قازاقستان مەن اقش – XXI عاسىرداعى ەكونوميكالىق ارىپتەستىك

1681
0
بولىسۋ:

2018 جىلعى 16 قاڭتاردا پرەزيدەنت دونالد ترامپ پرەزيدەنت نۇرسۇلتان نازارباەۆتى اق ۇيدە قابىلدادى. ساپار قازاقستان مەن اقش اراسىنداعى تىعىز كوممەرتسييالىق جانە ساۋدا بايلانىستارىن نىعايتىپ, جاڭا جۇمىس ورىندارىن اشۋعا جانە ەكى ەل ەكونوميكاسىنىڭ وسىمىن ارتتىرۋعا مۇمكىندىك بەرەدى. پرەزيدەنت نۇرسۇلتان نازارباەۆ وسى شارالار قازاقستاننىڭ 2050 جىلعا قاراي الەمنىڭ وزىق دامىعان وتىز جاھاندىق ەكونوميكاسىنىڭ قاتارىنا كىرۋى ۇشىن ماڭىزدى ەكەنىن اتاپ وتتى. ساپار بارىسىندا بىرقاتار كوممەرتسييالىق كەلىسىمشارتتار مەن قۇجاتتارعا, ونىڭ ىشىندە Boeing, GE Transportation, «ەير استانا», «قازاقستان تەمىرجولى» جانە «سكات» كومپانييالارىنىڭ 2,5 ميلليارد اقش دوللارىنان استام كولەمدە امەريكالىق ونىمدەر مەن قىزمەتتەردى ساتىپ الۋ جونىندەگى جاڭا كەلىسىمدەرىنە قول قويىلدى.
وسى ەكونوميكالىق ىنتىماقتاستىق مىناداي نەگىزگى باعىتتاردى قامتيدى:

وڭىرلىك ساۋدا جانە ەكونوميكالىق دامۋ
ۇكىمەتارالىق ىنتىماقتاستىق. قازاقستان مەن اقش دسۇ مىندەتتەمەلەرىن ورىنداۋ, قازىرگى داۋ-دامايلاردى شەشۋ, قازاقستاننىڭ ينۆەستيتسييالىق احۋالىن جاقسارتۋ جانە ەكىجاقتى ينۆەستيتسييالاردى ارتتىرۋ جونىندەگى ىنتىماقتاستىقتى جالعاستىرىپ كەلەدى. ەكى ەل جاقىندا اقش پەن قازاقستاننىڭ جوعارى لاۋازىمدى تۇلعالارىنىڭ ساپارلارىن جەڭىلدەتۋ ار­قىلى ەكىجاقتى بايلانىستاردى نىعايتاتىن اەروناۆيگاتسييالىق كەلىسىمگە قول قويدى.
وڭىرلىك ساۋداعا جاردەمدەسۋ. قازاقستان مەن اقش وڭىردەگى ساۋدانى كەڭەيتۋگە ىقپال ەتەتىن ورتالىق ازيياداعى ساۋدا جانە ينۆەستيتسييالار جونىندەگى نەگىزگى كەلىسىمنىڭ (تيفا) اياسىندا وزارا ىنتىماقتاستىعىن جالعاستىرىپ كەلەدى.
• قازاقستان 2017 جىلعى 12 جەلتوقسان­دا الماتى قالاسىندا تيفا-نىڭ ورتالىق ازييا فورماتىنداعى كەزدەسۋىن ۇيىمداس­تىرىپ, ساۋدا-ساتتىق ماسەلەلەرىندە كوشباس­شىلىق تانىتتى. وسى كەزدەسۋ بارىسىندا قازاقستان مەن اقش ساۋدا جانە يننوۆا­تسييالاردى ىلگەرىلەتۋ ماقساتىمەن زيياتكەرلىك مەنشىك قۇقىقتارىن قورعاۋ جونىندەگى جاڭا وڭىرلىك جۇمىس توبىن قۇرۋعا ۋاعدالاستى.
