مىندەتتەردى بولىپ بەردى

1715
0
بولىسۋ:

ەلباسىنىڭ جولداۋىن جۇزەگە اسىرۋعا دەربەس جاۋاپ بەرەتىن جاۋاپتى تۇلعالار انىقتالدى. ەل ۇكىمەتىنىڭ جاڭا جىلداعى العاشقى وتىرىسى مەملەكەت باس­شىسىنىڭ «تورتىنشى ونەركاسىپتىك رەۆوليۋ­تسييا جاعدايىنداعى دامۋدىڭ جاڭا مۇم­كىندىكتەرى» جولداۋىندا بەرىلگەن تاپسىرمالاردى ىسكە اسىرۋ ماسەلەلەرىنە ارنالدى. جيىنعا توراعالىق ەتكەن پرەمەر-مينيستر ب.ساعىنتاەۆ ۇكىمەت مۇشەلەرىنە جولداۋدى ىسكە اسىرۋعا باعىت­تالعان ناقتى مىندەتتەردى بولىپ بەردى.

جولداۋدا ەلباسى ن.نازارباەۆ ۇكىمەتكە نەگىزگى ون باعىت بويىنشا مىن­دەتتەر جۇكتەگەنى مالىم. پرەمەر-مينيستر باقىتجان ساعىنتاەۆ سولاردىڭ نەگىزىندە بىرقاتار ناقتى تاپسىرمالار بەردى.
بىرىنشىدەن, يندۋسترييالاندىرۋ جانە جاڭا تەحنولوگييالاردى ەنگىزۋ تۇرعىسىنان ينۆەستيتسييالار جانە دامۋ مينيسترلىگىنە ونىمدەردى ەكسپورتتاۋ مەن تەحنولوگييالاردى ترانسفەرتتەۋگە باسا نازار اۋدارا وتىرىپ, وتاندىق كاسىپورىنداردى جاڭعىرتۋعا جانە تسيفرلاندىرۋعا باعىتتالعان جاڭا قۇرالدار ازىرلەۋ, سونداي-اق بىرقاتار ونەركاسىپتىك كاسىپورىنداردى تسيفرلان­دىرۋ بويىنشا پيلوتتىق جوبالاردى انىقتاۋ جانە ولاردى ىسكە اسىرۋعا كىرىسۋ تاپسىرىلدى. بۇعان ينۆەستيتسييالار جانە دامۋ مينيسترى جەڭىس قاسىمبەك جاۋاپ بەرەدى.
سونىمەن قاتار وعان تسيفرلىق تەحنولو­گييالارعا باسا كوڭىل بولە وتىرىپ, يندۋسترييالاندىرۋدىڭ «ۇشىنشى بەسجىل­دىعى» جاڭا مەملەكەتتىك باعدارلاماسى جوباسىن ازىرلەۋگە كىرىسۋ تاپسىرىلدى.
– اقپارات جانە كوممۋنيكاتسييالار مينيسترلىگىنە نازارباەۆ ۋنيۆەرسيتەتى, استانا حالىقارالىق قارجى ورتالىعى جانە اقپاراتتىق تەحنولوگييالار ستار­تاپ­تارىنىڭ حالىقارالىق تەحنوپاركى بازاسىندا تسيفرلىق جانە يننوۆاتسييالىق شەشىمدەر ازىرلەمەلەرىن دامىتۋ بويىنشا, سونداي-اق ۆەنچۋرلىك قارجىلاندىرۋدىڭ جەكە نارىعى قىزمەتىنىڭ شارالار كەشەنىن جاساۋدى جانە سايكەس زاڭنامالىق تۇزەتۋ­لەردى ازىرلەۋدى قامتاماسىز ەتۋ قاجەت, – دەدى پرەمەر-مينيستر. بۇعان مينيستر داۋرەن اباەۆ جاۋاپتى بولادى.
ەلباسى ەكونوميكانى تسيفرلاندىرۋعا بايلانىستى جۇمىسپەن قامتۋ ماسەلەلەرىنە ەرەكشە نازار اۋداردى. سوندىقتان باقىتجان ساعىنتاەۆ ەڭبەك جانە حالىقتى الەۋمەتتىك قورعاۋ مينيسترلىگىنە اكىم­دىكتەرمەن جانە مۇددەلى مينيسترلىكتەرمەن جۇمىسكەرلەردى جۇمىستان بوساتۋ تاۋەكەل­دەرىن باعالاۋدى جانە جۇمىستان شى­عارىلعان جۇمىسكەرلەردى ەڭبەكپەن قامتۋ بويىنشا كەلىسىلگەن ساياساتتى انىقتاۋدى, جالپى ەڭبەك رەسۋرس اعىمدارى بويىنشا جۇمىستى جىلدامداتۋدى تاپسىردى. مۇنىڭ جاۋاپكەرشىلىگىن ەڭبەك جانە حالىقتى الەۋمەتتىك قورعاۋ مينيسترى تامارا دۇيسەنوۆا ارقالايدى.
