырту жөніндегі 2025 жылға дейінгі дамудың стратегиялық жоспарын әзірлеуді тапсырғаны есімізде. Мақсат – айқын, міндет – зор, меже – белгілі. Бүгінде бұл тапсырмалар жоспарлы түрде кезең-кезеңімен жүзеге асып, тұрақты жұмыстар жүргізіліп келеді.
Мәселен, бүгінде бизнес ортаны кеңейту, кәсіпкерлікке жол ашу мақса­тын­да «Қазақстан Республикасының кейбір заң­­намалық актілеріне кәсіпкерлік қыз­мет­­ті реттеуді жетілдіру мәселелері бойын­ша өзгерістер мен толықтырулар енгізу турлы» заң жобасы талқылануда. Мамыр айында «Қазақстанның киберқал­қаны» киберқауіпсіздік тұжырымдамасы­ның жобасы әзірленгені хабарланған. Алдағы 15 жылда 1,5 миллион отбасын тұрғын үймен қамта­масыз етуге бағыттал­ған «Нұрлы жер» тұрғын үй бағдарламасы іске асырыла бастады. Жақында ғана EXPO – 2017 нысандарының бір база­сы­нан Astana Hub халықаралық IT-стар­тап­тар техно­паркі өз алаңын ұсынды, енді 2018 жылдың қыркүйегінде ресми ашылуы болмақ.
Жолдауда Елбасы Қазақстанның үшінші жаңғыруы басталғанын жариялап, саяси реформа мен экономикалық жаңғыру қолға алынса, соған ілеспе ретінде, былтырғы 2017 жылдың сәуір айында «Болашаққа бағдар: рухани жаңғыру» атты мақаласын жариялаған еді. Себебі, осы көздеген жұмыс­тың бәрі дер уақытында әрі тиімді орындалуы үшін санамызды да жаңғырту, әр нәрседе ілгері жүру қажеттігі сезілді. «Мақсатқа жету үшін санамыз ісімізден озып жүруі, яғни одан бұрын жаңғырып отыруы тиіс. Бұл саяси және экономикалық жаңғыруларды толықты­рып қана қоймай, олардың өзегіне айналады» деп көрсетілген мақалада. Бұл мақала аясында да Елбасы тапсыр­маларына сәйкес, түрлі бағытта бірталай жобалар қолға алынды. Бастысы, шараның барлығы Қазақ елін жаңа деңгейге шығаруға жетелемек.

Нұрсұлу МЫРЗАХМЕТ