• 2017 جىلعى قازاندا قازاقستان اقش-تىڭ حالىقارالىق دامۋ جونىندەگى اگەنت­تىگىمەن بىرلەسىپ, 15 ەلدەن 1100-دەن استام رەسمي وكىلدىڭ, كاسىپكەرلەر مەن دونور­لاردىڭ قاتىسۋىمەن الماتى قالاسىندا جەتىنشى ورتالىق ازييا ساۋدا فورۋمىن وتكىزدى. بۇل 25 ميلليون اقش دوللارىنان اساتىن قارجى كولەمىندەگى ساۋدا كەلىسىم­دەرىن جۇرگىزۋ نيەتى تۋرالى مەموراندۋمدارعا بولاشاقتا قول قويۋ مۇمكىندىگىن تۋعىزدى.
ەكىجاقتى ساۋدا. 2016 جىلى ەكىجاقتى ساۋدا كولەمى 1,9 ميلليارد اقش دوللارىنا جەتتى. ەكى ەل ساۋدا قاتىناستارىن ودان ارى كەڭەيتۋگە ىقىلاس تانىتتى. اقش قا­زاق­ستان­­نىڭ ازاماتتىق اۆياتسييا تۋرالى ەكى­جاقتى كەلىسىمگە قول قويۋ نيەتىن قۇپتايدى. بۇل كەلىسىم اۋە جولاۋشىلارىنا قولجەتىمدى, ىڭعايلى جانە تيىمدى قىزمەت ۇسىنا وتى­رىپ, ەكونوميكالىق قاتىناستاردى نىعايتادى جانە ىسكەرلىك بايلانىستاردىڭ وسۋىنە ىقپال ەتەتىن بولادى.
كوممەرتسييالىق اۋەكەمەلەرىمەن ساۋدا جاساۋ. ساپار بارىسىندا ەكى كوشباسشى اقش-تا 7,1 مىڭ تىكەلەي جانە جاناما جۇمىس ورنىنىڭ اشىلۋىن قولدايتىن 1,3 ميلليارد قارجى كولەمىندەگى Boeing جانە قازاقستان اۋەكومپانييالارى اراسىنداعى جەكەلەگەن كەلىسىمدەردى ماقۇلدادى. اتاپ ايتقاندا, SCAT كومپانيياسى Boeing-737 MAX 8 مودەلىنىڭ التى ۇشاعىنا تاپسىرىس بەردى. العاشقى ۇشاقتىڭ جەتكىزىلۋى 2018 جىلعى ناۋرىزعا جوسپارلانعان. بۇل اۋەكەمەلەرى SCAT كومپانيياسىنىڭ وڭىرلىك جانە حالىقارالىق جەلىسىن كەڭەيتە وتىرىپ, قازاقستان مەن ورتالىق ازييادا مەنشىكتەگى جانە قولدانىستاعى 737 MAX-تىڭ تۇڭعىش ۇلگىلەرى بولادى. سونىمەن قاتار قازاقستاننىڭ «ەير استانا» ۇلتتىق اۋەكومپانيياسى قولدانىستاعى كەلىسىم­شارتتىڭ تالاپتارىنا سايكەس ۇش 787 Dreamliner ۇشاعىن 2021 جىلعا دەيىن جەتكىزۋ جوسپارى بويىنشا ساتىپ الۋعا نيەتتى ەكەنىن راستادى.
تەمىرجولدار. «دجەنەرال ەلەكتريك» (GE) جانە «قازاقستان تەمىرجولى» (قتج) كومپانييالارى 3,5 مىڭ جاڭا جۇمىس ورنىن قامتيتىن, قۇنى شامامەن 900 ميلليون اقش دوللارىن قۇرايتىن ەكى جاڭا ستراتە­گييا­لىق باستاما جاساستى. «دجەنەرال ەلەك­تريك ترانسپورتەيشن» كومپانيياسى «قتج» ۇشىن 2019 جىلدان جەتكىزىلە باس­تايتىن 300 تىركەمەلى لوكوموتيۆ جاساپ شى­عارادى. سونداي-اق «دجەنەرال ەلەكتريك ترانس­پورتەيشن» 2018 جىلدان باستاپ «قتج» كوم­پانيياسىنىڭ قولدانىسىنداعى 175 «دجە­نەرال ەلەكتريك ەۆو» لوكوموتيۆىنە قىزمەت كورسەتۋ جانە قولداۋ ماقساتىمەن قىزمەتىن ۇسىنۋ تۋرالى 18-جىلدىق كەلى­سىمگە قول قويدى. كەلىسىم استاناداعى قتج-نىڭ نەگىزگى تەمىرجول جەلىسىن كەڭەيتۋگە ارنالعان.