– ەكىنشىدەن, «رەسۋرستىق الەۋەتتى ودان ارى دامىتۋ» باعىتى بويىنشا ينۆەستي­تسييالار جانە دامۋ, ەنەرگەتيكا مينيستر­لىكتەرىنە كەشەندى اقپاراتتىق-تەحنولو­گييا­لىق پلاتفورمالاردى بەلسەندى ەنگىزۋ ارقىلى پايدالى قازبالاردى الۋ تاسىل­دەرىن جاقسارتۋ شارالارىن قابىلداۋدى تاپسىرامىن, – دەدى ۇكىمەت جەتەكشىسى.
ينۆەستيتسييالار جانە دامۋ, ەنەر­گەتيكا, اۋىل شارۋاشىلىعى مينيستر­لىكتەرىنە ونىمدەر وندىرۋگە شىعىندالاتىن ەنەرگييانى تۇتىنۋ نورماتيۆتەرىن بەكىتۋ ماسەلەلەرىن پىسىقتاۋ تاپسىرىلدى. ەنەرگەتيكا مي­نيستر­لىگى ەنەرگييانىڭ جاڭ­عىراتىن كوزدەرى سالاسىنا ينۆەستيتسييالار تارتۋ ۇشىن جاعداي جاساۋ بويىنشا ۇسى­نىستار ەنگىزۋگە مىن­دەتتەلدى.
ب.ساعىنتاەۆ ەنەرگەتيكا مينيستر­لىگىنە وڭىرلەردىڭ اكىمدەرىمەن بىرگە, بىر ايلىق مەرزىمدە قاتتى تۇرمىستىق قالدىق­تاردى كادەگە جاراتۋ جانە قايتا وڭدەۋ جۇيەسىن قۇرۋ بويىنشا جول كارتالارىن, سونداي-اق ەكولوگييالىق كودەكسكە جانە باسقا دا زاڭنامالىق اكتىلەرگە تۇزەتۋلەردى ازىرلەۋدى تاپسىردى. بۇل مىندەت مينيستر قانات بوزىمباەۆقا ارتىلدى.
ۇشىنشىدەن, پرەمەر-مينيستر جولداۋ بويىنشا ەلىمىزدىڭ اگروونەركاسىپ كەشەنىن دامىتۋ بويىنشا بىرقاتار ناقتى تاپسىر­مالار بەردى. اتاپ ايتقاندا, اۋىل شارۋا­شىلىعى مينيسترلىگىنە «مۇددەلى مەم­لەكەتتىك ورگاندارمەن جانە وبلىستاردىڭ اكىمدەرىمەن بىرگە, 1 ناۋرىزعا دەيىن اوك-تى دامىتۋدىڭ مەملەكەتتىك باعدار­لاما­لارىنىڭ ماقساتتى ينديكاتورلارىن قايتا قاراۋ, ولارعا جەتۋ بويىنشا شارالار كەشەنىن ازىرلەۋ جانە ۇكىمەتكە ناقتى ۇسىنىستار ەنگىزۋ» تاپسىرىلدى. مۇنىڭ سىرتىندا, ۆەدومستۆو بىلىم جانە عىلىم مينيسترلىگىمەن, وبلىس اكىمدەرىمەن تىزە قوسا وتىرىپ, اگرارلىق عىلىم مەن اگرارلىق ۋنيۆەرسيتەتتەردىڭ رولىن قايتا قاراۋعا, ولاردىڭ باستى مىندەتىن زاماناۋي بىلىمدەردى ترانسفەرتتەۋگە جانە بەيىمدەۋگە باعدارلاۋى تيىس.

