ارمىسىڭ, اق وليمپيادا!

1503
0
بولىسۋ:

سپورت جانكۇيەرلەرى بۇل كۇندى ۇزاق كۇتتى. سوچيدەگى وليمپيادا ويىندارى بىتە سالىسىمەن جىل ساناعان جۇرتشىلىق دال قازىر ساعات ساناپ وتىر. ويتكەنى ساناۋلى ساتتەن سوڭ وڭتۇستىك كورەيا تورىندە دۇبىرلى دودا – اق وليمپيادا الاۋى جاعىلادى.
9 اقپاندا تۇساۋى كەسىلەتىن تورت جىلدىق باسەكەسىنە قازاقستاندىق سپورتشىلار تۇگەل دەرلىك اتتاندى. تەك مانەرلەپ سىرعاناۋشىلار مەن فريستايل-اكروباتيكا شەبەرلەرى سال كەشىرەك قوسىلادى. دەگەنمەن بۇگىندە بارلىعى سپورتتىق قالىپتارىن قاداعالاپ, بارىنشا دايارلىقتى باستاپ كەتكەن. ويىندار وڭتۇستىك كورەيادا وتەتىن بولسا دا, سولتۇستىككە تان ايازىمەن قارسى العان كورىنەدى. بىراق قىسى قاتال قازاقستانعا ۇيرەنگەندەرگە اۋا رايى اسا كەدەرگى بولمايدى دەپ سەنەمىز.
وليمپيادا الاۋىن تۇتاتۋ داستۇر بويىن­شا گرەكييادان باستالدى. 2017 جىل­دىڭ 24 قازانىندا شاڭعىشى اپوستولوس انگەليس وليمپيادا وتانىنان الاۋدى الىپ شىقتى. سەگىز كۇننەن سوڭ, ياعني
1 قاراشادا وڭتۇستىك كورەياعا ۇلكەن اماناتپەن اكەلىنگەن ەدى. باس باسەكەگە 100 كۇن قالعاندا ەستافەتانى قابىلداعان الاۋ ۇستاۋشىلار كۇللى كورەيانى فاكەلمەن ارالاپ شىقتى. جالپى سانى 7,5 مىڭ الاۋ ۇستاۋشى 2018 شاقىرىمدى ارتقا تاستادى. وسىلايشا, وليمپيادا الاۋى 17 قالا مەن پروۆينتسييانى باسىپ وتتى. سوڭعى نۇكتەسى اشىلۋ سالتاناتىندا قويى­لادى. راسىم بىزدىڭ ۋاقىت بويىنشا 17:00-گە جوس­پار­لانعان. ۇيىمداستىرۋشىلار­دىڭ اي­تۋىنشا, ۇزاقتىعى – 2 ساعات. كورەياداعى كۇن رايى – 10 گرادۋس شاما­سىندا اياز.
پەڭچاڭدا 92 ەلدەن كەلگەن 2925 سپورت­شىنىڭ باسى قوسىلادى. دەلەگاتتاردىڭ جالپى سانى – شامامەن 5000-عا جۋىق. وليمپيادا تاريحىندا تۇڭعىش رەت تا­بالدىرىقتان اتتاعالى تۇرعان 6 مەملەكەت بار. ولار – مالايزييا, سينگاپۋر, ەكۆا­دور, ەريترەيا, كوسوۆو جانە نيگەرييا. ۇزاق ۇزىلىستەن كەيىن قايتا سەرپىلىس العان ەلدەردى دە اتاپ وتۋ كەرەك. بوليۆييا, گانا, كەنييا, كولۋمبييا, كحدر, ماداگاسكار, پۋەرتو-ريكو جانە وار رەسپۋبلي­كا­سىنىڭ سپورتشىلارى ستارتتا تۇر. ەستە­رىڭىزدە بولسا, وتكەن جىلى كحدر وليم­پياداعا قاتىسپايتىنىن جەتكىزگەن ەدى. دەگەنمەن وسى جىلدىڭ 9 قاڭتارىندا قوس كورەي مەملەكەتى كەلىسسوز جاساپ, ناتي­جەسىندە بىرلەسىپ, بىر تۋدىڭ استىندا شىعۋ تۋرالى شەشىمگە كەلدى. ايەلدەر ارا­سىنداعى حوككەي تۋرنيرىندە بىرلەسكەن كورەي قۇراماسىنىڭ ويىنىن تاماشالاي الامىز. وسىعان دەيىن ەكى كورەي ەلى 2006 جىلى يتالييادا وتكەن دودا دا قاتار شىققان ەدى.
قازاقستان اتىنان 57 وليمپيادا جول­داماسىن يەلەنگەن 46 سپورتشى قاتىسادى. 15 سپورت تۇرىنەن 102 مەدال جيىنتىعى سا­راپقا سالىنادى. وسى جۇلدەلەرگە ىلىگۋگە اركىمنىڭ-اق نيەتى, ارقايسىنىڭ تالاسى بار. بىراق باعى دا, بابى دا قاتار جانعاندار عانا جەڭىس تۇعىرىنان تابى­لادى. قىسقى سپورت تۇرلەرىنەن ۇزدىك دەپ ىرىكتەلگەن, جولداما الۋ جولىندا ايانباي ەڭبەك ەتكەندەردىڭ سىنالار ساتى تۋدى. اشىلۋ سالتاناتىندا كورەي الىپبيىنىڭ رەتىمەن مەملەكەتتەر دەلەگاتسيياسى جۇرىپ وتەدى. قازاقستان بايراعىن شورت-ترەكشى ابزال اجىعاليەۆ الىپ شىعادى.
كوڭىلدە بىر تولقىنىس, بىر ۇمىت, بىر قورقىنىش, بىر كۇدىك تۇرعانى انىق. ويت­كەنى جولداما العان سپورتشىنىڭ قاي-قايسىسى بولسىن جۇزدەن جۇيرىك, مىڭنان تۇلپار. بىراق بايگەنىڭ باستى شارتى – ۇزدىك ناتيجە كورسەتۋ, مويىنعا ىلىنەر مەدال الىپ, ەل ابىرويىن اسقاقتاتۋ. مۇنشا مول ۇمىتتى سەزىنگەن سپورتشىلار فيزيكالىق تۇرعىدان بولەك, پسيحولوگييا­لىق جاعىنان دا دايىن بولۋى تيىس. سپورت سۇيەر قاۋىم دەمىن ىشىنە العان كۇيى ۇنسىز. جۇرەكتە, تىلەكتە, نيەتتە – جاق­سىلىق. بىرەر ساتتەن سوڭ بۇل تىنىشتىق «بۇزى­لىپ», مەرەكەگە ۇلاسادى. اشىلۋىن­داعى جا­عىمدى كوڭىل-كۇي جەڭىس تويلارىنا ۇلاسسىن. قازاق ەلىنىڭ قارقىنى قاتايىپ, اتاعى ارتسىن! وليم­پياداشىلارعا سات­تىلىك!

جادىرا اققايىر

 

بولىسۋ:

پىكىر جازۋ


*