اۋىل شارۋاشىلىعى. اقش پەن قا­زاقستان اۋىل شارۋاشىلىعى سالاسىنداعى ساۋدا قارىم-قاتىناستارىن دامىتۋدىڭ ماڭىزدىلىعىن مويىندايدى جانە ىنتى­ماقتاستىقتى, سونىڭ ىشىندە بىرلەسكەن اۋىل شارۋاشىلىعى زەرتتەۋلەرىنىڭ اياسىنداعى ىنتىماقتاستىقتى كەڭەيتۋ ۇشىن مۇمكىن­دىكتەردى قاراستىرۋدى جالعاستىرادى. بىرلەسكەن زەرتتەۋ جۇمىسى ەكى ەلگە قاۋىپسىز جانە كەڭ اۋقىمدى ازىق-تۇلىكپەن قامتا­ماسىز ەتۋ ۇشىن تابىستى جۇمىس ىستەۋگە كومەكتەسەدى.
اۋعانستاننىڭ دامۋى. اقش پەن قا­زاقستان ساياسي قولداۋ كورسەتۋ, وڭىرلىك ساۋدانى ۇلعايتۋ جانە ەكونوميكالىق دامۋ ارقىلى اۋعانستانداعى تۇراقتىلىق پەن دامۋدى قولدايدى. قازاقستان اۋعانستان ازاماتتارى ۇشىن ارنايى وقۋ باعدارلاما­سىنىڭ اياقتالعانىن جارييالادى جانە قازاقستان مەكەمەلەرىندە وسى ەلدىڭ مامان­دارىن وقىتۋدى جالعاستىرۋدى ۇسىندى.
تسيفرلى ينفراقۇرىلىم. GE Digital جانە «سامۇرىق-قازىنا» ۇلتتىق ال-اۋقات قورى قوردىڭ يندۋسترييالىق كومپانييالار پورتفەلىنىڭ تسيفرلى دامۋىن تەزدەتۋگە باعىتتالعان ستراتەگييالىق ارىپتەستىك تۋ­رالى كەلىسىمگە قول قويدى. كەلىسىم قا­زاقستان­دا تۇراقتى تسيفرلى ەكوجۇيەنى قۇرۋداعى كومپانييالاردىڭ جەتىستىگىن كورسەتەدى جانە Predix پلاتفورماسىنا نەگىزدەلگەن GE تسيفرلى ايقىنداماسىن بىرلەسە باعالاۋدى كوزدەيدى.
عارىشتى زەرتتەۋدەگى كوشباسشىلىق. قۇراما شتاتتار قازاقستاننىڭ حالىق­ارالىق عارىش ستانساسىندا جۇمىس ىستەيتىن امەريكالىق عارىشكەرلەردىڭ اتتان­دىر­ى­لىپ, امان-ەسەن قايتا ورالاتىن بەكەتى بو­لىپ سانالاتىنىن ريزاشىلىقپەن اتاپ وتەدى. اقش قازاقستانعا 2018 جىلعى
3 ناۋرىزدا جاپونيياداعى عارىشتى زەرتتەۋ ماسەلەلەرى جونىندەگى 2-حا­لىقارالىق فورۋمعا قاتىسۋدى ۇسىنادى. قازاقستان مەن اقش حالىقارالىق حارتييا اياسىندا قورشاعان ورتاعا جانە تابيعاتقا تونگەن قاۋىپ-قاتەرلەردى انىقتاۋ ۇشىن عارىشتىق تەحنيكانى قولدانۋ سالاسىندا ىنتى­ماقتاسۋ مۇمكىندىگىن زەرتتەيدى. بۇل حارتييا تابيعي جانە تەحنوگەندىك سيپاتتاعى اپاتتاردان زارداپ شەككەن ەلدەر ۇشىن عارىش دەرەكتەرىن قابىلداپ, تاراتۋدىڭ بىرىڭعاي جۇيەسىن قامتاماسىز ەتۋگە باعىتتالعان.