اشم وڭىرلەر اكىمدەرىمەن بىرلەسىپ, «بىر ايلىق مەرزىمدە اۋىل شارۋاشىلىعى كووپەراتسييالارىن دامىتۋ جانە قولداۋ شارالارى بويىنشا تۇجىرىمدامالىق تاسىلدەر ۇسىنۋعا» مىندەتتەلدى. وسى با­عىتتا مينيسترلىك مۇددەلى مەملەكەتتىك ورگان­­دارمەن بىرگە, تيىمدى ەمەس سۋبسيدييا­لاردى اوك-تى مەملەكەتتىك قولداۋ تيىمدىلىگىن ارتتىرۋ ماقساتىندا بانك نەسيەلەرىن ارزانداتۋعا قايتا باعدارلاۋ ماسەلەسىن پىسىقتاۋعا تيىستى. بۇل بلوكقا جاۋاپكەرشىلىك ۆيتسە-پرەمەر – اۋىل شارۋاشىلىعى مينيسترى ومىرزاق شوكەەۆكە جۇكتەلدى.
جولداۋدىڭ تورتىنشى باعىتى كولىك-لوگيستيكالىق ينفراقۇرىلىمنىڭ تيىمدىلىگىن ارتتىرۋدى قاراستىرادى. بۇل رەتتە ينۆەستيتسييالار جانە دامۋ مي­نيسترلىگى اقپارات جانە كوممۋ­نيكا­تسييالار, قارجى مينيسترلىكتەرىمەن جانە «قتج»-مەن بىرلەسىپ, «جۇكتەردى ونلاين-رەجيمدە مونيتورينگتەۋ جانە كەدەندىك راسىمدەردى جەڭىلدەتۋ ۇشىن بلوكچەين مەن Big Data سيياقتى زاماناۋي تەحنو­لوگييالاردى ەنگىزۋدى زەرتتەۋى جانە قام­تاماسىز ەتۋى», «جەرگىلىكتى ماڭىزى بار اۆتوجولداردىڭ ساپاسىن جاقسارتۋ ۇشىن جىل سايىن بولىنەتىن بيۋدجەت قارا­جاتىنىڭ جالپى كولەمىن ورتاشا مەر­زىمدىك پەرسپەكتيۆادا 150 ميل­ليارد تەڭگەگە دەيىن جەتكىزۋى», «ينتەل­لەكتۋالدى كولىك جۇيەسىن كەزەڭ-كەزەڭمەن ەنگىزۋدى قام­تاماسىز ەتۋ» كەرەك. مۇنىڭ دا جاۋاپ­كەرشىلىگى – مينيستر جەڭىس قاسىمبەكتىڭ ەنشىسىندە.
بەسىنشىدەن, ۇكىمەت قۇرىلىسقا جانە كوممۋنالدىق سەكتورعا زاماناۋي تەحنولو­گييالاردى ەنگىزەدى. سونداي-اق سالىنىپ جاتقان جانە پايدالانۋعا بەرىلگەن نىسان­داردى ينتەللەكتۋالدى باسقارۋ جۇيە­لەرىمەن جابدىقتاۋ تەتىكتەرى ازىرلەنبەك. جاۋاپتى رەتىندە ج.قاسىمبەك بەلگىلەندى.
– ينۆەستيتسييالار جانە دامۋ مينيستر­لىگىنە مەملەكەت باسشىسى قويعان مىندەتتەردى ەسكەرە وتىرىپ, بىر ايلىق مەرزىمدە قازاقستاندىقتاردى باسپانامەن قامتاماسىز ەتۋ كورسەتكىشىن 2030 جىلعا قاراي 30 شارشى مەترگە دەيىن جەتكىزۋ بويىنشا ناقتى ۇسىنىستار ەنگىزۋ تاپ­سىرىلادى. قاجەت بولسا, «نۇرلى جەر» باعدارلاماسىن تۇزەتۋ بويىنشا ۇسىنىستار ەنگىزىڭىزدەر – دەدى باقىتجان ساعىنتاەۆ.
اۋىل شارۋاشىلىعى مينيسترلىگىنە ينۆەستيتسييالار جانە دامۋ, ۇلتتىق ەكو­نوميكا مينيسترلىكتەرىمەن جانە وڭىر اكىمدەرىمەن بىرلەسىپ, اۋىلدى ساپالى اۋىزسۋمەن قامتاماسىز ەتۋگە بارلىق كوز­دەردەن كەمىندە 100 ميلليارد تەڭگەنى جىل سايىنعى بولىپ وتىرۋ بويىنشا شارالار قابىلداۋ تاپسىرىلدى. باقىلاۋ ۆيتسە-پرەمەر و.شوكەەۆكە جۇكتەلدى.