دەنساۋلىق ساقتاۋ. اقش جانە قازاقستان اقش-تىڭ اۋرۋ تۇرلەرىن باقىلاۋ جانە الدىن الۋ ورتالىقتارىمەن (CDC) بىرلەسە وتىرىپ, قازاقستان رەسپۋبليكاسىنداعى دەنساۋلىق ساقتاۋ سالاسىنداعى كورسەتىلەتىن قىزمەتتەردى دامىتادى. سونىمەن قاتار پيتتسبۋرگ ۋنيۆەرسيتەتىنىڭ مەديتسينالىق مەكتەبى (UPMC) نازارباەۆ ۋنيۆەر­سيتەتىمەن قازاقستان جانە بۇكىل ورتالىق ازييا ازاماتتارىنا قىزمەت كورسەتەتىن الەمدىك دەڭگەيدەگى ونكولوگييالىق ورتالىق قۇرۋ جونىندە ىنتىماقتاستىق ورناتقان.
فارماتسەۆتيكا. Pfizer كومپانيياسى جوعارى تەحنولوگييالىق مەديتسينالىق ونىمنىڭ قايتالاما قاپتاماسىن وقشاۋلاۋ جونىندەگى جوبانى ىسكە اسىرۋ مۇمكىندىگى جونىندە قازاقستانمەن وزارا تۇسىنىستىك تۋرالى مەموراندۋمعا قول قويدى. وڭ شەشىم قابىلدانعان جاعدايدا, بۇل جوبا قازاقستاندا دارى-دارمەكتەردى تاسىمالداپ, ساقتاۋ ۇشىن تىزبەكتى سالقىنداتۋ جۇيەلەرىن جەتىلدىرۋ شارالارىن قامتۋى مۇمكىن.

قازاقستان جانە بولاشاقتىڭ ەنەرگيياسى
EXPO – 2017 حالىقارالىق كورمەسى. قازاقستان «بولاشاقتىڭ ەنەرگيياسى» تاقى­رى­بى اياسىندا ەنەرگەتيكا سالاسىنىڭ ين­نو­ۆا­تسيياداعى كوشباسشىلىعىن كورسەتە وتى­­رىپ, استانادا EXPO – 2017 كورمەسىن وت­­­­كىزدى. EXPO كەشەندەرى «استانا» حالىق­ارا­­­لىق قارجى ورتالىعى جانە يننوۆا­تسييا­لىق تەحنولوگييالار پاركى ۇشىن بەرىلەتىن بولادى.
ستراتەگييالىق ەنەرگەتيكالىق ديالوگ. 2017 جىلى قۇراما شتاتتار مەن قازاقستان بۇرىنعى ەكىجاقتى ەنەرگەتيكالىق ارىپ­تەستىكتى ستراتەگييالىق ەنەرگەتيكالىق ديا­لوگ دەڭگەيىنە كوتەردى. ديالوگ اياسىنداعى پراكتيكالىق تالقىلاۋلار 2018 جىلى باستالادى. بۇل كەڭەيتىلگەن فورمات بەيبىت اتوم ونەركاسىبىن دامىتۋ, كومىرتەگىنى ۇستاۋ, ساقتاۋ جانە ۋتيليزاتسييالاۋ تەحنولوگييالارى مەن ەنەرگييا توراپتارىنىڭ تۇراقتىلىعى, سونداي-اق يادرولىق قاۋىپسىزدىك پەن قارۋدى تاراتپاۋ سالالارىنداعى ىنتىماقتاستىق­تىڭ نەگىزىن قالايدى.
مۇناي مەن گازدى ەكسپورتتاۋ جانە ين­ۆەستيتسييالار. «شەۆرون» جانە «ەكسون­موبيل» كومپانييالارى قازاقستان نارى­عىنا 1993 جىلى ەنىپ, جاڭا تاۋەلسىز ەلگە ينۆەستيتسييا سالعان العاشقى ەڭ ىرى مۇناي كاسىپورىندارىنا اينالدى.
•«شەۆرون» كومپانيياسى «تەڭىز» ىرى كەن ورنىن يگەرۋ جونىندە 40 جىل مەرزىمدى قامتيتىن ماڭىزدى كەلىسىمشارتقا قول قويدى جانە وتكەن جىلدار ىشىندە كومپانييا مىڭداعان جۇمىس ورنىن اشىپ, ەنەرگەتيكا سالاسىنا الەمدىك دەڭگەيدەگى تەحنولوگييا­لاردى جانە الدىڭعى قاتارلى تاجىريبەنى ەنگىزدى. سونداي-اق قازاقستانداعى مۇناي جانە گاز وندىرىسىنە ونداعان ميلليارد اقش دوللارىن سالدى.
•«شەۆرون» كومپانيياسى قازاقستان رەسپۋبليكاسىنىڭ ەنەرگەتيكا مينيستر­لىگىمەن قازاقستانداعى تابىستى جوبالاردى قارجىلاندىرۋ ۇشىن 251 ميلليون اقش دوللارى كولەمىندە رەينۆەستيتسييالىق قورلاردى پايدالانۋ جونىندەگى وزارا تۇسىنىستىك تۋرالى مەموراندۋمعا قول قويدى.
• جالپى 20,2 ميلليارد اقش دوللارى كولەمىندە ينۆەستيتسييا قۇيعان «ەك­سونموبيل» كومپانيياسى مۇناي مەن گازدى بار­لاۋمەن, يگەرۋمەن, وندىرۋمەن جانە تاسىمالداۋمەن بەلسەندى تۇردە اينالىسادى.
•«تەڭىزشەۆرويل» اق (تشو) – «قازمۇنايگاز», «شەۆرون», «ەكسونموبيل» جانە «لۋكاركو» كومپانييالارىنىڭ قاتىسۋىمەن اشىلعان بىرلەسكەن كاسىپورىن قازاقستاندىق سۋبەكتىلەرگە 124 ميلليارد اقش دوللارىنان استام كولەمدە تىكەلەي قارجىلىق تولەمدەر جاسادى. بۇگىندە قۇنى 36,8 ميلليارد اقش دوللارى كولەمىن قامتيتىن وندىرىستى كەڭەيتۋ جونىندەگى جوبانى ىسكە اسىرادى.
• «سولتۇستىك كاسپيي بويىنشا ونىمدى بولۋ تۋرالى كەلىسىم» (سكبوبك) اياسىنداعى جوبا قازاقستانداعى وڭىرلەردە جۇمىس ورىندارىن جانە بيزنەسكە مۇمكىندىكتەر اشاتىن ىرى شەتەلدىك ينۆەستيتسييالىق جوبا بولىپ سانالادى. «قاشاعان» كەن ورنىنداعى «1-كەزەڭ» جوباسىن ىسكە اسىرۋ قۇنى 55 ميلليارد اقش دوللارىن قۇرادى. 2004 جىلدان بەرى ساتىلعان تاۋارلار, جۇمىس جانە قىزمەتتەر كولەمى 13,3 ميللياردتان استام اقش دوللارىن قۇرادى. جوبا ونداعان جىلدار بويى جۇمىس ىستەيتىن بولادى, ال ونىڭ اكتسيونەرلەرى, سونىڭ ىشىندە «ەكسونموبيل» كومپانيياسى قازاقستان ۇكىمەتىنە ميللياردتاعان اقش دوللارى كولەمىندە تىكەلەي كىرىس كىرەدى دەپ جوسپارلاپ وتىر.
•«شەۆرون» جانە «ەكسونموبيل» كوم­پا­نييالارى «كاسپيي قۇبىر كونسور­تسيۋ­مىنا» (كقك) قاتىسۋ ارقىلى قازاقستان ەكونوميكاسىنىڭ دامۋىنا ۇلەس قوستى. 2017 جىلى كقك مۇناي قۇبىرىن كەڭەيتۋ جوباسىنىڭ قازاقستانداعى بولىگىن اياق­تادى. بۇل ونىڭ جالپى وتكىزۋ قابىلەتىن كۇنىنە 1,4 ميلليون باررەلگە دەيىن ۇلعايتا الادى. قۇبىرلار جۇيەسى قازاقستان مۇ­نايىن «تەڭىز» جانە «قاشاعان» كەن ورىندارىنان ەكسپورتتاۋدىڭ ەڭ تارتىمدى جولى بولىپ سانالادى.