جولداۋداعى قارجى سەكتورىن «قايتا جۇكتەۋ» بويىنشا ماسەلەلەردىڭ التىنشى باعىت مىندەتتەرىنىڭ نەگىزگى بولىگى ۇلتتىق بانككە قاتىستى. وسىعان بايلانىستى جولداۋدى ىسكە اسىرۋ بويىنشا ازىرلەنىپ جاتقان «جالپىۇلتتىق جوسپارعا» ۇب باسشىسى دانييار اقىشەۆ وز ۇسىنىستارىن ەنگىزەتىن بولدى. جەكە تۇلعالاردىڭ بانكروت­تىعى ينستيتۋتىن ەنگىزۋ ماسەلەسى بويىنشا قارجى مينيسترى باقىت سۇلتانوۆ بيىلعى ساۋىر ايىنىڭ سوڭىنا دەيىن ۇكىمەتكە سايكەس زاڭ جوبالارىن ەنگىزۋى قاجەت.
ۇلتتىق ەكونوميكا مينيسترى تيمۋر سۇلەيمەنوۆكە مۇددەلى مەملەكەتتىك ورگان­دارمەن بىرگە, قور نارىعىن ودان ارى دامىتۋدى قامتاماسىز ەتۋ, ونىڭ ىشىندە «سامۇرىق-قازىنا» توبىنداعى ۇلتتىق كومپانييالاردىڭ اكتسييالارىن IPO-عا تابىستى شىعارۋ تاپسىرىلدى.
جەتىنشىدەن, «ادامي كاپيتال – جاڭعىرتۋ نەگىزى» باعىتى بويىنشا بىلىم بەرۋ جانە دەنساۋلىق ساقتاۋ سالالارىندا, سونداي-اق الەۋمەتتىك بلوك بويىنشا بىرقاتار تاپسىرمالار بەرىلدى. ناقتىراق ايتساق, بىلىم جانە عىلىم مينيسترلىگى ەڭبەك جانە حالىقتى الەۋمەتتىك قورعاۋ, ۇلتتىق ەكو­نوميكا, قارجى مينيستر­لىكتەرىمەن تىزە قوسىپ, «جاڭارتىلعان مازمۇنعا كوشكەن مۇعالىمدەردىڭ لاۋازىم­دىق قىزمەتاقىسىن 2018 جىلعى 1 قاڭ­تاردان باستاپ 30%-عا ارتتىرۋعا», «جاڭا جۇيە بويىنشا بەكىتىلگەن قۇزىرەتتىلىككە بايلانىستى مۇعالىمدەردىڭ جالاقىسىن 30-دان 50%-عا دەيىن ارتتىرۋعا» مىن­دەتتەلدى.
بۇدان بولەك, بعم باسشىسى ەرلان ساعاديەۆ «مەكتەپ وقۋشىلارىنىڭ وقۋ جۇكتەمەسىن ازايتۋ بويىنشا ۇسىنىستار ەنگىزۋگە», «بالالاردى ەرتە جاستان دامىتۋ باعدارلامالارىن جەتىلدىرۋگە جانە ولاردى 2019 جىلعى 1 قىركۇيەكتەن باستاپ ەنگىزۋ بويىنشا ۇسىنىستار ەنگىزۋگە», «پەداگوگي­كالىق جوو-لاردا كافەدرالار مەن فاكۋلتەتتەردى دامىتۋ بويىنشا شارالار قولدانۋعا», «بىلىم بەرۋدىڭ بارلىق دەڭ­گەيلەرىندە ماتەماتيكا جانە جاراتى­لىستانۋ عىلىمدارىن وقىتۋ ساپاسىن ارت­تىرۋعا», «مەكتەپتەردى كەڭجولاقتى ين­تەرنەتكە قوسۋعا», سونداي-اق «بارلىق وڭىرلەردە وقۋشىلار سارايلارىنىڭ بازاسىندا بالالار تەحنوپاركتەرى مەن بار­لىق قاجەتتى ينفرا­قۇرىلىمى بار بيزنەس-ينكۋباتورلار جەلىسىن قۇرۋ بويىنشا شارالار قولدانۋعا» جاۋاپتى.
ۇكىمەت باسشىسى باقىتجان ساعىنتاەۆ الىپبيدى لاتىن قارپىنە كوشىرۋ ماسەلەسىنە قاتىستى دا تاپسىرما بەردى.
–ەلباسى قازاق تىلىندەگى تەرمينولوگييا ماسەلەسىنە دە ەرەكشە نازار اۋداردى. قالىپ­تاسىپ قالعان حالىقارالىق تەرمين­دەردى اۋدارىپ, قازاق تىلىن قيىنداتۋدىڭ قا­جەتى جوق. قايتا بىز لاتىن قارپىنە كوشۋ جاع­دايىندا حالىقارالىق تەرميندەردى تىلى­مىزگە ىڭعايلى, ۇتىمدى پايدالانۋ جاعىن قاراۋى­مىز كەرەك, – دەدى پرەمەر-مينيستر. وسىعان بايلانىستى مادەنيەت جانە سپورت مينيسترى ارىستانبەك مۇحامەديۇلى جالپى جۇرت ماقۇلداعان الەمدەگى تەرميندەردى اۋدارۋدىڭ تاسىلدەرىن قايتا قاراۋعا تاپسىرما الدى.
دەنساۋلىق ساقتاۋ بلوگى بويىنشا مينيستر ەلجان بىرتانوۆقا وسى جىلدىڭ مامىر ايىنىڭ سوڭىنا دەيىن «دەنساۋلىق ساقتاۋدى دامىتۋدىڭ مەملەكەتتىك باعدار­لاماسى» مەن «ونكولوگييالىق اۋرۋلارمەن كۇرەستىڭ كەشەندى جوسپارىنىڭ» جوبا­لارىن ازىرلەپ, ۇكىمەت قاراۋىنا جىبەرۋ تۋرالى تاپسىرما بەرىلدى. ول بيىل «حالىق دەن­ساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ جاڭا رەداكتسيياسىن ازىرلەپ, ۇكىمەت قاراۋىنا ەنگىزۋى قاجەت.
– پيلوتتىق پايدالانۋدان كەيىن «ەلەك­تروندى دەنساۋلىق پاسپورتىن» ەندىرۋدى جەدەلدەتۋ قاجەت. ازاماتتاردىڭ وزدەرىنىڭ دەنساۋلىق جاعدايى تۋرالى اقپاراتقا ونلاين رەجيمدە كىرۋىن قامتاماسىز ەتىپ, تۇرلى موبيلدى تەحنولوگييالار ارقىلى دەنساۋلىق ساقتاۋ قىزمەتتەرىن الۋ مۇم­كىندىگىن كەڭەيتۋ كەرەك. ول ۇشىن وڭىرلەردىڭ اكىمدىكتەرى بيىل بارلىق مەديتسينالىق ۇيىمدى اقپاراتتىق جۇيەلەرمەن 100% قامتاماسىز ەتۋگە تيىس, – دەدى باقىتجان ساعىنتاەۆ.
ول مينيستر تامارا دۇيسەنوۆاعا ۇكىمەتتىڭ كەلەسى وتىرىسىندا وزىن-وزى جۇ­مىسپەن قامتىعان ازاماتتاردى راسىمدەۋ تۋرالى, سونداي-اق وسى جىلدان باستاپ اتاۋلى الەۋمەتتىك كومەك كورسەتۋدىڭ جاڭا فورماتىن ەنگىزۋ تۋرالى ەسەپ بەرۋدى جۇكتەدى.
– بيىلعى 1 شىلدەدەن باستاپ بازالىق زەينەتاقىنى تاعايىنداۋ جۇيەسى وزگەرەدى. الەۋمەتتىك قورعاۋدىڭ بارلىق ورگاندارى ازاماتتارىمىزعا ولاردىڭ ەڭبەك قىزمەتىن زاڭداستىرۋعا بارىنشا كومەك كورسەتۋى تيىس, – دەدى ب.ساعىنتاەۆ.
سەگىزىنشىدەن, پرەمەر-مينيستر «تيىمدى مەملەكەتتىك باسقارۋ» باعىتى بويىنشا «كاسىپكەرلىكتى دامىتۋ – ۇكىمەت جۇمىسىنىڭ نەگىزگى باسىمدىقتارىنىڭ بىرى» ەكەنىن اتاپ وتتى جانە ۇلتتىق ەكونوميكا مينيسترلىگىنە بىرقاتار تاپسىرما بەردى. ادىلەت مينيستر­لىگىنە, استانا جانە ماڭعىستاۋ اكىمدىكتەرىنە مەملەكەتتىك قىزمەت ىستەرى جانە سىبايلاس جەمقورلىققا قارسى ىس-قيمىل اگەنتتىگىمەن بىرلەسە وتىرىپ, فاكتورلىق-بالدىق شكالا نەگىزىندە مەملەكەتتىك قىزمەتكەرلەرگە ەڭبەكاقى تولەۋدىڭ جاڭا جۇيەسىن ەنگىزۋ تاپسىرىلدى. مۇنى باقىلاۋ ۆيتسە-پرەمەر ەربولات دوساەۆقا جۇكتەلدى.