اتوم ەنەرگەتيكاسى. قازاقستان جانە قۇراما شتاتتار قاۋىپسىز اتوم ەنەر­گە­تيكاسىن ىلگەرىلەتۋ ۇشىن ىنتىماقتاسۋعا نيەتتى.
•2016 جىلى 24 مىڭ توننا يادرولىق وتىن وندىرگەن قازاقستان جەتەكشى ۋران جەتكىزۋشى بولىپ سانالادى.
•2017 جىلى قازاقستان قۇراما شتات­تارمەن بىرلەسە وتىرىپ, ماگاتە-نىڭ تومەن بايىتىلعان ۋران بانكىن (تبۋب) اشتى. تبۋب تازا اتوم ەنەرگيياسىنا كو­شەتىن ەلدەر ۇشىن وتىننىڭ سەنىمدى كوزىن ۇسىنادى جانە بايىتۋ تەحنولوگييالارىنىڭ تارالۋ قاۋپىن ازايتادى.
وڭىرلىك ەنەرگەتيكالىق جۇيەنى جاڭ­عىرتۋ. قازاقستان مەن قۇراما شتاتتار ورتالىق ازييانىڭ وڭىرلىك ەنەرگەتيكالىق جۇيەسىن قايتا بىرىكتىرۋگە, ەنەرگەتيكالىق قاۋىپسىزدىك­تى ارتتىرۋعا, ەكونوميكالىق تۇراقتىلىقتى جاقسارتۋعا جانە كوممەر­تسييالىق ينۆەس­تيتسييالاردى قولداۋعا ار­نالعان تەحنولوگييالار مەن جوبالاردى زەردەلەۋگە كەلىستى.
«بولاشاقتىڭ ەنەرگيياسى» – وڭىردىڭ اتموسفەراعا زيياندى زاتتاردى از كولەمدە شىعاراتىن, كليماتتىق تۇرعىدان ورنىقتى ەكونوميكاعا وتۋىنە كومەكتەسەتىن 2015 جىلعى ورتالىق ازييانىڭ بەس ەلى مەن امەريكا قۇراما شتاتتارىنىڭ ارىپتەستىگى (س5+1) تۋرالى بىرلەسكەن دەكلاراتسييا ايا­سىنداعى وڭىرلىك شارا.
«بولاشاقتىڭ ەنەرگيياسى» باعدارلاماسى قازاقستانداعى ەنەرگەتيكالىق تيىمدىلىكتى ارتتىراتىن, سونداي-اق پارنيكتىك گازداردى شىعارۋدى ازايتۋدىڭ بيىك ماقساتتارىن بەلگىلەپ, ولارعا جەتۋ مۇمكىندىكتەرىن جاق­سارتۋ ۇشىن قايتا قالپىنا كەلەتىن ەنەرگييا سالاسىنداعى جوبالاردى قولدايدى.

ادام كاپيتالىن نىعايتۋ
ۆيزالىق باعدارلاما. 2015 جىلى قا­زاقستان اقش ازاماتتارى ۇشىن ۆيزاسىز كىرۋ جونىندەگى قىسقامەرزىمدى باعدار­لاماسىنا باستاماشىلىق جاسادى, ال قۇراما شتاتتار قازاقستان ازاماتتارى ۇشىن 10 جىلدىق ىسكەرلىك جانە تۋريستىك ۆيزالاردى بەرە باستادى. بۇل ۆيزالىق رەجيمدەر ينۆەستيتسييا جانە تۋريزم ۇشىن جاڭا مۇمكىندىكتەر اشىپ, ەكى ەل اراسىنداعى بايلانىستىڭ ارتۋىنا ىقپال ەتتى.
ساياحاتتار. بۇگىندە قۇراما شتاتتاردا شامامەن 26 مىڭ قازاقستان ازاماتى تۇرادى. ال قازاقستاندى 5 مىڭنان استام اقش ازاماتى مەكەندەيدى. وتكەن جىلى قۇراما شتاتتار قازاقستان ازاماتتارىنا 18 مىڭعا جۋىق ۆيزا بەردى, بۇل قۇراما شتات­تارعا كوپ ساپار جاساۋعا مۇمكىندىك تۋعىزدى.
بىلىم بەرۋ. قۇراما شتاتتار قازاقستان رەسپۋبليكاسىنا ۇشتىلدى قوعام قۇرۋ ۇشىن كومەكتەسۋگە دايىن ەكەنىن بىلدىردى. قۇراما شتاتتار قازاقستاندا اعىلشىن تىلىنە قولجەتىمدىلىكتى جاقسارتۋ جانە اعىلشىن تىلى مۇعالىمدەرىنىڭ جاڭا بۋىنىن دايارلاۋ ماقساتىمەن دامۋ باعدارلاماسىن رەسۋرس­تارمەن قامتاماسىز ەتەتىن بولادى. 2017 جىلى 2800-دەن استام قازاقستان مۇعالىمدەرى اعىلشىن تىلىنەن بىلىكتىلىگىن ارتتىرۋ جونىندە ينتەرنەت-سەمينارلارعا قاتىستى.
•2018 جىلى امەريكالىق مۇعالىمدەر قازاقستان وڭىرلەرىندە اعىلشىن تىلىن وقىتۋدى جاقسارتۋعا كومەكتەسەتىن بولادى.
•«اعىلشىن تىلىنە قولجەتىمدىلىك جونىندەگى ميكروستيپەندييا» باعدارلاماسى تۇرمىسى تومەن وتباسىلاردان شىققان 480 جاس شاكىرتكە مەكتەپتەن كەيىنگى ساباقتارعا قاتىسۋعا جانە جازعى وقۋ لاگەرلەرىندە بىلىم الۋعا كومەكتەستى.
•قۇراما شتاتتار قازاقستاندىق 230 جۋر­ناليستىڭ كاسىبي بىلىكتىلىگىن جاق­سارتاتىن «جۋرناليستەرگە ارنالعان اعىل­شىن تىلى» باعدارلاماسىن قارجىلاندىرادى.
«بولاشاق» باعدارلاماسى. 1993 جىلى قازاقستان شەت ەلدەردە وقۋ ۇشىن «بولاشاق» پرەزيدەنتتىك ستيپەنديياسى باعدارلاماسىن باستادى. قازاق تىلىندە «كەلەشەك» ۇعىمىن بىلدىرەتىن «بولاشاق» باعدارلاماسى قازاقستان جاستارىن الەمنىڭ ەڭ ۇزدىك ۋنيۆەرسيتەتتەرىندە وقىتۋداعى ماڭىزى زور.
•«بولاشاق» باعدارلاماسى – قازاقستان ستۋدەنتتەرىنە شەتەلدىك جوعارى وقۋ ورىندارىندا بىلىم الۋ ۇشىن تولەنەتىن بۇكىل الەمگە مويىندالعان ستيپەندييا.
•قۇراما شتاتتار ستيپەندياتتاردى ىرىكتەۋ پروتسەسىندە جانە وسى باعدارلاماعا اتسالىساتىن اقش ۋنيۆەرسيتەتتەرىنىڭ قاتارىن كەڭەيتۋگە كومەكتەسۋ ۇشىن «بو­لا­شاق» باعدارلاماسىمەن ىنتىماقتاستىق ورناتقان.
•وسى باعدارلاما قۇرىلعان 1993 جىل­دان بەرى 12,5 مىڭنان استام قازاقستاندىق ستۋدەنت «بولاشاق» ستيپەنديياسىنا يە بولدى. ولاردىڭ 2315 ستيپەندياتى قۇراما شتاتتاردا بىلىم الدى. «بولاشاق» ستيپەن­دياتتارى وقۋدى اياقتاعان سوڭ كەمىندە بەس جىل قازاقستاندا جۇمىس ىستەۋگە تيىس. قازىرگى تاڭدا اقش-تىڭ جوعارى وقۋ ورىندارىندا 358 ستيپەنديات وقيدى.

بولىسۋ:

پىكىر جازۋ


*