– توعىزىنشى, «جەمقورلىقپەن كۇرەس جانە زاڭنىڭ ۇستەمدىگى» باعىتى بويىنشا بارلىق مەملەكەتتىك ورگاندار جەمقور­لىقپەن كۇرەسۋ جۇمىستارىن جالعاستىرۋى كەرەك. اقپارات جانە كوممۋنيكاتسييالار مينيسترلىگى ازاماتتاردىڭ وتىنىشتەرىن قاراستىرۋ پروتسەسىنە قولجەتىمدىلىگىن قامتاماسىز ەتۋ ماقساتىندا قولدا بار اقپاراتتىق جۇيەلەردى پىسىقتاۋ قاجەت. جاۋاپتى مينيستر – داۋرەن اباەۆ, – دەدى ب.ساعىنتاەۆ.
ىشكى ىستەر مينيسترى قالمۇحانبەت قاسىموۆ قۇقىق قورعاۋ ورگاندارىن گۋ­مانيزاتسييالاۋ بويىنشا جۇمىستى جال­عاستىرۋى كەرەك. «ىشكى ىستەر مينيسترلىگى مۇددەلى مەملەكەتتىك ورگاندارمەن بىرگە كوشەلەردە جانە ازاماتتاردىڭ جاپپاي جينالاتىن ورىندارىندا بەت-جۇزدى تانۋ جانە بەينەباقىلاۋدىڭ, جول قوزعالىسىن باقىلاۋدىڭ زاماناۋي ينتەللەكتۋالدىق جۇيەلەرىن جاپپاي ەنگىزۋ بويىنشا قوسىمشا شارالار قابىلداۋى كەرەك» دەدى ب.ساعىنتاەۆ.
ونىنشى مىندەت – «اقىلدى ۇلت ۇشىن اقىلدى قالالار» باعىتى اياسىندا پرەمەر بارلىق اكىمدەرگە تيپتىك تۇجىرىمداما مەن قالاعا كوشىپ جاتقان ادامداردىڭ قۇزىرەت­تىلىگىن دامىتۋ نەگىزىندە «سمارت سيتي» تەحنولوگييالارىن كەشەندى ەنگىزۋ بويىنشا وز جۇمىستارىن جالعاستىرۋدى تاپسىردى.
سوزىن قورىتىندىلاي كەلە, باقىتجان ساعىنتاەۆ ۇلتتىق ەكونوميكا مينيستر­لىگىنە وسى جىلدىڭ 13 قاڭتارىندا ساعات 12.00-گە دەيىن ۇكىمەتكە «مەملەكەت باسشىسىنىڭ «تورتىنشى ونەركاسىپتىك رەۆوليۋتسييا جاعدايىنداعى دامۋدىڭ جاڭا مۇمكىندىكتەرى» جولداۋىن ىسكە اسىرۋدىڭ جالپىۇلتتىق جوسپارىن بەكىتۋ تۋرالى» پرەزيدەنت جارلىعىنىڭ جوباسى تۋرالى» ەل ۇكىمەتىنىڭ قاۋلىسى جوباسىن ەنگىزۋدى تاپسىردى.
–مەملەكەت باسشىسىنىڭ تاپسىرما­لارىن ورىنداۋ بارىسى تۋرالى ەسەپتى بىز تۇراقتى نەگىزدە ۇكىمەتتە قارايتىن بولامىز, – دەپ ۋادە ەتتى ۇكىمەت باسشىسى.
جيىننان شىققان قارجى مينيسترى ب.سۇلتانوۆ مۇعالىمدەردىڭ جالاقىسىن كوتەرۋگە شامامەن 60-70 ميلليارد تەڭگە جۇمسالاتىنىن جۋرناليستەرگە حابارلادى. ونىڭ مالىمەتىنشە, بۇل ىسكە ۇكىمەت رەزەرۆىندەگى ەركىن قالدىق قاراجاتتار پاي­دالانىلماق. تيىستى ەسەپتەمەلەر جۇر­گىزىلگەن سوڭ, بيۋدجەت ناقتىلاناتىن بولدى.

ايحان شارىپ

 

بولىسۋ:

پىكىر جازۋ


*